Ol Tim mo Talen
Ol bes tim oli wok tugeta mo oli helpem wanwan long olgeta blong kam moa gud.
“!Ron, Jillian, ron!” Papa i singaot. Papa blong Jillian i koj blong futbol tim blong hem. Olgeta i bin stap praktis moa had blong rere from jampionsip gem. San i bin hot tumas be Jillian i gohed blong stap ron.
Long en, Papa i blo wesil. “OK, yumi spel smol.”
Jillian i holem wota botel blong hem mo sidaon long ples blong sidaon wetem ol boe. Hem nomo i wan gel long tim, be hem i no wari. Evriwan oli wok tugeta mo helpem wanwan long olgeta blong kam moa gud. Nomata we hem i taet mo swet, hem i filim glad blong plei wetem tim blong hem.
“?Papa, yumi mekem i gud tedei?” hem i askem.
Papa i smael. “!I gud tumas! Mi ting se tim i rere from gem.”
Jillian i smael i gobak. !Ol hadwok blong olgeta i no blong nating!
Long rod i gobak long haos afta long praktis, Jillian i luk fren blong hem Mei. Tufala i bin stap long semmak klas long Praemeri. Be Mei i no bin kam long Praemeri klas blong samtaem.
Jillian i smael long Mei. “!Halo, Mei! Mi misim yu long Praemeri. ?Yu yu oraet?”
Mei i lukluk daon long ol sus blong hem. “ Mama blong mi i no wantem go long jos.”
“?Olsem wanem?”
“Mi no save.” Meli i leftemap hed blong hem. “Oraet, mi mas go nao.”
Jillian i sakem han mo wajem Mei i wokbaot i go. ?Olsem wanem nao mi save helpem Meli? hem i tingting.
Taem Jillian i kasem haos, hem i plei sam long ol Praemeri singsing long yukalele blong hem. Hem i invaetem ol brata blong hem blong singsing wetem hem. Oli singsing kasem taem we mama i singaotem olgeta blong dina.
“Bae mi go visitim Sista Aurea tumoro,” Mama i talem.
“?Sista Aurea i mama blong Mei, sapos mi raet?” Jillian i askem. “?Mi save go wetem yu?” Mei i nomo stap kam long Praemeri. Mo taem mi luk hem tedei, mi luk se hem i no hapi.”
“Hem i oraet, yu save kam,” Mama i talem.
“!Bae mi karem yukalele blong mi wetem mi! Mi save plei ol Praemeri singsing. Mi sua se hem i misim blong singsing long olgeta,” Jillian i talem.
Taem oli go long haos blong Mei long nekis dei, Jillian i givim Mei wan bigfala hag. Taem ol mama blong tufala i stap toktok, tufala gel i go aotsaed. Jillian i plei yukalele blong hem, mo Mei i jusum ol singsing. Tufala i gat wan gud taem blong laflaf mo singsing tugeta kasem taem hem i taem blong Jillian i gobak.
“Hem i gud blong luk yu” Jillian i talem. “Mifala i misim yu long Praemeri.”
“Yes, mi wantem tumas blong save kam. Ating bae mi askem mama blong mi bakegen.”
Long nekis Sandei, Mei i stap long jos. Jillian i sidaon long saed blong hem. “Mi glad tumas se yu save kam,” hem i talem.
Mei i smael. “Mi tu.”
Sam dei afta, hem i taem blong bigfala futbol gem. Jillian i askem tim blong talem wan prea bifo gem i stat. Naoia i taem blong plei. Jillian i ron hariap olsem we hem i save mekem. Hem i wok wetem tim blong hem blong karem balong blong skorem gol. !Tim blong Hem i winim gem!
Long naet ia taem hem i stap ledaon long bed blong hem, Jillian i stap tingbaot Mei mo futbol tim blong hem. Hem i glad blong stap olsem pat blong wan tim, semmak olsem we hem i glad blong stap olsem pat blong Praemeri. Olgeta evriwan i helpem wanwan long olgeta. Jillian i glad blong save helpem ol fren blong hem, long jos o long fil.
Ol pikja droing i kam long Marcos Calo