Taian Bwaeoniia ni Katoai Aba
Vicky Tadić
Taan Moan Rairaki i Bosnia ao Herzegovina
“Anne te namakin mai iroun te Tamnei ae Raoiroi?” E titiraki Vicky.
“Nakomai riin!” E wewete mwanen Vicky. “Tia nako n takakaro ma ana utu Rowes!”
Te utu ae te Rowes bon kaain rarikiia aika boou. A tia ni mwaing nako Bosnia ao Herzegovina man te United States. Iai natiia ae ti terorona ma Vicky ao tarina ma mwanena. Ma a kabi te taetae ni Bosnia. Vicky bon ti ngaia man ana utu ae rabakau te taetae ni Imatang. E rarairi taeka bwa a aonga ni bane n takakaro.
Vicky e tekateka ma Mrs. Rowe iaan te bwaranta ngke ataei ake tabeman a takakaro.
“A taraa ni kaokoro am utu,” e taku Vicky. “E rang tamaroa aroia.”
E wingare Mrs Rowe. “Ko tangiria n nako n taromauri ma ngaira? Anne e kona ni buokiko n noria bwa e aera ngkai ti kaokoro. Akea ara tabo n taromauri ikai i Bosnia, ma ti karaoa ara taromauri ma ara utu ni mweengara.”
Iai ingaingan Vicky ngke e roko n aia auti te utu ae te Rowes n te Tabati. Mai moana a anenea te anene. Temanna natiia e taekina te tataro. Imwiina Mr. Rowe e tataro ao e kabuta te kariki ao te ran nakoia ni kabane aomata. A taku bwa e aranaki bwa te toa. Imwiin anne natia te aine Jessie e anga ana kabwarabwara.
E tangiriira Tamara are i Karawa. E taetae nakoira rinanon te Tamnei ae Raoiro,” e taku Jessie. “N tabetai te Tamnei ae Raoiroi e anganiira te namakin ae rau. Ke n tabetai E anganiira te iango.”
N te bong are imwiina, e nakonako Vicky nakon te titoa bwa e na kaboa te kariki. Iaon kawaina n okira mweengana, e a kaan ma rarikin te turam ni mange ngke e ongo te bwanaa n ana iango ae tuangnga bwa e na tei. Kararoako, e taku.
E tei Vicky n aki kakamakuri. N te tai ae waekoa, tewana te kaa ae bane rerena n kabwake n te koona. UNTABA! E untaba ma te turam ni mange.
E ikerake Vicky. E rangi ni karabwarabwa bwa e kakauongo nakon te bwanaa!
Rimwii, Vicky e tuanga Mrs. Rowe te rongorongo. “Ngaia anne te Tamnei ae Raoiroi?”
“E taraa n ae bon ngaia. N tabetai te Tamnei ae Raoiroi e kauringiira n taian kangaanga.”
“E kamanoai te Atua,” e taku Vicky. “N a ongongo n tainako iroun te Tamnei ae Raoiroi.”
E reitinako Vicky n nakon aia auti te Rowes ibukin te taromauri ni katoa Tabati. Imwiina Vicky e tibauaia Ana Boki Moomon ma tinana. N aki maan imwiina a na utu ni kabane a reiakina taekan te euangkerio mai irouia te Rowes. E raitaeka Vicky ibukiia ni kabane.
N tebongina Mr. Rowe e titirakiniia ana utu Vicky te titiraki. E a manga kaokia Vicky n te taetae n Bosnia. “Ko kona n ira ana katooto Iesu Kristo ao ni bwabetitoaki?”
E tataninga Vicky. E tangiria ni kan bwabetitoaki. Ma e raraoma bwa teraa ae a na taekinna ana utu.
N tokina, e a taetae taman Vicky. “Eng.”
“Eng,” a taku ana utu.
E rangi n rotaki Vicky n te kukurei are kanga e a kaan n rebwetaua buroona. “Eng,” e taku nakon Mr. Rowe. “Eng, ti na karaoia.”
Teuana te wiiki imwiina, Vicky ao ana utu a buti inanon nimaua te aoa ni kaea ana kateitei te Ekaretia ae kaan. Vicky e namakina te kukurei ngke e rin inanon te ran ibukin bwabetitoakina. E a namakina riki te kukurei ngke e a kamatoaki bwa kaain Ana Ekaretia Iesu Kristo Ibukiia Aika Itiaki ni Boong aika Kaitira.
Ngkai e a kona n reke irouna te Tamnei ae Raoiroi ni katoatai.
Iai 73 membwa n te Ekaretia i Bosnia ao Herzegovina.
Te tembora ae kaan nakon Bosnia ao Herzegovina bon te Rome Italy Tembora.
E mena Bosnia ao Herzegovina i maiaki meangin Eurobe.
Vick e tatangira te memena i tinaniku. Te nakonako nakon tabo aika a ririeta bon mamaten nanon Vicky.
E bwabetitoaki Vick ngke 16 ana ririki.
Ngke e a ikawairake Vicky, e mare n te tembora. Iai ngkai uoman natina.
Kamataata n te Tamnei iroun Zhen Liu