O Gaoioiga o le Sau, Mulimuli Mai ia te A’u
Mo afiafi faaleaiga, suesuega o tusitusiga paia, pe tau lava o se mea malie!
E Leai Se Mea e Le Mafaia!
Tala: Sa mananao Elisapeta ma Sakaria ia maua se pepe, ae ua matua tele Elisapeta. I se tasi aso, sa ta’u atu ai e se agelu ia Sakaria o le a maua se la tama! O le la tama o Ioane le Papatiso. Na aoaoina e Elisapeta ma Sakaria e faapea, e leai lava se mea e tasi e le mafaia e le Atua. (Tagai Luka 1:11–14, 37.)
Pese: ”O Le Tatalo a le Tamaitiiti,” (Tusipese a Tamaiti, 6–7)
Gaoioiga: Faataitai lenei galuega “faigata”! Muamua, faamoe i lalo lou tama’ilima ogatotonu. Ona tuu lea o lou lima i luga o se laulau, ia u i lalo le alofilima. Taumafai nei e sii i luga lou tama’ilima tuumama. Ona fai atu lea i se isi tagata e tago e sii i luga. Ua faapefea ona fesoasoani le Tama Faalelagi ia te oe e fai se mea e foliga mai e le mafai?
O Se Tala o le Fanau mai o Iesu
Tala: Sa soifua mai Iesu Keriso i se fale o manu i le aai o Peteleema. Na o mai leoleo mamoe, agelu, ma le Au Makoi e vaai ia te Ia. E mafai ona e faitau atili e uiga i le Au Makoi i le itulau 46.
Pese: “Sa Tamaititi o Iesu” (Tusipese a Tamaiti, 34)
Gaoioiga: Feauauai i le faamatalaina o se tala e uiga i le fanau mai o se tagata o le aiga. E mafai ona e talanoa e uiga i le mea na latou fananau mai ai, le aso na fananau mai ai, po o ai o latou matua, po o isi mea e te iloa e uiga i lo latou fananau mai.
O Le Malamalama Moni
Mo le Ioane 1
Tala: O nisi taimi e faaigoa ai Iesu Keriso o le “Malamalama moni” (Ioane 1:9). Ua aoao mai tusitusiga paia e tatau ona tatou tausia Ana poloaiga ma mulimuli ia te Ia. Ona tatou maua lea o le “mana e avea ai ma fanau a le Atua” (Ioane 1:12).
Pese: “O Iesu o Lo’u Malamalama Moni” (itulau 23)
Gaoioiga: Tusi se ata o se sini o ia te oe. Tuu i se tasi e nanā lou ata i se mea i totonu o le potu ma tapē moli. Ia aumai se tamai molī ma faasusulu faataamilo i le potu. E mafai ona e mauaina lou ata i le taimi nei? Talanoa e uiga i le auala e mafai ai e Iesu Keriso ona fesoasoani ia te oe ia ausia au sini.
O le Ala o Feagaiga
Mo le Mataio 3; Mareko 1; Luka 3
Tala: Na afio atu Iesu Keriso ia Ioane le Papatiso ina ia papatisoina ina ia mafai ona Ia “faataunuuina o mea tonu uma” (Mataio3:15). Sa papatisoina Iesu e faaali mai ai se faataitaiga o le usiusitai i le Tama Faalelagi. E mafai ona tatou mulimuli ia Iesu e ala i le papatisoina foi!
Pese: “Mulimuli Mai ia te A’u” (Viiga, nu. 62)
Gaoioiga: Alu i le itulau e 9 e aoao ai e uiga i le ala o feagaiga. Ona fai lea o le gaoioiga. I lenei itulau i masina taitasi, o le a e aoao ai e uiga i se faamanuiaga mo oe a o e mulimuli i le ala e toe foi atu ai i le Tama Faalelagi!
Ata na tusia e Katy Dockrill