Ol Paeonia long Evri Ples
Julia Mavimbela
Komuniti Lida long Saot Afrika
“Lav i kam nomo taem yumi fogivim ol narawan.”
Julia i waepem aebro blong hem. Afta i pikimap savel blong hem mo stat blong digim graon. Naoia, graon we i raonem hem i olsem doti nomo. Be i no longtaem, bae i kam wan naesfala garen.
Ol taem ia oli had blong Ol Blak pipol long Saot Afrika. Ol loa longwe oli seperetem Ol Blak man long Ol Waet man. Oli fosem fulap Blak man blong lego ol hom blong olgeta mo go stap long sam eria we i longwe long Ol Waet man, mo oli no save vot. I gat vaelens long taon we Julia i stap laef long hem, mo ol skul oli klos from vaelens ia. Samtaem i no sef blong stap aotsaed.
Be hemia i no stopem Julia. Hem i wantem blong mekem wan samting we bae i mekem gud long komuniti blong hem. Hemia nao from wanem hem i stap statem wan garen.
Sam pikinini oli luk Julia i stap wok. “?Mifala i save help?” oli askem.
“O yes,” Julia i talem. Hem i givim wan savel long wanwan long olgeta. Hem i soem long olgeta olsem wanem blong mekem graon i sopsop mo digimaot ol nogud gras.
“Letem yumi digimaot konkon long graon, sakem wan sid blong lav, mo luk wanem frut bae i save givim long yumi,” hem i talem. “Lav i kam nomo taem yumi fogivim ol narawan.”
Ol wik oli pas, mo moa plant oli gro. Ol nara man oli kam blong wok long garen. Oli pulumaot ol longfala rabis gras. Oli planem moa sid. Oli wotarem ol plant ia. Hemia i mekem Julia i glad tumas blong luk plante man oli stap help.
Wan dei, Julia i mitim tu yang man. Julia i sapraes from Ol Waet man oli no stap kam nating long eria we oli stap laef long hem. Oli talem se oli ol misinari. Hem i invaetem olgeta blong serem wan mesej long hom blong hem.
Taem boe blong Julia i harem se oli stap kam, hem i sek. “?From wanem yu invaetem olgeta?” hem i talem. “Olgeta oli Ol Waet man. Hem i no sef.”
Be Julia i trastem ol misinari ia. “Ol man ia oli defren,” Julia i talem. “Oli stap prij abaot pis.”
Taem ol misinari oli kam, Julia i welkamem olgeta i kam insaed. Wan long tufala i luksave wan foto long self. Hem i wan foto blong mared blong Julia.
Misinari ia i poenem foto mo askem se, “?Huia ia?”
“Hasban blong mi, Jon.” Julia i lukluk i go daon. “Hem i ded long wan aksiden blong trak.”
Misinari ia i sakem hed blong hem. “Mifala i biliv se ol famli oli save stap tugeta blong taem we i no save finis, iven afta we oli ded.”
Wan filing blong pis i kavremap Julia. Hem i glad blong lanem abaot plan blong God mo i gohed blong stap mit wetem ol misinari. Lav blong Julia long gospel i gro long hat blong hem, semmak olsem ol plan long garen blong hem. I no longtaem, hem i disaed blong kasem baptaes.
Long jos, Julia i mitim fulap niu man. Sam oli Ol Blak man. Sam oli Ol Waet man. Be oli givim seves tugeta mo lan tugeta.
Julia i soem ol pikinini long jos olsem wanem blong help long garen blong hem. “Hat blong yumi i mas sopsop, olsem graon ia,” hem i talem. “Yumi mas mekem wan ples blong gospel insaed long yumi. Yumi mas mekem wan ples blong lav.”
Tetin yia afta long baptaes blong Julia, ol loa we i seperetem Ol Blak man mo Ol Waet man long Saot Afrika, i stop.
I gat kolosap long 70,000 memba blong Jos long Saot Afrika tedei.
Saot Afrika i gat 11 ofisol lanwis.
Julia i help blog statem Women for Peace, wan grup blong leftemap fasin blong stap wan mo gat pis long Saot Afrika.
Julia i wan long ol fas pipol blong wok long tempol long Joanesbeg Saot Afrika Tempol.
Julia i wan tija. Hem i tijim ol pikinini blong rid taem oli wok long garen blong hem.