Molī, Meapueata, Auauna Atu!
O le i ai i le fale sa le’i taofia ai i la’ua mai le auauna atu.
E fiafia Antonella ma Mariana e o i le lotu i vaiaso taitasi. Ae o lenei ua le mafai ona la auai i le lotu ona o le faama’i pepesi o le KOVITI-19. Sa fai la latou vasega Peraimeri i luga o le initoneti, ae sa le tutusa lava.
Sa misia e Antonella ma Mariana le auai atu i le Peraimeri. I le tausaga talu ai, na siitia atu lo latou aiga mai Chile i Kanata. O le faama’i pepesi na faigata ai ona faia ni uo fou. Sa la misia le mafai ona aoao e uiga i tala o tusitusiga paia faatasi ma isi tamaiti. Ma sa la misia le faia o ni lesona i le faaSipaniolo e pei ona sa latou faia i Chile.
I se tasi aso, ina ua uma ona faia le lotu i le fale, sa tilotilo atu Antonella ma Mariana i luga o le initoneti mo se mea e fesoasoani ia i la’ua e suesue ai le Sau, Mulimuli Mai ia te A’u.
“Maimau pe ana mafai ona ta maua nisi vitio i le faaSipaniolo,” o le tala lea a Antonella. Sa ia mafaufau mo sina taimi. Ona ou mauaina lea o se manatu maoae. “E mafai ona fai a ta’ua lava vitio mo le Sau, Mulimuli Mai ia te A’u i vaiaso taitasi.”
“Ioe, ma e mafai ona ta faia i le faaSipaniolo!” o le tala lea a Mariana. “Ona mafai lea ona ta faasoa atu i isi tamaiti.”
Sa fai mai Mama ma Papa e mafai ona la fesoasoani. Sa fiafia le aiga atoa!
Muamua, na faitau e le aiga tusitusiga paia mo le lesona o le vaiaso. Sa fuafua e teineiti mea o le a la talanoa i ai. Ona amata lea ona latou faia vitio. Sa auaua’i Antonella ma Mariana e pue i la’ua lava a o la talanoa e uiga i tala i le Tusi a Mamona. I le faaiuga o vitio taitasi, sa faasoa mai ai e se tasi o i la’ua se mea sa la aoaoina mai le lesona. Ona fesoasoani lea o Mama ma Papa ia i la’ua e fai le vitio e tuu i i luga le initoneti.
I le taimi muamua, la te le’i iloa i taimi uma le tala e fai atu. Ae o le faitauina o tusitusiga paia ma le aoao atili e uiga i lesona na fesoasoani ia i la’ua.
I se tasi Aso Sa, sa saofafai ai Antonella ma Mariana i luma o le komepiuta mo le la vasega Peraimeri. O le lesona o lenei vaiaso sa faatatau i le autau talavou i le Tusi a Mamona. “Aisea na o ai le autau talavou e tau?” na fesili ai le latou faiaoga.
Sa tape e Mariana a la faaleotele leo. “Ou te iloa,” sa ia fai atu ai. Sa la faia ma Antonella se vitio e uiga i lena tala i le vaiaso ua te’a. “Sa folafola atu e o latou tama i le Atua o le a latou le tau, o lea na o ai atalii.”
Na luelue le ulu o Antonella. “Ma sa aoaoina i latou e o latou tina afai latou te faatuatua, o le a tausia i latou e le Atua ia saogalemu.” Sa ataata atu o ia ia Mariana. Sa manaia le suesue faatasi i tusitusiga paia.
I lena po i le taumafataga o le afiafi, sa fesili ai Mama, “Na faapefea mai le Peraimeri?”
“Lelei!” Na fai atu ai Antonella. “O le faia o vitio ua fesoasoani ia te a’u e aoao atili ai e uiga i tusitusiga paia.”
“E faapena foi a’u,” na fai atu ai Mariana. “E mafai ona ou taliina le tele o fesili i le Peraimeri. Ma ua sili atu lo ma iloa o tala o tusitusiga paia.”
“Ua ou fiafia ua fesoasoani vitio ia oulua,” o le tala lea a Papa. “Ou te manatu ua latou fesoasoani foi i le toatele o isi tagata!”
“E sa’o lelei,” na fai atu ai Mama. “O le faasoa atu o mea ua e aoaoina ma ou lagona e uiga i le talalelei o se auala sili lea e auauna atu ai!”
Sa ataata Mariana. “Ou te fiafia e mafai ona tatou auauna atu i lenei auala,” o lana tala lea. Ona ia liliu atu lea ia Antonella. “Ta amata fuafuaina le vitio o le vaiaso a sau!”
Ata na tusia e Kristin Sorra