Braden I Lidim Rod
Woman we i raetem hemia i stap long Kalifonia, YSA.
Stori ia i hapen long Lusiana, YSA.
Laef long fam blong krokodael i gud tumas. Be wan samting i no gat.
“Yu mas soemaot gudfala eksampol long Ol Kristin man” (1 Timoti 4:12).
Braden mo Papa i karem ol hevi baket blong kaekae blong ol krokodael i go long ples blong fidim olgeta. Ol hed blong ol krokodael oli kamaot antap long wota mo oli swim i kam long tufala. Taem Braden mo Papa i kasem ples blong fidim ol krokodael, sam long ol krokodael oli openem maot blong olgeta i stap finis.
Be Braden i no fraet. Blong wok wetem Papa long fam blong ol krokodael i gud tumas.
“!Taem blong kakae!” Braden i talem. Hem i pikimap wan spun blong kaekae blong krokodael mo sakem i go long olgeta long wota.
Jom. Jom. Splas.
Sam long ol krokodael ia oli kasem ol kaekae antap long ea nomo. Ol narawan oli kasem ol kaekae taem i tajem wota. Braden mo Papa i gohed blong sakem kaekae kasem taem ol baket blong tufala i emti.
“Tangkyu blong helpem mi,” Papa i talem. “Yumi go. Bae ol misinari oli kam i no long taem.”
Braden mo famli blong hem oli stat blong toktok wetem ol misinari long sam manis i pas. !Hem i laekem ol misinari! Hem i laekem blong lanem abaot Jos. Papa i wan memba blong Jos, be hem i no bin stap go long jos tumas. Mama mo Braden oli neva kasem baptaes.
“Las wik, yu putum wan gol blong ridim Mosaea 18,” Sista Cox i talem long naet ia. “?Hemia i go olsem wanem?”
Mama mo papa i lukluk tufala mo stap kwaet blong smol taem. “Mifala i bisi tumas long wik ia,” Mama i talem.
“!Mi mi ridim!” Braden i talem.
“!Gudfala wok!” Sista Blood i talem mo i pusum han i go antap blong tufala i slap. “?Yu filim olsem wanem afta we yu ridim?”
Braden i smael bigwan. “Gud tumas. Mo mi prea blong kasem baptaes. Mi rili wantem.”
“!Hemia i gud tumas! Mi save se hemia bae i mekem Papa long Heven i hapi tumas,” Sista Cox i talem. Hem i tanem hem i go long mama blong Braden. “?Yu filim olsem wanem abaot hemia?”
“Mi no sua yet. Mi ting se mi nidim smol moa taem,” Mama i talem.
Braden i harem nogud smol long taem blong lesen. Hem i hop se tugeta, papa mo mama blong hem, oli ol memba blong Jos. !Mo hem i wantem stap olsem wan memba blong Jos tu!
Taem ol misinari oli aot, hem i talem long papa mo mama blong hem se, hem i minim wanem hem i bin talem tedei. “Mi rili wantem kasem baptaes. Mo …” Braden i pulum wan bigfala win. “Mi rili wantem blong Papa i baptaesem mi.”
Afta long wan smol taem, Papa i toktok. “Mi rili wantem hemia tu.”
Mama i stap kwaet. “Bae yumi prea from.”
Braden i nildaon wetem famli blong hem mo askem Papa long Heven sapos hem mo mama blong hem i mas baptaes. Hem i filim wom mo lav insaed long hem.
Braden i ridim skripja mo prea evri dei long ol nekis wik we oli kam. Fastaem, oltaem bae hem nao i askem papa mo mama blong hem blong oli prea mo rid wetem hem. Be i no longtaem, olgeta nao oli stat blong askem hem. Taem hem mo Papa i fidim ol krokodael, bae tufala i tokbaot ol skripja o wanem oli lanem long jos. Bae hem mo mama i tokbaot ol misinari lesen. I luk olsem Mama mo Papa i stap glad smol moa evri dei.
Wan dei long taem blong wan lesen wetem ol misinari, Mama i talem ol toktok we Braden i bin stap wet from: “Mi wantem kasem baptaes.”
Long ol nekis wik we i kam, Braden i filim olsem se hem i stap flot long ol klaod.
Afta, hem i dei blong baptaes blong Mama mo Braden. Taem Braden i kamaot antap long wota, hem filim lav blong Papa long Heven long hem mo famli blong hem. Hem i givim wan bigfala hag long Papa.
Papa i holem Braden kolosap long hem mo wispa long hem se, “Tangkyu blong stap olsem wan gudfala eksampol mo stap helpem mifala. Mi lavem yu.”