Niu Tim blong Samuel
?Bae ol narafala boe oli givim wan janis long hem?
Hem i Satedei eli moning. Samuel i sidaon long kijin tebol mo stap lukluk bol blong seriel blong hem. Hem i no filim blong kakae.
“Papa?” hem i talem kwaet. “Mi mi jenisim maen blong mi. Mi no wantem mit wetem basketbol tim blong mi tedei.”
“Mi save hem i had blong stap olsem wan niufala pikinini, be bae yu gat ol fren,” Papa i talem.
“No, i no hemia nomo … Mi wari long olsem wanem bae oli tingting long mi.”
Papa i sidaon narasaed long hem. “?Yu stap minim se yu stap tingting long wanem tim blong yu bae tingting long yu olsem wan niufala pleya we i gat wan han nomo?”
Samuel i bon be i no gat lef han. Lef han blong hem i finis nomo long res.
“Yes,” Samuel i talem. “From we oli no save mi, maet bae oli ting se wan pikinini we i gat wan han nomo, i no save plei basketbol.”
“Olgeta i maet gat tingting olsem, be yu yu wan gudfala pleya. Mo blong stap go long praktis bae i helpem yu blong save plei moa gud,” Papa i talem wetem wan smael. “!Kam ia. Karem set blong basketbol mo botel wota blong yu. Bae yumitu go mitim tim blong yu.”
Samuel i pulum win. “Okei.”
Taem tufala i go insaed long ples blong eksasaes, koj i wokbaot i kam mitim tufala.
“!Halo! Mi mi Koj Monroe. Yu ia nao niufala pleya blong mifala.”
“Yes, mi mi Samuel.”
“Mifala i glad tumas blong gat yu long tim blong mifala,” Koj Monroe i talem. “Bae yumi go mitim ol narafala boe.”
Papa i sidaon long ples blong sidaon. Samuel i karem balong blong hem mo folem koj.
“Mi wantem introdiusum Samuel, niufala pleya blong yumi,” Koj Monroe i talem. Sam long ol boe oli sakem han long Samuel. “Yumi laki blong save gat hem long taem blong fes gem blong yumi. !Mi ting se bae yumi gat wan gudfala tim, wan gudfala gem, mo wan gudfala sesen!”
Koj Monroe i blo wesil, mo tim i statem sam praktis. Samuel i luk sam long ol tim memba blong hem oli stap lukluk hem taem i stap yusum raet han blong hem nomo blong sakem mo kilkilim balong. Hem i traem blong no letem hemia blong pulumaot tingting blong hem.
Long taem blong spel mo dring wota, wan boe i sidaon narasaed long Samuel long ples blong sidaon. “Halo, mi mi Jackson. ?Wanem i hapen long han blong yu?”
“I no gat samting. Mi bin bon olsem ia,” Samuel i talem.
“Mi neva luk wan man we i gat wan han nomo we i plei bol bifo,” Jackson i talem. “Yu yu mekem gud tumas.”
Samuel i smael. “Tangkyu.”
Koj Monroe i blo wesil blong hem bakegen. “Blong las 30 minit, bae yumi plei wan praktis gem.” Hem i putum ol boe i go long tu tim. Samuel i glad se Jackson i stap long tim blong hem.
Wetem wan minit nomo we i stap bifo gem i finis, tugeta tim i gat semmak namba blong poen. Wan long ol fren long tim blong Samuel i holem balong mo lukluk raon blong pasem long wan narawan. Samuel i stap kolosap, i rere blong holem balong. Be i no pasem long hem mo i pasem i go long Jackson.
Jackson i tekem sam step. Afta i luk Samuel mo pasem balong long hem. Samuel i kasem balong, i tanem hem, mo sakem balong i go long basket.
!Swis! Balong i go insaed long semmak taem we Koj Monroe i blo wesil. Tim blong Samuel oli singsingaot.
“Yu mekem gudfala pas,” Samuel i talem long Jackson taem tufala i wokbaot i go blong sidaon.
“Naes sut,” Jackson i talem. “Ol narafala boe bae oli lanem se wan han nomo i naf blong plei basketbol.”
Samuel i smael mo hem mo Jackson i hae faef. Hem i gat wan filing se Koj Monroe i raet. Bae yumi gat wan gudfala tim, wan gudfala gem, mo wan gudfala sesen.
Pikja i kam long Sandra Eide