“Faafitauli o le Taufe’ene,” O Le Uo, AOK. 2022.
Faafitauli o le Taufe’ene
Faatoa malie lava pe a maua e tagata uma le fiafia!
“Mama!” Sa alaga atu ai Lisi. “Lea lava e tago Max ‘ene a’u! E tusa lava pe ou te fai atu i ai e soia.”
“Ou te le o faia a!” Sa alaga atu ai Max. “Si a’u tamai ’ene lava ia te ia. Ae sa ia ’euina a’u!”
“Tamaiti!” Na valaau mai ai Mama mai i le isi itu o le fale. “Faapea a’u o le a tatou fausia se olo palanikeke. Tuu le tauaimisa ae o mai e fesoasoani mai.”
Sa masau ese Lisi ma tamoe atu i le potu o le aiga. Ae sa le fiafia lava Max.
Aisea e faitatala ai Lisi? sa mafaufau ai o ia a o savali faatotoso ona vae. E malie le taufe’ene, a ea? O le isi mea, e ’eu soo lava a’u e Lisi, ma ou te le fiafia foi i lena mea.
Ina ua oo atu Max i le potu o le aiga, ua uma ona aumai i fafo e Tina se faaputuga palanikeke. Sa ia aapa atu mo lana palanikeke samasama e sili ona fiafia i ai, ae sa mau muamua ai Lisi.
Sa ia se’iina ese vave mai ona lima. “O a’ulena!”
“Toe aumai!” Sa sei i luga e Lisi se aluga ma ta ai lona lima.
“Soia!” na ee atu ai Max. Ae na o le toe ta foi e Lisi o le isi ona lima.
“Soia, soia, tamaiti!” o le tala lea a Mama. “E le o le auala lea tatou te fausia ai se ‘olo.” Sa nofo o ia i luga o se momi i luga o le fola ma toso ifo i lalo Max ma Lisi i ona autafa. “Sei tatou manava loloa uma lava.”
Sa tilotilo atu Max i tua o Mama ma pulato’a atu ia Lisi. Ona ia manava loloa lea.
Sa fusi mai e Mama Max ma Lisi. “Afai e faia e se tasi se mea e te le fiafia i ai ma latou te le taofia, o le a sou lagona?”
“E le lelei,” o le tala filemu lea a Lisi.
“Ioe,” o le tala lea a Mama. “O le ta’eu ma le fe’ene ma le tau i ‘aluga faatoa malie lava pe afai o loo fiafia tagata uma. Tatou te faaaloalo i le tasi ma le isi e ala i le tuu pe a talosagaina i tatou e soia.”
“Ae e na o se ‘ene lava,” o le tala lea a Max.
“Ia, atonu ua na o se ‘ene lava ia te oe. Ae atonu e matuai faalavelave lava ia Lisi,” o le tala lea a Mama. “Na tuuina mai e Tama Faalelagi ia i tatou tino ofoofogia taitasi e tausia ma puipuia. Ma o lona uiga e le afaina le fai atu e ‘soia!’”
“E le toe i ai la se fe’eua’i?” O le fesili lea a Lisi.
“Ou te le fiafia i le ‘eu o a’u!” Sa fai atu ai Max ia Mama. “Ae a pe a fai se tatou tulafono fou faaleaiga? Pe a le manao se tasi e pa’i atu se isi ma fai mai e ’soia,’ ona tuu loa lea i le taimi lava lena.”
“O se manatu manaia tele lena,” o le tala lea a Mama. “O le a sou manatu, Lisi?”
Sa ataata Lisi. “Ou te fiafia i ai, aemaise lava pe afai o lona uiga e le toe i ai foi se taufe’ene.”
“Lelei,” o le tala lea a Mama. “Afai e pa’i atu se tasi ia te oe ma e te le fiafia i ai, e mafai ona e fai atu ia i latou e leai.”
“E tusa lava pe afai o oe lea o loo faalavelave mai ia i matou?” Sa ataata Max.
“Ioe. E tusa lava po o a’u po o Papa po o Lisi po o se uo—o le soia o lona uiga o le tuu. Ma afai latou te le faalogo ma pa’i atu pea ia te oe, e mafai ona e tau maia ia te a’u po o Papa i le taimi lava lena.”
Ae e le o le faitatala lena?” O le fesili lea a Lisi.
“E le o le faitatala,” o le tala lea a Mama. “Ma e tatau ona e ta’u maia e tusa lava pe fai mai le isi tagata e aua le ta’ua.”
“O lona uiga la ou te le tau fusia Aunt Mindy pe a sau?” O le fesili lea a Lisi. “O le mau ia o lana fusi, ma ou te le fiafia i ai.”
Na ataata Mama. “Ioe, e fai lava si malosi o le fusi a Mindy. E mafai lava ona e talotalo faatofa ma fai i ai ‘leai faafetai’ pe afai e manao o ia e fusi atu. E le afaina. E i ai foi tagata ou te le fia fusiina.”
Sa faalapopoa ma faafaanoanoa e Max ona mata. “O lona uiga la e te le fiafia e fusi i matou?”
Sa ata tina ma toso mai Lisi ma Max i se fusi lapoa. “Leai, soso, o outou o tagata e sili ona ou fiafia e fusi. Ia faauma loa le tatou olo!”
Sa latou faatutu i luga momi o nofoa e fai ma puipui. Ona latou toso ane lea o nofoa o le umukuka ma fofola ai i luga palanikeke. Sa fetolofi atu Lisi ma Max i totonu ma tulei le isi momi i le mea e ulu ai i totonu e fai ai se faitotoa.
Sa ataata Lisi ma aapa atu e ’eu Max.
“Soia,” o le tala lea a Max, ma sa taofi lelei le tamatamailima o Lisi i luma tonu lava o Max. Sa ataata o ia ma tuu mai i fafo lona tamatamailima, ua sauni foi e ’eu Lisi. “LELEI. O loa.”