Ol Paeonia long Evri Ples
Tom mo Bigfala, Strong Flu
Tom i bin save se bae God i helpem olgeta.
“Hemia, Tamā (Papa),” Tom i talem kwaet. Papa blong Tom i girap sloslo mo sidaon long mat we i stap silip long hem. Tom i helpem hem blong drink sam fres kokonas jus.
Tamā mo ful famli blong Tom i bin sik blong sam dei. Kolosap evri narafala wan long vilej tu oli sik. Wan wol sik i bin kam long aelan—Spanis flu.
Tom i wokbaot i go aotsaed. Hem i wan nomo long olgeta pipol we i oraet i stap blong save lukaot long ol narafala wan. Mo plante famli i nidim help.
Mi nidim moa kokonas jus, Tom i stap tingting. Hem i klaem long wan longfala kokonas tri. Taem hem i kasem antap long top, hem i pikimap sam kokonas mo sakem olgeta i go long graon.
Taem hem i kam daon, Tom i tingting long ol pipol long vilej blong hem. Hem i fraet blong luk se fulap long olgeta i sik.
Wan yia bifo, smol brata blong Tom, Ailama, i bin sik. Hemia tu i mekem hem i fraet. Tom mo famli blong hem i prea blong hem i kam oraet bakegen.
Afta Tamā i gat wan spesel drim . Drim ia i soem long hem olsem wanem blong helpem Ailama blong kam oraet—blong kilkilim skin blong stamba blong wiliwili tri blong karem jus blong hem. Tom i helpem Tamā blong lukaot long Ailama, mo oli givim jus blong tri ia long hem. !Mo Ailama i filim oraet!
Tom i save se God i bin helpem olgeta long taem ia. Mo i save se God bae helpem olgeta naoia.
Tom i katem openem ol kokonas. Swit smel blong kokonas jus ia i mekem hem i filim gud smol. Hem i wokbaot i go long nekis haos long vilej blong serem sam kokonas jus wetem ol neba. Afta i go long nekis haos. Mo nekis haos.
Ol wik i pas. Evri dei Tom i wok had blong lukaotem gud evriwan. Hem i kasem ol faol blong mekem se hem i save mekem wom sup blong serem. Hem i kasem ol baket wota long wan spring wota mo karem wota i go long ol pipol blong drink.
Sam long ol pipol long vilej oli bin ded. Tamā i ded tu. Hem i bin had tumas long Tom. Ful vilej oli harem nogud. Be tru long evri samting ia, Tom i tingbaot se God i lavem hem mo bae Hem i helpem hem.
Tom i no stop blong helpem ol pipol. Afta samfala taem, !ol pipol oli stat blong kam oraet!
Long en, flu wol sik ia i finis. Ol pipol oli stop blong sik. Tom mo Ailama tufala i save gobak long skul bakegen. Tom i oltaem misim Tamā. Be hem i save se sam dei bae hem i luk papa blong hem bakegen. Mo hem i save se Papa long Heven bae i oltaem stap blong helpem hem.
Samoa i wan grup blong ol aelan long Pasifik Osen.
Tedei i gat wan tempol long Samoa.
Wan lokol haos long Samoa, oli singaotem fale, i nogat ol wol.
Spanis flu wol sik ia i kasem Samoa long 1918.
Tom i gat twelef yia taem wol sik ia i stat.
Vilej blong Tom, Sauniatu, wan grup blong Ol Lata-dei Sent i wokem.
Pikja droing i kam long Corey Egbert