O Le Salamo o se Mea Lelei!
Sa le iloa e Gemma pe aisea na ita tele ai o ia.
Sa saofafai Gemma ma lana uo o Harper i lalo o le laau i luma o le fale o Gemma. Sa tumu le laau i fuga piniki. Sa o se aso matagofie tele.
“E te iloa?” O le tala lea a Harper. “O le a faauu lo‘u tausoga mai le aoga maualalo.”
Sa futi e Gemma le mutia. Sa ia moomoo maimau pe ana faauu foi o ia.
“E manaia lena, ou te matea,” o lana tala lea.
“O le a matou faia se pati tele faaleaiga e faamanatu ai,” o le tala lea a Harper. O le a alu lo‘u tausoga i le aoga tulagalua i le tausaga a sau. E matua laki lava o ia!”
“Ua uma ona alu lo‘u tuagane i le aoga tulagalua,” o le tala lea a Gemma.
“Na e iloa i le aoga tulagalua e te maua ai lau lava loka?” O le fesili lea a Harper.
“Ioe, ou te iloa!” Sa fai atu ai Gemma. “Faatoa uma nei ona ou ta‘u atu lava ia te oe—ua alu lo‘u tuagane i le aoga tulagalua.” Aisea e gugutu ai pea Harper? Sa mafaufau ai Gemma. Na te le o tuuina mai ia te a‘u se avanoa e fai atu ai se tala!
“Ma le faletaalo! Latou te o i le faletaalo i aso uma,“ o le tala lea a Harper. “Sa fai mai lo‘u tausoga—”
“Harper, ou te le popole po o le a le tala a lou tausoga,” o le tala lea a Gemma. “Ua uma ona ou iloa mea uma e uiga i le aoga tulagalua.”
Sa sioa ifo Harper i lalo i fuga na pauu mai le laau. Sa lagona le vevela o foliga o Gemma. Sa ia le iloa le mea e fai pe tautala ai.
Mulimuli ane sa tu i luga Gemma. Sa ia tafi ese le palapala mai lona ofuvae ma tamoe atu i lona fale.
Aisea na ia ita tele ai? E leai se mea sese na faia e Harper. Sa saofai Gemma i le faatausiusiuga o lona moega ma manava loloa. Sa moomoo o ia maimau pe ana ia le fai atu lena mea ia Harper. Sa lei agalelei lava.
Sa tilotilo atu o ia i lana kesi ma vaaia ai se faila e lanu peach ma ni fatu iila. O le tusi o le papatisoga na faia e lona tina. Sa i ai i totonu ni ata mai lona olaga ma faamatalaga mai aiga ma uo. Sa ia uu mai le faila ma faasolosolo atu i itulau.
Sa ia matauina se faamatalaga se tasi. E faitauina, “Ou te manao ia e iloa e mitamita le Tama Faalelagi i lau filifiliga ina ia papatisoina. A e faia ni mea sese ma salamo, o le a Ia faamagaloina oe. O le salamo o se mea lelei!”
Sa manavanava loloa Gemma. O le auala sa ia taulimaina ai Harper e le o se filifiliga lelei. Ae sa ia iloa le mea e fai i le taimi nei.
Sa tamoe o ia i fafo ma nofo i lalo ia Harper. Sa tilotilo i lalo Harper.
“Ou te faatoese atu i le tala na ou faia.” Sa le tatau ona ou le faaaloalo tele,“ o le tala lea a Gemma.
Sa ea a’e i luga Harper. “E le afaina. Ou te iloa e te lei mafaufauina e fai lena mea. Faafetai mo lou faamalie mai. Sa ia tuuina atu ia Gemma se fuga na pau mai le laau.
I lena po, sa ta‘u atu ai e Gemma ia Tina le mea na tupu. “Sa faamagalo a‘u e Harper,” o le tala lea a Gemma. “Ae e manaomia pea ona ou salamo i le Tama Faalelagi. E mafai ona e fesoasoani mai ia te a’u?”
“Ioe,” sa fai atu ai Tina. Sa ia matuai fusi ia Gemma. “E te manao e tatalo e uiga i ai i le taimi nei?”
Sa tootutuli ifo i lalo Gemma ma Tina.
“Tama Faalelagi pele,” na tatalo ai Gemma, “Ou te faamalie atu sa ou matua agaleaga lava ia Harper. Ou te manao ou te salamo ma fai se mea sili atu.”
Sa lagona e Gemma le fiafia i totonu a o ia tatalo. Sa fiafia o ia ua mafai ona ia faaleleia mea ma Harper. Ma le Tama Faalelagi. O le Salamo o se mea lelei!
Ata na tusia e Carolina Farías