Ol Paeonia long Evri Ples
Hariet I Mitim Ol Misinari
?Bambae hem i save stap wetem Papa bakegen?
Hariet i lukluk pikja blong Papa long wol. Hem i eit manis finis i pas long taem we hem i ded. Hem i stap tingting se bae hem i save luk hem bakegen. Hem i misim hem bigwan.
Noknok, noknok, noknok.
Hariet i openem doa blong smol apatmen blong olgeta. Tu yang man i stanap aotsaed.
“Guten Tag! !Halo! Mi tufala i ol misinari blong Jos Ia blong Jisas Kraes blong Ol Lata-dei Sent. Mi tufala i glad blong toktok long famli blong yu abaot Jisas Kraes.”
Hariet i smael. Wan samting abaot wanem we tufala i talem i mekem hem i filim gud insaed. “Bae mi askem Mutti (Mama).”
Hariet i faenem Mutti. “Ol misinari oli stanap long doa,” Hem i talem. “Tufala i wantem blong toktok long yumi abaot Jisas.”
Mutti i mekem fes blong hem i nogud. “Talem long tufala se yumi nogat taem.”
“Be tufala i naes nomo,” Hariet i talem. “Bae i no tekem long taem.”
Mutti i lukluk klok. “I stret. Blong smol minit nomo.”
Tufala misinari i kam insaed mo toktok wetem Mutti, Hariet, mo Sista blong Hariet, Carmen. Tufala i tokbaot Jisas mo wan buk we oli singaotem das Buch Mormon, Buk blong Momon Afta tufala i givim famli blong Hariet wan kopi blong buk ia blong ridim.
“Mi ting se bae mifala i ridim sam pej,” Mutti i talem, mo i openem buk. Ova long ol nekis dei, Mutti i gohed blong ridim mo ridim buk ia. Hem i ridim sam pat laod long Hariet mo Carmen.
Mi wantem se Papa bae save ridim buk ia. Bae hem i laekem, Hariet i tingting.
Taem ol misinari oli kambak, oli tijim abaot plan blong God. “Yumi stap wetem God bifo yumi bon i kam long wol. Yumi kam long wol ia blong lanem abaot Hem mo blong kam olsem Hem. Taem yumi ded, yumi save go stap wetem Hem bakegen.”
?Be olsem wanem long Papa? Hariet i askem.
Ol misinari i luk Hariet. “From we Jisas i ded mo laef bakegen, yumi save stap wetem famli blong yumi blong taem we i no save finis. Iven wetem ol famli we yumi lavem we oli ded.’’
Hariet i filim wan filing blong hop. !Hem i save stap wetem Papa bakegen! Mutti i smael bigwan tu—wan smael we hem i no bin mekem blong wan long taem.
Hariet, Mutti mo Carmel i gohed blong lanem ol samting long ol misinari. Oli bin go long jos. Hariet i kam fren wetem wan naes boe we nem blong hem Dieter.
Naoia apatmen blong Hariet i filim olsem i gat san i saen long evri rum. I no longtaem, Hariet mo famli blong hem i tingting blong kasem baptaes.
Long naet bifo oli kasem baptaes, Hariet i nildaon wetem Mutti mo Carmen blong prea. “Papa long Heven,” Hariet i talem, “mifala i glad tumas from ol misinari, gospel ia, mo famli blong mifala. Mifala i no save wet blong kasem baptaes.”
Taem Hariet i openem ae blong hem, hem i luk pikja blong Papa mo smael. Hem i no save wet blong luk hem bakegen sam dei.
I gat tu tempol long Jemani.
Wan aot long tri pat blong Jemani i fulap wetem ol bigfala tri.
Jemani i serem boda wetem naen kantri.
Taem Hariet i groap, hem i maredem naes boe ia we nem blong hem Dieter.
Naoia, Dieter i wan long ol Aposol—!Elda Dieter F. Uchtdorf!
Elda Uchtdorf i talem se Hariet i “laet blong san long laef blong [hem].”
Ol pikja droing oli kam long Giovanni Abeille