Keke ma le Agalelei
E mafai faapefea ona agalelei Juli i le uso o lona tina pe a tau le mafai ona ia talanoa ia te ia?
Sa saofafai Juli ma lana uo o Sara i le potu ‘ai i le aoga.
“Ou te popole i le alu i le fale ma vaai i la’u tía,”o le tala lea a Juli.
“O oe tía?” Na fesili ai Sara.
“Ioe, le uso a lo‘u tina. Tía Jenny,“ o le tala lea a Juli. “O loo asiasi mai o ia mo sina taimi. Ma ou te manatu e le fiafia tele o ia ia te a’u. E matuai sa’olele lava o ia, ma e le ataata lava o ia. E tusa lava pe ou te ataata atu ia te ia. Ou te le fia manao e faaita ia te ia.”
“O le mea sili e te ataata ai,” o le tala lea a Sara. “O le agalelei e fesoasoani i taimi uma.”
I le aso atoa sa mafaufau pea Juli e uiga i le tala a Sara.
Ou te matea e mafai ona ou lelei atili ia Tía Jenny, sa ia mafaufau ai. O le mea lena o le a faia e Iesu. Ae sa na o le faaSipaniolo na tautala ai Tía Jenny. Sa mafai ona malamalama Juli i sina faaSipaniolo, ae sa le mafai ona ia tautala lelei. E mafai faapefea ona agalelei Juli i le uso a lona tina pe a tau le mafai ona ia talanoa ia te ia?
E masani lava ona fai atu Tina ia onosai i tagata e te le malamalama i ai. Sa tatalo filemu Juli. Tama Faalelagi, faamolemole fesoasoani mai ia te a’u ia ou onosai ia Tía Jenny. Ma fesoasoani mai ia ou maua le lototele e talanoa ai ma ia i le faaSipaniolo.
Ina ua taunuu Juli i le fale mai le aoga, sa ia vaaia se kata i luga o le laulau. Sa ia pikiina i luga. Sa mo Tina ma Tama. Oi leai! o lou mafaufau lea. O le asō o lo latou aso faamanatu. Ua matuai galo lava ia te a’u!
Sa manao Juli e fai se mea manaia mo Tina ma Tama. Sa ia le iloa po o le a le mea a fai.
Sa ia vaaia Tía Jenny o tilotilo solo i le umukuka.
“Oi … todo bien?” Sa fesili atu ai Juli. “Pe o lelei mea uma?”
“Ioe,” o le tala lea a Tía Jenny. Ona ia vave tautala lea i le faaSipaniolo. Sa faalogo Juli o ia fesili atu pe o ia ocupada—pisi.
“Leai, yo leai … ocupada. Ou te le’o pisi,“ o le tala lea a Juli. Sa ia lagona le maasiasi i le faaaogaina o lana faaSipaniolo le atoatoa. Ae sa ataata Tía Jenny. Sa tautala lemu atu o ia ina ia mafai ona malamalama Juli. Sa fai mai o ia, sa manao o ia e fai se keke mo le aso faapitoa o le faamanatuina o tausaga faaipoipo o Tina ma Tama, ae sa ia manaomia se fesoasoani.
“O le a ou fesoasoani ia te oe!” Na fai atu ai Juli. “Vamos! Ta o.” O lona avanoa lenei e faia ai se mea mo Tina ma Tama! Ma ia faamasani i le uso a lona tina.
Sa o atu Tía Jenny ma Juli i le umukuka. Sa la faaaogaina taga o lima ma le faaSipaniolo faigofie e talanoa ai. Sa faaali atu e Tía Jenny ia Juli le auala e fai ai se keke sukalati-vanila. Sa fesoasoani Juli e fua le falaoamata ma le suka. Sa ia tipitipia foi strawberries e alu i luga. E le’i umi ae i ai le keke i le ogaumu. Sa manaia lona manogi mai!
O se mea malie tele lena mea, sa mafaufau ai Juli. Ae, a o ia tapenaina, sa leua ia te ia ni fuamoa se tolu mai le fata. Sa pauu i luga o le foloa ma leaga ai le foloa i se mesi lanu samasama.
Sa tilotilo atu Juli ia Tía Jenny ma le popole. Mata o le a ita o ia?
Ae sa ata lava Tía Jenny. “Qué desorden!” o lana tala lea. (“Oka se mesi!”)
E le’i vaai lava Juli ia Tía Jenny o ata. Sa ata foi o ia. Sa la faamamaina faatasi le mea sa leaga.
Ina ua taunuu Tina ma Tama i le fale, sa saunia le keke. “Manuia le aso faapitoa!” Na fai atu ai Juli.
“Faafetai! E foliga manaia lenei keke. Pe na e faia e oe lava ia mea uma?” O le fesili lea a Tina.
“Leai, sa ma tuufaatasia ma Tía Jenny,” o le tala lea a Juli. Sa ataata atu o ia ia Tia Jenny. Ma o le taimi lea, na ataata atu ai Tía Jenny!
Sa faatumulia lona loto i se lagona mafanafana. Sa ia faafetai na tali mai e le Tama Faalelagi lana tatalo.
Ata na tusia e Malgosia Piatkowska