Mauaina o le Filemu
“Faamolemole fesoasoani mai ia ou le lagonaina le tuuatoatasi.”
Sa taumafai Molly e ‘aua le tagi a o ia faatofa atu i lona uso, o Macy. “Ou te alofa ia te oe!” na fai atu ai Moli. Sa ia matuai fusi ia Macy.
“O le a ou vaai ia te oe i ni nai masina,” o le tala lea a Macy. Ua tuua nei e Macy le fale e alu i le kolisi. O se tasi o tuagane o Molly ua toesea i le kolisi. O lona tuagane matua sa i ai i se misiona. O le a matuai misia lava e Molly i latou uma!
Na oomi e Tina le lima o Molly. Sa la vaai atu a’o malaga ese atu Macy. “O le a tatou misia o ia,” o le tala lea a Tina. Sa i ai loimata i ona mata.
Sa toe savali atu Molly i totonu o le fale. Sa alu o ia i le potu gaogao o Macy ma tapuni le faitotoa. Ona ia nofo lea i luga o le moega o Macy ma amata ona tagi.
Sa tu’itu’i mai se tasi i le faitotoa. Na o mai i totonu Tina ma Tama. Sa la fusiina Molly. Sa latou saofafai faatasi i luga o le moega o Macy seia oo ina matu loimata o Molly.
“Ou te iloa ua e faanoanoa ua leai Macy,” o le tala lea a Tama. “Aisea tatou te le faia ai se tatalo faaleaiga? E mafai ona tatou ole atu i le Tama Faalelagi e fesoasoani ia i tatou ia maua se lagona lelei. Faamolemole Molly pe mafai ona e tatalo?”
“Ua lelei.” Sa punou le ulu o Molly. “Tama Faalelagi, matou te faafetai atu i Lau Afio mo tagata uma o lo matou aiga—mo Will, Parker, Macy, a’u, ma Tina ma Tama. Matou te faafetai atu i Lau Afio ona ua mafai ona avea i matou o se aiga e faavavau Faamolemole fesoasoani mai ia matou lagona le mafanafana. Ma fesoasoani mai ia ou le lagonaina le tuuatoatasi.”
Na misia e Molly le talanoa atu ia Macy i le taimi e moe ai. Ae sa ia iloaina sa faafofogaina e le Tama Faalelagi ana tatalo. Sa ia iloa o le a Ia fesoasoani ia te ia ia maua se lagona lelei.
O le taeao na sosoo ai, sa matuai filemu lava le fale o Molly! Sa ia misia le talie ma Macy a o la sauni mo le aoga. Sa ia misia le aai faatasi i le taeao ma talanoa. O nisi taimi sa ta‘u atu ai e Macy ia te ia e uiga i mea sa ia aoaoina i le seminare. Sa lagona pea e Molly le toafilemu ina ua la talanoa e uiga i le talalelei.
O lena la! Sa iai le manatu a Molly.
Sa sauni Molly mo le aoga. Ona ia maua lea o Tina.
“Talofa, la’u pele.” Sa fusi mau o ia e Tina. “Ua e sauni mo le aoga?”
“E mafai ona tatou faitauina faatasi se lauga o le konafesi ae ou te le’i alu?” O le fesili lea a Molly. “Ou te manatu o le a fesoasoani ou te maua ai se lagona lelei.”
Na ataata Tina. “O se manatu lelei lena.”
Sa latou auauai e faitau se lauga o le konafesi aoao e uiga i le mafanafana. Sa fiafia Molly e faaalu lona taimi ma Tina. Sa manaia le lagona e faitau faatasi ma ia le lauga.
Ina ua uma, sa ataata Molly. “Tatou toe faia le mea lea!”
Sa ia misia pea Macy, Will, ma Parker. Ae sa ia lagonaina sina le tuuatoatasi. Sa talia lana tatalo! E mafai ona ia faaaluina le taimi ma lona tina ma lona tama. Ma o upu a perofeta e mafai ona fesoasoani ia te ia e maua ai le filemu.
Ata na tusia e Liz Brizzi