O Paionia i Atunuu Uma
Piano a Ludovic
Sa fiafia Ludovic e auauna atu i le Tama Faalelagi.
Sa piki i luga e Ludovic ni nofoa ua uma ona faamoe ma aveina i le isi itu o le auala. O le Aso Sa, ma e le o toe mamao ona amata lea o le lotu. O le fale sa fai ai le latou lotu i Togo sa le’i lava ni nofoa. O lea na aumai ai e Ludovic nofoa mai le fale a lona tamamatua.
“Aisea o le a e tuua ai se lotu manaia e alu i se tamai fale?” na valaau atu ai se tasi ia te ia. “E leai foi ni nofoa uumi o lau lotu!” o le tala lea a se isi tagata, ma ata.
Sa faafoliga Ludovic e le faalogo. E tatau lava ona ou faia pea le mea sa’o, sa ia mafaufau ai.
Sa muai a’oa’o Ludovic e uiga i le Ekalesia ina ua 10 ona tausaga. O lea la ua 12 ona tausaga. Sa papatisoina o ia ma lona aiga talu ai nei. Sa ia umia le perisitua ma fesoasoani e tufa le faamanatuga. Sa ia sefeina foi nisi o ana tupe o le taumafataga o le aoauli e faatau ai le falaoa mo le faamanatuga i vaiaso taitasi. Sa fiafia Ludovic e auauna atu i le Tama Faalelagi.
Ina ua oo i le taimi e amata ai le lotu, sa tumu le potu laitiiti. O nisi tagata sa saofafai i nofoa na aumai e Ludovic. Sa tutu isi tagata.
Sa amata le fonotaga i se pese. Sa pese Ludovic, “Isaraelu, Ua Valaau Mai le Atua.” E fiafia o ia e pese i le lotu.
Ina ua tuua le lotu, sa hamu Ludovic a o ia tuueseina nofoa. Sa hamu o ia a’o savali i le fale. Ona oso a’e lea o sona manatu! Sa ia aumaia i fafo lana piano meataalo. Atonu e mafai ona ia fuafua pe faapefea ona ta le “Isaraelu, Ua Valaau Mai le Atua”!
Sa hamuina e Ludovic ia nota ma ta ki eseese seia oo ina sa‘o. E le’i umi ae ia aoaoina o ia lava e ta le pese atoa.
Ona ia manatua lea sa i ai i lona aiga ni pu‘ega o viiga a le Ekalesia. Sa ia faalogologo ia i latou ma aoao foi e ta isi pese. Sa faataitai ma faataitai Ludovic.
“Aisea e te le ta piano ai i le lotu a o matou usuina le pese?” Sa fesili le tama o Ludovic i se tasi aso.
Sa taavili le manava o Ludovic. “Ou te matamuli tele,” o lana tala lea. “Ae faapefea pe afai ou te sasi?”
“Ona faaauau ai lea ona e tata,” o le tala lea a Tama. “O oe o se ta piano e sili atu nai lo le mea e te mafaufau i ai.”
O le Aso Sa na sosoo ai, sa le’i aveina e Ludovic na o ni nofoa. Sa ia aveina foi lana piano meataalo i le lotu. Ina ua oo i le taimi mo le pese amata, sa ia tuuina ma le popole ona tamailima i luga o ki. Ona amata lea ona ia ta. Sa pepese faatasi tagata uma. Ma sa matuai manaia lava!
Sa tata Ludovic i le lotu i Aso Sa taitasi ina ua mavae lena Aso. O nisi taimi e sasi ai o ia. Peitai e le’i fiu o ia. Ina ua faigata tele ona tata le pese, sa latou usuina e aunoa ma le piano, ma sa taitaia e Ludovic le musika.
Sa ataata Ludovic. E le’i afaina ia te ia le faia o le latou lotu i le fale o se isi tagata. E le’i afaina pe na ulagia o ia e tagata. O le mea na taua o le faaaogaina e Ludovic o ana taleni e auauna atu ai i le Atua.
O Togo o se atunuu laitiiti i Aferika i sisifo.
O le asō, e 21 uarota ma paranesi iina.
O le gagana aloaia a Togo o le faaFarani.
Sa aoao e se faifeautalai ia Ludovic e faitau musika ina ia mafai ona lelei atili atu lana taina o le piano.
Ua matua Ludovic i le taimi nei. O ia ma lona faletua, o Benedict, e fiafia uma i musika.
Ua ia Ludovic se piano moni i le fale ma e taina le okeni i le lotu.
Ata na tusia e Caroline Garcia