iCakacaka ni Kakana Vou nei Winfred
“Ka sa yaco ni keimami sa bula ena ivalavala ni bula marau” (2 Nifai 5:27).
Na cava e na rawa ni vakayagataka o Winfred ena nona icakacaka ni kakana?
O Winfred a vukei Bu (Bubu) me saqa ivakayakavi.
“Mmm, au taleitaka na matoke,” a kaya o Bu.
“O au talega,” a kaya o Winfred. “Oqo e dua vei ira na kakana au dau taleitaka! Au taleitaka na Jaina droka. Kei na boro kei na tomata. Ia na tikina vinaka duadua sa ikoya na kena wai.”
“Oqori e baleta na kena wai e veiwakitaki ira vata na isaluwaki me ra dua ga,” a kaya o Bu.
E rau a musumusu tiko ga na kakana draudrau. A qai cegulevu o Winfred.
“Bu,” a kaya o koya, “na cava o dau marau tu ga kina e veigauna?”
“Au dau tovolea,” a kaya o Bu. “Ia au sega ni dau marau tu ga e vei gauna taucoko. Na rarawa e dua na tiki ni bula. O rarawa tiko beka ena gauna oqo?”
A deguvacu o Winfred. “Au vakananumi Ta (Tata), baleta ni cakacaka sara tiko vakayawa. Kau vakananuma talega na vuli, baleta ni sega ni rawa na lako ivuli ena gauna oqo. Au sa nanumi ira na noqu itokani ena lotu.”
“E sega ni dua na ka kevaka eda rarawa ena vuku ni veika oqori e kaya o Jajja. Na bula ena sega ni na rawarawa tu ga. Ia ni‘u dau rarawa, au dau tovolea me‘u muria e dua na noqu ituvatuva me‘u marau kina.”
“Na nomu ituvatuva?”
“Me vaka ga e tiko na noqu icakacaka ni kakana ni mataoke, sa tiko vakakina e dua me baleta na noqu tiko marau. Ena so na gauna na rarawa e sa rui vakaitamera me na lako tani ga vakai koya. Ia vakavuqa au dau raica ni noqu ituvatuva e sa ikoya sara ga na ka au gadreva me‘u logaloga vinaka kina.”
“Na cava na nomu ituvatuva?”
A matadredredre o Bu. “Vakacava mo vaqara e dua na ituvatuva me nomu vakataki iko? Oti daru qai mai veitalanoa kina.”
Ena bogi oya ni masu o Winfred, a kila ni a vakarorogo tiko na Tamada Vakalomalagi. A vakila o koya ni masu e vakamarautaki koya! A taura e dua na tiki ni pepa ka vola, iTuvatuva ni Marau nei Winfred. 1. Masu. Sa qai mai moce yani.
Ena mataka ka tarava a wilika na nona iVola i Momani. Na wiliki ni ivolanikalou sa vakamarautaki koya talega. A kunea na nona pepa ka vola, 2. Wilika na ivolanikalou. A qai raica na ivolanikalou ni dolava tu ki na: “Vakabauti Karisito” (2 Nifai 33:10).
E kuria tale o Winfred e dua na ivakamacala: 3. Vakabauti Jisu Karisito.
E vakasamataka o Winfred na vinaka nei Bu me vakatarai koya me veisiko vua. A kunei Bu o Winfred ka kaya, “Vinaka vakalevu na nomu vakatara meu tiko vata kei iko.”
Na nona vakavinavinaka o Winfred a vakavuna na nona logaloga vinaka. A vola tale ena nona pepa. 4. Dau vakavinavinaka.
Qai tarogi ira era tiko veivolekati o Winfred ke ra rawa ni mai qito o ira na gonelalai sobu. A kauti tacina lailai mai, o Milfred, kei na ganena lailai, o Alfred. Ni ra sa qito oti, a sureti ira na gone me ra wilivola vata kei koya. A qai musuka o Bu e dua na meleni me ra wasea vata.
E muri a qai gole o Winfred me laki sikovi nona itokani ka yacana o Happy. E rau a savata vata na iyaya ni kana nei tinai Happy. E rau a qai taviraka na vuloa. Sa ka ni lasa dina me veivuke!
Ni toro mai na yakavi, a vukei rau na tacina o Winfred ena nodrau vuli lesoni. A vulica na cavu matuavosa kei Milfred. A vukei Alfred ena nona fika.
Ena bogi oya, a veitalanoa tale kei Bu o Winfred.
“Sa vinaka sara na noqu bula ena siga nikua! Au nanuma ni‘u sa kunea na noqu ituvatuva ni marau.”
“Wananavu! Tukuna mada vei au,” a kaya o Bu.
“iTuvatuva ni Marau nei Winfred,” a wilika. “1. Masu. 2. Wilika na ivolanikalou. 3. Vakabauti Jisu Karisito. 4. Dau vakavinavinaka.”
“Oqori e dua na ituvatuva ni marau totoka,” a kaya o Bu. “Ia au nanuma ni o rairai guilecava e dua na ka. Na cava tale a vakamarautaki iko nikua?”
A vakasama vakalailai o Winfred. “Io, au a marautaka na noqu a qito vata kei ira na gonelalai. Ka vukei Happy kei na tinana. Ka vuli lesoni vata kei Milfred kei na Alfred. Wawa … sa ikoya saraga oya! Na vukei ira na tani sa ikoya na iotioti ni isaluwaki.”
“Sa donu vinaka,” a kaya o Bu. “Na veiqaravi vei ira na tani sa vaka na wai ni kakana—sa veiwakitaki ira na veika vinaka kece me ra dua ga.”
“Sa dua na ituvatuva vinaka oya.” A sigege ga o Winfred. “Au vinakata meu na tovolea tale ni mataka.”
Nai talanoa oqo e yaco mai Kampala, Uganda
Droini mai vei Hollie Hibbert