!Lok Aotsaed!
Hem we i raet i stap long Yuta, YSA.
Stori ia i hapen long Sentrol Hangari, Hangari.
!Ating Emma i save help!
”Putum tras blong yu long Spirit ia we i lidim man blong mekem gud” (Doktrin mo Ol Kavenan 11:12).
Emma i jiam ova long ol hol long ston blong wokbaot long hem long saed rod. Hem i wan dei we i gat fulap laet mo san i strong. Hem i stap wokbaot wetem Mama blong hem blong go long stoa.
“Mama, ?hamas nao san i stap longwe long yumi?” Emma i askem.
“Mi no sua,” Mama i talem.
Emma i sarem ae blong hem smosmol blong lukluk antap long skae. ?Yu yu ting se bae wan roket plen bae i go long san wan dei? ?Yu ting se i moa hot bitim laetning? Yu ting se …”
Mama i laf. “!Ol kwestin blong yu oli stap kam moa had!”
Emma i laf tu. Hem i gat fulap kwestin. Oltaem Mama i stap traem bes blong hem blong ansarem olgeta. Hemia i wan risen from wanem Emma i laekem blong go wokbaot wetem Mama.
Emma i lukluk raon long ples we hem mo ol neba blong hem oli stastap long hem. Ol taksi oli draev i go daon long strit ia we oli wokem long ston. Ol pipol oli ron long baeskel. Fulap man oli stap wokbaot aotsaed tu.
Afta, Emma i lukluk krosem strit. Wan smol gel i stap sidaon long ol step aotsaed long wan bilding blong ol haos. I luk olsem we hem i stap krae.
Emma i wokbaot slo. ?Bae hem i stop blong help? Ating gel ia i wantem stap hemwan. Samtaem Emma i wantem stap hemwan taem hem i harem nogud.
Emma i stop blong wokbaot. Plante taem, Emma i wantem wan man blong toktok long hem taem hem i nidim help. !Mo ating Emma i save help!
Hem i pulum han blong Mama. “Luk, Mama. Mi ting se gel ia i nidim sam help.”
Mama i lukluk krosem strit. “Mi ting se yu talem tru.”
Emma i holem han blong Mama taem tufala i krosem strit. Hem i wokbaot i go antap long ol step i go long ples we gel i stap sidaon long hem. “Halo,” Emma i talem. “?Yu nidim help?”
Smol gel ia i pulum wota blong nus blong hem mo i lukluk i go antap long tufala. Ol han blong hem i raonem ol ni blong hem, mo ol ae blong hem oli red mo solsolap.
“Mi … Mi lok aotsaed long haos blong mi.” Hem i pulum gud win blong hem. Voes blong hem i seksek mo i kwaet. Emma i nildaon narasaed long hem blong harem gud hem.
“Mi no save rid,” gel ia i talem. “Mi no save wanem baten blong prestem blong gobak insaed.”
Emma i lukluk wol aotsaed long bilding blong ol haos ia. I gat fulap smosmol baten. Evri baten i gat wan nem long hem. Narasaed long ol baten ia, i gat wan spika.
“?Wanem famli nem blong yu?” Emma i askem.
“Schneider,” smol gel ia talem.
Mama i rid tru long ol evri baten mo faenem wan we i talem “Schneider.” Hem i pusum.
!Psss!
Baten ia i mekem wan laod noes. Afta wan voes i kamkamaot tru long ol spika.
“Hemia haos blong ol famli Schneider. ?Olsem wanem mi save helpem yu?”
Mama i toktok long spika ia. “Halo! Gel blong mi mo mi i stap aotsaed wetem wan smol gel we i talem se oli lokem aot hem.”
Gel ia i stanap kwiktaem mo i ron i go long spika. “Mama,” hem i talem, “Mi no bin save ridim baten blong kambak insaed mo ol !man ia oli helpem mi!”
Voes long spika ia i saon olsem hem i sapraes. “!Leni! !Mi ting se yu stap insaed long rum blong yu! No wari. Mi stap kam daon naoia nomo.”
Smol taem afta, wan woman i ron i kam aotsaed. Gel ia i ron i go long hem mo haggem hem.
Woman ia i tanem hem i go long Emma. “!Tangkyu blong helpem smol Leni blong mi!”
Emma i smael. “Hem i isi blong help.”
Oli talem tata mo stat blong wokbaot i gobak daon long ol step. Emma i filim ful bodi blong hem i wom insaed. Hem i tingting long wan moa kwestin blong Mama.
“Blong helpem gel ia i isi. ?From wanem mi filim mi hapi tumas from?”
Mama i skwisim han blong Emma. “Hemia Tabu Spirit ia, we i stap talem long yu se yu bin mekem wan gudfala joes.”
Emma i smael. Hem i glad se hem i bin stop blong helpem gel ia.