Futbol mo Sabat
Stori ia i hapen long Honduras.
“Satedei i wan spesel dei. Hem i dei blong yumi rere blong Sandei” (Children’s Songbook, 196).
Betdei blong Samuel i foldaon long wan Sandei.
Samuel i laekem tumas blong wajem TV wetem Papa, speseli long ol Satedei. Papa i wokhad ful wik. Be long ol Satedei, Mama i kukum pastelitos de piña (flaoa wetem paenapol insaed) mo olgeta evriwan i wajem TV tugeta.
Long wan Satedei naet, oli disaed blong wajem wan partido de fútbol (futbol gem). Be gem i stat let, mo bae i gohed blong wan longfala taem. Taem fas haf i finis, sko hem i 0-0. Samuel i wantem blong gohed mo waj. Be hem i no save stop blong pulum win bigwan from slip.
“Taem blong silip Samuelito,” Mama i talem kwaet. “Yu nid blong silip mekem se yu save wekap long jos tumoro.”
“Be Mama,” Samuel i talem. “!Hemia tu long tufala bes tim long Honduras!”
Papa i lukluk klok. “I stret. Yu save gohed blong wajem. Be yu nid blong wekap long taem tumoro.”
Gem i kam moa naes long seken haf. !Naoia Samuel i wekap gud! Hem wetem Papa i stap singaot blong sapot. Faswan, i gat wan kona kik. Afta gol kipa i sevem gud balong. Wan tim i putum poen, afta nara tim i putum poen. Bifo Samuel i luk save, gem i finis. Gem i finis wetem wan kitkit blong 1-1.
Long nekis moning, Samuel i taet tumas mekem se hem i no wantem kamaot long bed. Be hem i save se blong go long jos i impoten.
Long taem blong sakramen miting, Samuel i stat blong silip. Hed blong hem i wokem foldaon blong silip. Mama i stikim hem blong helpem blong wekap i stap. Be hem i taet tumas mekem se hem i no stap lisin long ol man we oli givim toktok. “Mi ting se Satedei blong yu i stap spolem Sandei blong yu,” Papa i talem.
Long praemeri, tija blong Samuel i tokbaot fasin blong stap kipim Sabat dei i tabu. Hem i askem wanem nao ol pikinini i save mekem blong mekem Sandei i spesel. Samuel i tingting smol taem. Afta hem i talem, “!Silip long taem long Satedei!”
Taem oli kasem haos afta long jos, Samuel i toktok long Mama mo Papa. “Mi bin gat gud taem blong wajem gem las naet,” Samuel i talem. “Be mi sapos blong go silip moa eli. Mi ting se yumi mas yusum pat blong Satedei blong rere from Sandei.”
“Mi agri,” Papa i talem.
Mama i sakem hed blong hem se yes. “Mi yu.”
Long nekis Satedei, i gat wan nara gem long TV.
“?Bae yumi mekem wanem tedei long naet?” Papa i askem. “Gem bae i stap let bakegen.”
“Yumi save wajem wan muvi be i no gem,” Mama i talem.
“Sapos no, yumi save go wokbaot,” Samuel i talem.
“?Wokbaot i oraet wetem yu?” Papa i askem Mama.
“O yes,” Mama i talem. “I naes tumas blong stap tugeta olsem wan famli.”
“Mo taem yumi kambak long haos,” Samuel i talem, “yumi evriwan i save gat wan gudfala silip long naet. !Afta bae yumi rere from Sandei!”