Katauraoi ibukin te Itita
“A neboa te Tama i nanon arana, ma nanoia ao baia aika a itiaki” (2 Nibwaai 25:16).
“Uti, Lydia, ” e taku Mama. “Ngkai te Kaabong ae Itiaki!” I Russia, te tabo are e maeka iai Lydia, te Kaabong ae Itiaki bon te bong ae onoti ibukin te katauraoi nakon te Itita.
E rairaki Lydia nakon iterana ao n taraa tinaniku man te wintoo. E bon roo tinaniku.
“Mama, I a rangi ni kua,” e taku Lydia. “I kona ni matu riki teutana ao I a mwakuri rimwii?”
E ngare Mama ao e tekateka iaon te kainiwene. “Iai bukina ae ti utimwaka n te bong aei. Ko ataia bwa teraa?”
E iango Lydia, ma e aki ataia.
“Ti mwakuri korakora ni kaitiaka mwengara n te bong aei ni kauringiira ngke Iesu e teboki waeia Ana reirei. E tangira ao e beku ibukiia tabeman, ao ti tangiria ni beku n aron Iesu inanon mweengara. Te bong aei bon tain uringan Iesu!” E taku Mama.
E tangiria Lydia ni beku n aron Iesu, ngaia are e a kibarake man te kainiwene. Inanon te bong anne, e mwakuri korakora. E kaitiaka aontano, uatii kunikai, ao e ibuobuoki ni kuuka. N tokin te bong, e namakinna ae e kakatonga. Bwaai ni kabane a bane itiakiia n raneanea.
Te bong are imwiina, bon te Kanimabong ae Tamaroa. Lydia, Mama ao Papa a karaoi bunimoa ibukin te Itita. A ewara ni kabwangabwanga te bunimoa ao a kanakoa kanoana. A korei tamnei iaon te bunimoa ao a rabun tamnei n te uakiti. Ngkanne a kateboi bunimoa inanon kabiraia ae te uraura ae toka matana, te beboo, ao te kiriin. Lydia e tangira aron tamaroan karakaran tein taraakiia.
Ngke a mauu bunimoa, Lydia e a katokai tamneia ana utu iaon bunimoa n tatabeua nako. N te Kanimabong aei bon te bong ni ikotaki ao n uringa ana angakarea Iesu. Bon te bong n te wiiki ngke e mate Iesu. Te bunimoa e angan Lydia kauringan te ruanimate are e wene iai Iesu. A kabanea aia konaa ana utu Lydia n Uringnga.
N te Kaonobong Tabu, Mama e karaoa te kulich (kariki ni Itita). Karaoan te kukich e bon kakawaki ni katein te Itita i Russia. Aomata a kataia ni kaota te karinerine n taai nako ngkana te kulich e umunaki. Lydia e iangoia ana utu, Mangautin Iesu, ao bwaai ake e kakaitau ibukiia. E bebete iangoakin bwain te tamnei ngkana ana auti e itiaki ao n rau.
N tokina e a roko Tabatin te Itita! E rangi ni kukurei Lydia. E roko ai tarina ni kawariia. A uaia ni kana te amwarake ae kangkang are e ibuobuoki ni kukanna. Iai taian bwaai, kulich tiaotiti, ao taian tiiti. Ngke a amwarake, a tibwai aia koaua ao n taekin bwaai ake a kakaitau ibukina.
Imwiin te katairiki a takakaro n te takakaro ae onoti. Ngaiia n tatabemaniia nako a taui bunimoa ake a katamaroaki ao a ororeia ma te bunimoa are teuana. Te aomata are e moan tabwenaua ana bunimoa e konaaki man te takakaro. E ruru bain Lydia ngke e katenaa ana bunimoa ma ana bunimoa ai tarina. “Kamatoatoako, te bunimoa!” e takarua. Ana bunimoa are e karakara n te beebo e tabwenaua. Inanon te bunimoa are e tabwenaua bon tamnein ana utu.
E ngare Lydia ngke e taraa te tamnei. E aki tabe ngke e konaaki n te takakaro. Te namakin n tangira, ao ni kukurei e rota nanona. E a tia ni mwakuri korakora ni katauraoi ibukin te Itita aei man buokaia ao n tangiraia ana utu. Ibukin Mangautin Kristo, a na manga bane ni maiu!
Kamataata n te tamnei iroun Sofia Cardoso