Te Namakin ae Tamaroa
E maeka te tia korokaraki i Guatemala, Guatemala.
“N na bon katobibiko ni bain au tangira” (Reirei ao Berita aika Tabu 6:20).
Bon te bong ae tamaroa, n te moaningabong i San José Pinula, te kawa ae uarereke i rarikin Guatemala City. “I aki kona n tataninga.” E tuanga mwanena ae uarereke Joshua. Te bong aei bon ana bong ni bwabetito!
Imwiin rokoia kaain te utu n te umwantabu, a onoiia Joshua ao Papa n aia kunikai ae mainaina. N te moantai, e namakina te nakonano Joshua. Ma Papa e taua baina ngke a ruo rikaki nako nanon te ran, ao e a toki nakonnanona. Ngke e aerake Joshua man te ran, e roko te moangare imoana.
A onoia Joshua ao Papa nakon kunikaia ae mau. Imwiina aitaman ao tibun Papa ao Joshua a katokai baia iaon atuun Joshua. A kamatoa bwa kaain Ana Ekaretia Iesu Kristo ibukiia Aika Itiaki ni Boong aika Kaitira. Joshua e ongo bwa e kangai Papa, “E a reke iroum te Tamnei ae Raoiroi.”
“I rangi ni kukurei!” e taku ngke e rabwatia Papa.
“Uringa te berita are ko karaoia n te bong aei,” E taku Papá. “Ngkana ko karaoia, e na kona te Tamnei ae Raoiroi ni mena iroum n tainako. Ko na bon aki tiku n ti ngkoe.”
N te moaningabong teuana tabeua te namwakaina imwiina, e uti Joshua n tang. E korakora marakin biritona! “Mamá!” E takarua Joshua man ana kainiwene. “E a rangi ni maraki biritou!”
E a korakora rikiraken marakin biritona. E aki kon n nakonako. Papa e angan Joshua te kakabwaia n te nakoanibonga, ao imwiina ngaia ma Mama a kairia bwa e na nora te taokita.
E taku te taokita bwa e riai ni karaoaki te korokoro iaona n te tai ae waekoa. E taraa ni kakamaku.
“Ti na kairiko nakon te ru ae onoti ibukin te korokoro,” e taku te taokita. “Ko na bon aki namakina te bwai teuana, ibukina bwa ko na bon matunako. A na bon tataningaiko am karo itinaniku.”
E namakinna Joshua bwa kanga e a maaku riki. E aera ngkai aki kona ana karo n tiku irarikina n te ruu? E aki kona n toki tangina.
Mama e karaurau n taetae. “Tera ae ti kona ni karaoia bwa ko na namakina te kukurei?” e taku.
“I ataia bwa tera ae ti kona ni karaoia,” e taku Joshua. “Taiaoka anenea ‘Ngai natin te Atua.’ ma ngai. Ngkanne tia manga tataro riki.”
Ngke a karaurau n anene, e uringa Joshua bwa e anenea te anene anne n tain ana bwabetito. N tain aia tataro, e uringa te bwai are e taekina Papa n tain ana bwabetito: “E kona te tamnei ae Raoiroi ni mena iroum ni katoa tai. Ko na bon aki tiku n ti ngkoe.”
E bon tiku naba Joshua ni maaku ngke te neeti e a katikia nakon te ruu ni korokoro. E aki kona n nora ubun te taokita ao neeti ibukina bwa a bwainii karabaan te ubu. Ma ngke e tarai mataia, e ataia ae ngaiia bon raoraona ao a na karaoa ae tamaroa ni kamarurunga.
Imwiin ana korokoro e taku te taokita bwa e riai Joshua ni motirawa. E bon kua ao ni marakiraki, ma marakin biritona e a raoiroi. E aki namakina ae e na manga tang. E ataia bwa e na bon marurung.
“I namakina te bwai teuana i nanou,” Joshua e tuanga Mamá ao Papá. “Bon te namakin ae abuee.”
“Anne teuana te kawai ae ti namakina te Tamnei ae Raoiroi,” e taku Mamá.
E katoutoua atuna Joshua. E kakatonga ngkai iai ana bwai n tituaraoi te Tamnei ae Raoiroi irouna. Ibukin te Tamnei ae Raoiroi, e aki kona n tiku n ti ngaia.
Kamataata n te tamnei iroun Glenn Harmon