O Le Vavega 15-Minute
Ua lata ona alu ese le pasi. Mata e mafai ona laua maua?
“Vaai!” Sa musumusu atu Sasha. “O le isi squirrel.” Sa fiafia o ia e sailiili i le Sochi Arboretum. O le paka tele sa i ai ituaiga uma o fugalaau ma laau matagofie. I lona nuu, i Rusia tutotonu, sa toulu le kiona ma maatiati le malulu. Ae o iinei i Sochi, sa susulu mai le la, ma sa manogi le ea e pei o le tautotogo.
Sa matamata Sasha i le atiatiga nati a le squirrel. O loo i ai pea lona ofu talaloa mafiafia o le taumalulu, ae na mate e Sasha sa fiafia lava mo le tautotogo e pei ona sa i ai o ia. Sa ataata o ia a o ae faatopetope atu le squirrel i luga o se laau.
O le taimi lava lena na tatagi ai le telefoni a Mama. “Talofa?” O le tala lea a Mama. Sa tu o ia. “Ae sa ou manatu o a matou pepa ulufale e mo taeao! O le aso nei?” E lei umi ae tautau i luga le telefoni.
“Sasha! E tatau ona ta o nei loa. O la matou malaga maimoa i le Skypark o le taeao nei, ma o le pasi o le a alu i le pe a ma le 15 minute!”
“E mafai ona tatou taunuu vave i le fale faatali pasi?” Sa fesili ai Sasha.
“Talosia. Tatou tatalo i o tatou loto ma faia le mea sili tatou te mafaia. Sa uu e Mama lona lima, ma sa amata ona la taufetuli.
O le Sochi Arboretum e tele. Sa lei mautinoa e Sasha e mafai ona latou maua le auala e o ese ai! Ae sa ia faia se tatalo i lona loto. Faamolemole fesoasoani mai ia matou taunuu i le fale faatali pasi i le taimi e tatau ai. Matou te fia o i le Skypark.
O le Skypark o se paka malaga e tu maualuga i luga o mauga. Sa i ai ni suigi tetele, puipui e feaei ai, maeasipi, ma se kosi o maea. Sa i ai foi le Skybridge—o se alalaupapa maualuga e tautau maualuga i luga i le lagi. Sa faamoemoe Sasha o le a latou oo iina i se taimi.
Na iu lava ina latou maua le auala autu ma vaavaai mo se taavale la‘u pasese. Sa latou vaai i se taxi i le taimi lava lena! Sa la oso i totonu ma ta‘u atu e Mama i le avetaavale le igoa o le fale faatali pasi.
“Ua e laki!” o le tala lea a le avetaavale. “Ou te iloa se auala ‘alo.”
Sa sioa atu Sasha i fafo o le faamalama a o latou pasia laau.
“E te manatu o le a tatou maua atu?” Sa fesili atu ai Sasha ia Mama.
Sa tilotilo atu Mama i lana uati. “Ou te le iloa. O lea na ma tatalo ai. Ma e tusa lava pe tatou te le mauaina, e le afaina lena mea. Ua tatou i ai i se malaga!”
E le’i umi ae latou i ai i le fale faatali pasi. E lei i ai lava iina le pasi! Ua tuai.
Sa manavanava malosi pea Mama ma Sasha, ae sa ataata Sasha. “Sa sa‘o le avetaavale lena! Ua taua laki.”
“Ou te le manatu ua nao le laki, pele,” o le tala lea a Mama. “O nisi taimi e i ai ni a tatou vavega laiti e faamanatu mai ai ia i tatou le tele o le alofa o le Tama Faalelagi ia i tatou.”
O le taimi lava lena, na tu atu ai loa le pasi. Sa feosoi Mama ma Sasha i luga ma agai atu i le Skypark. Sa lagona e Sasha le lotofaafetai i lenei vavega laitiiti!
Ata na tusia e Mitch Miller