Yu Nao I Raetem Stori Ia

Bae Mi Luk Brata blong Mi Bakegen

I kam long Isabella S., 11 yia, Yuta, YSA

Betdei blong smol brata blong mi, Gabriel, hem i long las wik. Sapos no, bae hem i gat seven yia nao, be hem i handikap, mo i ded tu yia i pas finis. Long Praemeri, mifala i singsing “Getsemane.” Ol toktok blong hem oli klia mo oli gat mining. I fulumap rum wetem Spirit.

Afta long singsing ia, Sista Webster i serem testemoni blong hem abaot Atonmen blong Jisas Kraes. I fulumap rum moa wetem Spirit. Afta hem i tokbaot olsem wanem brata blong hem i bin ded sam yia i pas finis. I mekem mi tingbaot Gabriel, mo kolosap mi stat blong krae. Mi tingbaot taem mi holem Gabi laswan. Mi harem nogud, be mi filim pis tu.

Sista Webster i tokbaot olsem wanem hem i glad tumas blong save se bae hem i luk brata blong hem bakegen. Hem i se, hem i save we bae mifala evriwan i luk olgeta we mifala i lavem, we oli ded finis.

Afta long Praemeri, mi givim wan hag long Sista Webster. Mitufala i krae blong sam minit. Spirit i bin strong tumas. Hem i talem long mi se bae mi luk smol brata blong mi bakegen. Hem i talem se Atonmen blong Jisas Kraes i no blong ol rabis man nomo, be blong olgeta we oli harem nogud tu. Hem i askem wanem nao mi misim moa abaot Gabi, mo mi talem se mi rili misim laf blong hem.

Mi talem long Sista Webster se mi bin harem nogud from hem i betdei blong Gabriel long wik ia mo mi rili nid blong save se bae mi luk brata blong mi bakegen. Sista Webster i talem long mi se ol krae blong mitufala oli ol krae blong glad. Mi save filim Spirit, mo mi save se wanem hem i talem i tru. Mi sua se bae mi luk Gabriel bakegen, mo hemia i mekem mi hapi tumas. Mi lavem Hem. Mi save se, from Jisas Kraes i lavem mi, Hem i givim laef blong hem mekem se mi save luk Gabriel bakegen.