Sauni e Tietie
Sa manao Quade e faatasi atu i ana uo. Ae tasi lava le faafitauli.
Sa talotalo atu Quade i ana uo a o ia savali atu i le fale mai le aoga. “Feiloai i se taimi!”
“O loo matou tietie i a matou uila i le paka i le vaiaso a sau. E te alu atu ai foi?” O le fesili lea a James.
Sa faafuasei ona lagonaina le vevela o foliga o Quade.
“Masalo!” o lana tala lea. “Ou te le’o mautinoa.”
Sa faanatinati atu Quade i le fale. Sa ia toso mai lana uila lanumeamata mai le fale taavale ma tafi le nofoa. Sa pa le pa’u. Ae e le afaina lena mea. Na te lei iloa pe faapefea ona tietie i ai!
“Pe o lelei mea uma?” Sa fesili atu ai Tama a o sau o ia i fafo.
“E mananao au uo e tietie uila i le vaiaso lea,” o le tala lea a Quade. “Ae ou te le iloa pe faapefea. Ou te fefe o le a latou ula ia te a’u.”
“O loo i ai le vaiaso atoa e te aoao ai,” o le tala lea a Tama. “E te manao e amata nei loa?”
“Ua lelei, o le a ou taofimau ia te oe. E amata ona e vili,” o le tala lea a Tama.
Sa vili atu i luma Quade. Ae ina ua amata ona alu le uila, sa popole o ia.
“E taufaafefe tele lenei mea!” o lana tala lea. Sa ia oso ese mai le uila. Sa toe manavanava loloa o ia. Ona ia toe oso lea i luga ma toe taumafai. Ae sa lagona le alu tevateva o le uila!
“Ou te manatu e le mafai ona ou faia lenei mea,” o lana tala lea. “E mafai ona tatou ole atu i le Tama Faalelagi mo se fesoasoani?”
Na luelue le ulu o tama. Sa piilima Quade ma moeiini ona mata.
“Tama Faalelagi pele, faamolemole fesoasoani mai ia te a’u e aoao e tietie i se uila. Faamolemole fesoasoani mai ia ou le lagonaina le fefe. I le suafa o Iesu Keriso, amene.” Ina ua uma le tatalo a Quade, sa ia lagona le toafimalie. Sa ia fusiina Tama.
“Sauni e toe taumafai?” O le fesili lea a Tama.
“Ioe.”
Sa fesoasoani Tama ia Quade e toe oso i luga o lana uila. Sa tuu e Quade ona vae i luga o vae o le uila. Sa ia uuina au o le ave ma tilotilo atu i luma. Ona amata lea ona ia vili.
Mo nai taumafaiga muamua, sa le mafai e Quade ona taofia le uila. Ae sa ia taumafai pea. Na iu lava ina ia oo atu i le faaiuga o le poloka e aunoa ma le pa‘ū. Sa ataata o ia ma pamu lana moto. E mafai ona ia tietie e aunoa ma le fesoasoani a Tama!
“Ua ou faia!” Sa fai atu ai Quade. “O se mea fiafia lenei mea.”
“Manaia!” o le tala lea a Tama.
Sa faataitai e Quade le tietie i aso taitasi. O le vaiaso na sosoo ai, na o mai ai ana uo i lona fale. Sa latou i ai uma i luga o a latou uila.
“Ei, Quade,” o le tala lea a James. “E te fia tietie i le paka faatasi ma i matou?”
Sa faamaulu e Quade lona pulou. “Ioe! Faafetai mo le valaauliaina o au!”
Sa puna i luga o lana uila vilivae. Faatasi ai ma le fesoasoani mai ia Tama ma le Tama Faalelagi, sa saunia ai o ia e tietie!
Ata na tusia e Mark Robison