O Le Misiona Faamama
Sa i ai se mea e faateia ai e Millie ma Tina ia Aunt Alyssa (le uso laititi o le tina o Millie).
Sa tilotilo atu Tina i lana telefoni. “Auoi, leai! O Aunt Alyssa o loo i le falemai.”
Sa lagona e Millie ua pau lona manava. Sa ia iloa o le falemai o se nofoaga lea e o i ai tagata pea latou mama‘i tele. Ae o le taimi muamua lenei sa tatau ai i se tasi o lona aiga ona nofo ai iina.
“O le a se mea e mafai ona tatou faia e fesoasoani ai ia te ia?” O le fesili lea a Millie.
“Sei o tatou saili iai.” Sa valaau e Tina ia Aunt Alyssa. Sa mafai ona faamalo atu Millie, lea na faafiafiaina ai o ia. Sa ta‘u atu e Aunt Alyssa ia i laua ua atoa le vaiaso talu ona ma’i o ia. Sa faamoemoe o ia o le a mafai ona sau o ia i le fale mai le falemai i ni nai aso.
“Ou te manatu ua ou iloa le auala e mafai ona taua fesoasoani ai ia te ia,” o le tala lea a Tina ina ua uma le telefoni. “Matou te manaomia ni sapalai.”
I ni nai itula mulimuli ane, sa savavali atu ai Millie ma Tina i luga o le faasitepu i le fale mautotogi o Aunt Alyssa. Sa laua aveina se pakete e tumu i fasi ieie, fasimoli, ma pulumu. Sa laua i ai i se misiona faamama!
Na fesoasoani muamua Millie ia Tina e fufulu ipu. Ona ia fesoasoani lea e gaugau ni tagamea. Sa ia soloina le laulau o le umukuka ma salu foi le foloa.
A o faigaluega o ia, sa mafaufau Millie i le tele o lona alofa ia Aunt Alyssa. Soo se taimi lava e galulue ai Tina ma Tama i le taimi lava e tasi, o Aunt Alyssa e sau la te nonofo. O nisi taimi laua te o faatasi ai i le paka. Sa laua fiafia e matamata i tagata o o atu e faasavavali a latou taifau i tafatafa o le vaitafe.
Ina ua mavae le tele o galuega faigata, sa fai mai Tina toeitiiti lava a uma. Sa fesoasoani Millie ia te ia e tuu ie mama i luga o le moega o Aunt Alyssa.
“E i ai so’u manatu,” o le tala lea a Tina. “Aua ta te vave tauina atu ia Aunt Alyssa le mea ua ta faia. O lena auala, o le a faateia ai o ia pe a ia taunuu i le fale mai le falemai!”
Sa ata Millie a o ia mafaufau i foliga o le uso o lona tina pe a ia tatalaina le faitotoa.
“Sei o taua tuua foi se tusi mo ia!” Sa fai atu ai Millie.
Sa gaugau e Tina se fasi pepa ma tusi ai se faamatalaga i totonu. Sa tusia e Millie, “Ia vave ona e manuia!” i le pito i luma ma tusi ai le tele o fatu i luga. Sa la tuua i luga o le aluga a Aunt Alyssa.
“Faafetai mo le alu i se misiona faamama faatasi ma a‘u i le asō,” o le tala lea a Tina a o agai atu i le fale. “O aunt Alyssa o le a matua fiafia lava ma faateia.”
Sa ataata Millie. Sa faanoanoa pea o ia ona sa ma‘i Aunt Alyssa. Ae o le fesoasoani atu na maua ai e Millie se lagona lelei teisi atu. Sa faamoemoe o ia o le a vave foi ona manuia le uso o lona tina!
Ata na tusia e Maarten Lenoir