O Le Taufaavalea i le Uila
Na fai mai ana uo o le a malie. Ae sa le’i i ai se lagona sa‘o.
Sa vili e Sam lana uila i le vave na te mafaia ai i luga o le mauga. Sa ia faalagolago atu i luma. Sa pa le ea i lona lauulu. Sa vilivae atu lana uo o Liam i ona autafa.
“Ua amata ona e lelava?” Na fai atu ai Liam.
“E leai!” Na fai atu ai Sam.
Ua leva ona i ai le la uo o Eric i le paka i le tumutumu o le mauga.
“Komm schon! O mai!” sa ia ee atu ai.
Na taunuu Sam ma Liam i le tumutumu o le mauga. Sa paka e tama a la uila ma saofafai i lalo o se laau.
Sa piki i luga e Liam se maa ma togi. “Ua ou le fiafia.” Sa le’i tele ni nofoaga e o i ai i lo latou tamai nuu i Switzerland.
“E faapena foi a’u,” o le tala lea a Eric. Sa ia tosiina le palapala i se laau.
“E mafai ona ta tietie pea,” o le tala lea a Sam.
Sa faanunumi foliga o Liam. “Pau lava lena o le mea tatou te faia.”
“Tatou faia se mea malie!” Sa fai atu ai Eric. Sa ia oso i luga ma savali atu i le fata uila, lea sa paka ai le tele o uila. Sa mulimuli atu Sam ma Liam ia te ia.
Sa lagona le fufusi o le manava o Sam. O nisi taimi o le mea na manatu Eric ma Liam e malie e le malie ia te ia. Sa fiafia Eric ma Liam e taufaalili i isi tamaiti ma fai atu ni tala le faaaloalo i le vasega. Ae atonu o le a ese lenei taimi.
E le gata i lea, sa le toatele ni tama i le vasega a Sam. Ana faapea latou te le uo ma Eric ma Liam, o ai o le a faauo i ai o ia?
“Tatou aveesea tapuni mai pa’u uma,” na musumusu atu ai Eric. “E mafai ona tatou nanaina i tafatafa o le laau.” Sa ia tootuli i lalo i se uila mumu iila ma tatala se tamai tapuni palasitika mai se tasi o pa’u.
Sa ata Liam. “Ioe! O le a malie tele lena mea.”
Sa mapuea Sam. Leai. Ae o le taimi lenei sa le’i ese. Sa ia tali mai, “Ou te le iloa.” “Tatau na tatou o.”
Sa tulei e Eric le lima o Sam. “Ao, fai ia!” o lana tala lea. “E leai se tasi o tilotilo mai.”
“Ua na o ni nai vaega laiti,” o le tala lea a Liam. “E leai se tasi o le a maitauina ua leai ni mea.”
Sa taumafai Sam e aua le amanaiaina le lagona ma‘i i lona manava. O le aveeseina o tapuni o pa’u o le a le faaleagaina ai uila. Sa faamimigi ona tauau ma lue atu lona ulu.
Sa vave ona aveese uma e tama e toatolu ia tapuni mai pa’u o uila ma toe taufetuli atu i le laau. Sa latou nanaina tapuni uma i lalo o se maa ma saofafai i lalo e matamata i uila. Sa talie Liam ma Eric.
E le’i umi ae savali mai i luga se tamaloa, tatala lana uila, ma tietie ese atu.
“Vaai laia? Na te le’i maitauina lava,“ o le tala lea a Liam.
Ae sa ou iloaina, o le manatu lea a Sam.
O le vaega o totoe o le aso, sa le mafai ona taofia le mafaufau o Sam e uiga i tapuni. Sa moomoo o ia maimau pe ana mafai ona ia toe faafoi maia i latou, ae sa leai se auala e maua ai i latou e ogaina ia uila. Sa ia tootuli i lalo ma ta‘u atu i le Tama Faalelagi e uiga i ai.
“Ou te lagona le leaga,” o le tala lea a Sam. “Maimau pe ana ou le faia. Faamolemole faamagalo mai ia te a’u, Tama Faalelagi.”
O le aso na sosoo ai, na toe tietie atu ai Sam ma ana uo i a latou uila i le paka.
Sa toe fai mai foi Eric, “Tatou o e ave tapuni!”
Sa toe ata foi ia Liam.
Sa manatua e Sam lana tatalo. Ma o le taimi lea, sa ia lagonaina sina toa laitiiti.
“Ou te manatu e le tatau ona tatou faia,” o lana tala lea.
“Aisea?” Sa fai atu ai Liam, ma faanonou. “E leai se tasi na maitauina ananafi.”
“Ou te le manao i se tasi e faaleagaina la’u uila,” o le tala lea a Sam. A o le’i mafai ona tali mai se tamaitiiti, sa oso o ia i lana uila. “Tatou taufetuli atu i le fale-tao-falaoa!” sa ia ee atu ai. Ona amata lea ona ia vili televave i le vave na te mafaia.
Sa uu mai foi e Eric ma Liam a la uila.
“E le fea! Na e vave amata,“ o le valaau lea a Liam.
Sa ataata Sam a o taufetuli atu ana uo ia te ia. Sa ia musumusu atu se faafetai i le Tama Faalelagi. Sa lelei atili ai ona lagona.
Ata na tusia e Shane Clester