Stap Jusum Blong Go long Jos
“Taem yu kambak long haos, talem long mi wanem ol singsing we yu singsing long hem long Praemeri,” Jenny i talem.
“!Bae mi mekem!” sista blong hem Miriam i talem taem i stap werem sus blong hem.
I no evriwan long famli blong Jenny i save go long jos evri Sandei. I gat sikis pipol insaed long famli blong Jenny. Be mama i gat inaf mane blong pem tu bas tikit nomo blong evri wik. Mekem se oli mas jusum huia blong karem bas i go long jos.
Jenny i wantem tumas blong go long jos evri wik. Hem i laekem blong stap lanem abaot Jisas Kraes. Hem i laekem singsing long Praemeri. Hem i wantem blong luk ol fren blong hem. Be moa bitim evri samting, hem i wantem blong filim wom, hapi filing ia we hem i stap filim long jos oltaem. Be tedei bae hem i stap long haos.
“Hem i taem blong go.” Mama i haggem Jenny mo ol brata mo sista blong hem mo talem tata.
Jenny i traem blong smael taem Miriam mo Mama i lego olgeta. Be hem i filim wan samting i solap long trot blong hem taem i wajem tufala i wokbaot i go. Mi wantem nomo se hem i taem blong mi blong go, Jenny i stap tingting. Hem i had blong stap nomo long haos.
“?Yu wantem Kala?” Smol brata blong Jenny, Marco, i holem sam kala pensel mo pepa.
Jenny i sakem hed blong hem blong talem yes.
Long sam aoa i pas, Jenny i ridim ol stori mo kala wetem Marco mo ol bigfala sista blong tufala. Hem i naes, be Jenny i stap tingting long Jos. ?Olgeta i stap lanem ol niufala singsing long Praemeri naoia? ?Wanem lesen oli lanem tedei?
I no longtaem Jenny i harem doa long fored i open. !Mama mo Miriam i kambak hom!
“!Mama! !Miriam!” Jenny i resis i go long doa mo haggem tufala.
Mama i putum smol basket blong hem daon. “Bae yumi tokbaot wanem mifala i bin lanem tedei long jos.”
Evriwan oli sidaon tugeta. Mama i karemaot smol hymbuk we hem i putum long smol basket blong hem. Jenny mo famli blong hem i singsing: “Ol Famli Oli Save Stap Tugeta blong Oltaem.” Hem i save evri toktok blong singsing ia.
Afta Jenny i askem Miriam abaot Praemeri. Miriam i openem Buk blong Momon blong hem mo pulumaot wan smol pis blong pepa we oli foldem. Hem i holem i go antap blong mekem se evriwan i save luk. Hem i wan pikja blong Jisas wetem sam pikinini we hem i kalarem.
“Mifala i kalarem wan pikja mo singsing ‘Mi Traem blong kam Olsem Jisas.’ Afta mifala i tokbaot olsem wanem Jisas i save helpem evriwan.”
“Mifala i tokbaot semmak samting long Rilif Sosaeti tu,” Mama i talem. “Jisas Kraes i save helpem yumi taem yumi fraet mo filim se yumi stap yumiwan.” Mama i karemaot wan smol pis pepa we hem i putum long smol basket blong hem. “Tija i givim evriwan kwot ia we i kam long profet. ‘Taem yu jusum blong stap long saed blong Lod, yu neva stap yuwan.’”*
“!Iven long ples ia long hom!” Jenny i talem.
Mama i smael. “Iven long hom. Yumi save oltaem filim Sevya i stap kolosap long yumi.”
Jenny i smael i bigwan. Hem i no save mekem blong go long jos evri wik. Be hem i filim kolosap long Jisas long Hom. Mo hem i bin filim glad from i janis blong hem blong go long jos bakegen i no long taem.
Ol pikja droing i kam long Laura Catrinella