Ti se Wainimaqo?
O dauvolaivola e vakaitikotiko e Kalifonia, Amerika.
Na italanoa oqo a yaco mai Taiwan.
“Na cava o sega kina ni via gunu ti?” A taroga o Jiro.
”Me da dina” (iVolanisere ni Gonelalai, 81).
A taubale sobu o Chung ena dua na gaunisala osooso mai Taiwan. Na nona itokani o Jiro a taubale voleka toka e yasana. Era a tu na tamata e veiyasana kecega! O ira na dauvolivoli era a vakasaqara na isulu sau rawarawa, era a qito na gone, ka ra vakusakusa na tamata e yasadrau ni ra vosa tiko ena nodra talevoni. A taura matua o Chung na nona kato ni vuli me vakadeitaka ni na sega ni vakalutuma.
“Au sega saraga ni vakabauta ni sa voleka ni mai cava na yabaki ni vuli!” E a kaya vakadomoilevu o Chung me rawa ni rogoca o Jiro.
“Au kila! Au sa vakarau tu meu vakacavara na kalasi,” a kaya o Jiro.
O Chung kei Jiro e rau a lako sivita na veivanua ka volitaki kina na veimataqali kakana kecega. Na vuanikau na drekoni kei na beri. Na bani lalai vakautona katakata. Na aisikirimu ologi vata kei na pinati. Na iboi kamikamica e a tu ena veivanua kecega! Ia o Chung na ka ga a vakasamataka tu sai koya na katakata kei na drakidrakita a vakila tiko.
“Au vakila ni vaka meu tiko ena loma ni dua na lovo!” A kaya o Chung.
“O au talega,” a kaya o Jiro. “Me daru volia mada e dua na ka me daru gunuva.”
E rau a gole yani ki na dua na vanua ka volitaki kina na gunu duiroka.
A ucuna mai o Jiro eso na ilavo. “Rua na bilo ti boba, yalovinaka.”
E kila o Chung ni gunu ti e vakatabui ena Vosa ni Vuku. “Vakaevei, e rawa beka ni dua ga vei au na bilo wainimaqo?” a taroga.
A vuki o Jiro me raici Chung. E a veilecayaki o Chung. Ena nanuma beka o Jiro ni o koya e duatani baleta ni sega ni gunu ti?
E a solia mai na marama oya e dua na bilo ti boba batabata vei Jiro kei na dua na bilo wainimaqo vei Chung. E rau a qai lesu tale na cauravou ki na salatu ka gole yani ki na nodrau dui itikotiko.
E a gunuva o Jiro na mena gunu. “Na cava o sega ni gunu ti kina? E sa gunu vinaka dina!”
A katia na tebenigusuna o Chung. “A, au sega ni dau gunu ti.”
“Baleta na cava?”
A vakasamataka o Chung se na sauma vakacava na taro oya. E rau a vakavulici koya na daukaulotu me baleta na Vosa ni Vuku. Ena nona kalasi ni Lalai a vulica ni talairawarawa ki na Vosa ni Vuku e vukea me tiko vata kei koya na Yalo Tabu.
“Au vakabauta na Kalou, ka vinakata o Koya meu maroroya na yagoqu. E kerea o Koya me da kakua ni gunu ti se kofi se gunu ni veivakamateni taki,” a kaya o Chung.
“O kila vakacava na ka o ya?” A taroga o Jiro.
“Au vulica mai valenilotu.”
A tgunuva tale vakadua na mena gunu o Jiro. “Oqori e vaka me ka sesewa. E ti walega! Ena sega ni ca vei iko.”
Na kete i Chung a vaka me ra veiladeyaki tu kina na boto. E rawa vakacava me vukei Jiro me kila vakavinaka? Ena rawa beka vua e dua na lewenilotu me vukei koya me vakamacalataka vei Jiro.
“O na rawa beka ni mai lotu vata kei au ena dua na gauna? Au lotu tiko ena Lotu i Jisu Karisito ni Yalododonu Edaidai. E rawa ni o vulica na veika me baleta na Kalou kei Jisu Karisito.”
A vakasama vakalailai o Jiro. “Au sega ni nanuma ni vakakina.”
“Donu,” a kaya o Chung. A loma bibi vakalailai ni a sega ni vinakata o Jiro me lako vata kei koya ki lotu. Ia a marau ga o koya ni sa wasea rawa na nona ivakadinadina.
Ena mua ni macawa oya, e koronivuli, o Mr Lin, na qasenivuli nei Chung, a kerea me ra vakatudaliga na lewe kece ni kalasi. “Ni mataka sa na iotioti ni siga ni kalasi. Me vaka ni o ni a cakacaka vakaukauwa kece ena yabaki oqo, e dua na ka au via vakidacalataki kemuni kina. Eda sa na gunu ti boba taucoko!”
Era a kaila na lewe ni kalasi taucoko. O ira kece ka vakavo ga o Chung. A dabe sobu vakamalua ena nona idabedabe. Na kena tukuni vei qasenivuli ni sega ni gunu ti ena dredre cake mai na nona a tukuna vei Jiro! Era na nanuma taucoko ni duatani, me vaka a yaco vei Jiro.
A laveta cake na ligana o Jiro. “Mr. Lin? O Chung e sega ni dau gunu ti. E tiki ni nona Lotu. E rawa beka ni dua ga vua na bilo wainimaqo me kena isosomi?”
A vuki vei Chung o Mr. Lin. “E dina beka oya, Chung?”
A deguvacu o Chung.
A matadredredre o Mr. Lin. “DONU. Au na volia vei iko na wainimaqo me kena isosomi.”
Ni oti na vuli, erau a taubale vata ki vale o Chung kei Jiro. “Vinaka vakalevu na nomu vakayacora oya,” a kaya o Chung.
A matadredredre o Jiro. “O iko o noqu itokani. Kevaka e dua na ka e bibi vei iko, ena bibi vaka talega kina vei au.”
Droini mai vei Melissa Manwill