Man we i raetem i You

Go Sidaon kolosap long Hem

Sierra F., i gat 12, Yuta, YSA

Wan dei long skul, mi bin harem abaot wan boe we oli stap mekem nogud long hem. Mi filim se mi no glad. I no stret blong tritim wan man long wei ia.

Afta long dei ia, klas blong mifala i gat wan pati. Boe ia we oli stap mekem nogud long hem long taem ia, i kam long pati mo stap sidaon hem wan. Taem mi luk hem, mi tingbaot wanem i bin hapen. Mi harem wan voes i talem long mi blong go mo sidaon kolosap long hem. Be mi no wantem blong mi wan nomo mi go sidaon wetem hem. Bae hem i oraet, mi stap tingting. Hem i no nidim wan man blong sidaon narasaed long hem. Mi pusumaot filing ia.

Voes ia i kam long mi bakegen, i kam moa strong. Go sidaon wetem hem.

Mi lukluk long boe ia. Hem i no glad mo i stap hem wan. OKEI, Mi stap tingting. Taem mi sidaon wetem hem, mi luk se hem i no filim gud. Mi talem nem blong mi long hem mo askem hem abaot hemwan. Fastaem, mi stap fraet. Be taem mitufala i stat blong toktok, mi filim pis. Mo hem i nomo stap hem wan o harem nogud bakegen.

Taem hem i mas gobak long klas, mi talem long hem se bae mi toktok long hem afta. Hem i smael smol mo talem se OKEI. Tija blong mi i kam long mi mo talem, “Tangkyu, Sierra. Hemia i kaen.” Mi sakem hed blong mi blong agri.

Dei i pas hariap, be filing ia blong pis i no go. Mi save se mi bin mekem wan raet samting. Samtaem ol pipol oli no tritim gud olgeta taem oli defren. Mi no laekem, be i hapen.

Yumi evriwan i ol pikinini blong God. Yumi mas tritim ol narafala man wetem kaen fasin. Sapos yumi mekem hemia, mi save God bae i blesem yumi.

Pikja droing i kam long Kristin Sorra