Veikavuni kei na Veivakidacalataki
Na dauvola ivola e vakaitikotiko mai Iowa, Amerika
E dodonu beka meu maroroya na ka vuni nei Kate?
“Raica, sa soli vei ira na tamata kecega na Yalo i Karisito me ra kila kina na vinaka mai na ca” (Moronai 7:16).
“Ae, raica!” A tomika cake o Kate e dua na matakau pepa kakalobilobi mai na buturara ni sitoa. “Qo, biuta ena nomu taga.”
“O vinakata meu kauta?” A taroga o Maddy.
“Na sitoa sa na sega ni rawa ni volitaka,” a kaya o Kate. “Era sa na viritaka ga ki na benu. Oqo e dua na ilesilesi ni veivueti. E daru sa vueta tiko na matakau oqo!”
A dredre o Kate vei Maddy. A matadredredre lesu mai o Maddy.
“DONU.” A ciqimaka o Maddy na matakau pepa ki na nona taga. Sa dua na ka talei me lako ena dua na ilesilesi ni veivueti!
Ia, ni rau biuta mai na sitoa, na matakau pepa a vaka e dua na vatu bibi e loma ni nona taga. Oya beka na ka e dodonu me da vakila ena dua na ilesilesi ni veivueti?
Ni rau yaco ki na vale nei Maddy, a vakavinakataka ka dedeka sara vakavinaka o Kate na matakau pepa ena kena vinaka duadua.
“Na mataqali isulu vaka cava meu cakava vua?” a taroga, ni tomika cake e dua na peniroka. “Vakacava ke me dua na ivinivo totoka ni danisi?”
A deguvacu ena yalo nanamaki o Maddy. “Oti me daru qai vakaraitaka vei tinaqu!”
“Sega! E daru na sega ni tukuna vua e dua,” a kaya o Kate. “Sega vakadua. Oqo na nodaru ka vuni, DONU? Yalataka vei au ni o na sega ni tukuna.”
“Oi … DONU. Au yalataka,” a kaya o Maddy. “Ia na cava e daru sega ni rawa ni tukuna kina?”
“Kevaka o tukuna, ena rawa ni cudru o tinamu, ka na sega ni vakatara me daru qito vata tale.”
“Na cava me na cudru kina o koya?” A taroga o Maddy. A vakila na mulo ni ketena kei na rere.
E biuta sobu na nona peniroka o Kate. “Kevaka o na sega ni vakatukutuku, au na vakatara mo maroroya na matakau kei na isulu kece au sa droinitaka vua.”
Sa kila o Maddy ni oqo na vuna e vakila kina na rere. “E daru … e daru a butakoca, e dina beka?” a vakasolokakanataka o koya.
“Ei, o iko ga o a vakasosoga ena nomu taga ka kauta vakavuni mai na sitoa.”
“Baleta ni o a tukuna vei au!”
“Au a sega ni kaya vakakina!” A kaya o Kate. “Au sa lako i vale ni bera ni ko vakaleqai au.” A tucake ka cici yani ki katuba.
Ena gauna vata oya a curu mai kina ki loma ni rumu o Tinaqu. “Na cava a biubiu kina vakariri o Kate?” A raica sara na matakau pepa ena ligai Maddy. “Ia, e kau mai vei na ka oqori?”
A katia na tebenigusuna o Maddy. A vakila ni sega ni vinaka na yalona kevaka e maroroya e dua na ka vuni mai vei tinana. Ia vakacava ke donu o Kate ka na cudruvi koya o Tinana?
Na lomaleqa ka vakila e ketena a sega ni lako tani rawa. E a cegu levu ka talanoataka yani na italanoa taucoko.
“A tukuna vei au o Kate meu yalataka me‘u kakua ni tukuna vua e dua,” a kaya o koya. “Ia au a vakila ni cala.”
A dabe tikivi koya toka e yasa ni nona idavodavo o Tinana. “E vuqa na veika vuni era cala. Vakauasivi kevaka e tukuni vei iko mo kakua ni tukuna vua e dua. Ena dua tale na yasana, e dua na ka e veivakidacalataki, me vaka e dua na iloloma se soqo ni marau, e rawa ni dua na ka vinaka. Sa kena inaki me ka ni marau vei keda kece.”
A deguvacu o Maddy. “Vinaka vakalevu na nomu sega ni cudruvi au,” a kaya. “A kaya o Kate ni o na cudruvi au.”
A mokoti koya vakaukauwa sara o Tinana. “Au sa qoroi iko dina ni ko rogoca na Yalo Tabu ka tukuna vei au na dina.”
“E rawa beka mo kauti au lesu ki na sitoa meu vakasuka na matakau?” A taroga o Maddy.
“Io e rawa!” A matadredre o Tinaqu. “Ni daru lesu mai, sa rawa ni o vukei au me daru bulia e dua na keke me vakidacalataki Ta.”
A dredre o Maddy. “Oqori e dua na ka au rawa ni vakila niu logaloga vinaka kina!”
Droini mai vei Devin McSherry