Tele Le Pisapisaō!
Sa matuai pisapisaō mea uma. O fea na mafai ona maua ai e Luke le filemu?
Sa atigū Luke. Sa matuai pisapisaō mea uma. Sa toe fefinauai foi ona uso, o Tadd ma John. E oo lava i lalo o le potu tele, sa mafai ona ia lagona lo la feei i le faitotoa o lo latou potu. Ma o lona tuafafine, o Lizzie, na toe ki faaleotele lana musika. Tu’i. Tu’i. Tu’i. Sa mafai ona ia lagonaina le pa’ō o nota maualalalo.
Sa taumafai Luke e fai atu i ona uso e taofi. “Alu ese,” na fai atu ai Tadd ia te ia. Ona fai atu lea o Luke ia Lizzie e ki i lalo lana musika. Sa na ona ia kiina atili i luga le leo o le musika.
Sa manao Luke e alu i fafo i le mea e mafai ona ia mafaufau ai. Ae sa timu.
Sa i ai se nofoaga filemu e mafai ona alu i ai Luke. O ananafi na tuuina atu ai e ona matua ia te ia se potu mo ia lava—o se potu na te lei tau faasoaina ia Tadd ma John. O le potu i lalo i le faavae o le fale. Sa lava le telē mo se moega ma se laulau. Ae i totonu o lona potu sa mafai ona tapuni e Luke le faitotoa ma sola ese ai mai le pisapisaō.
Sa alu Luke i le fogafale i lalo i lona potu fou. Sa tilotilo solo o ia i pusa sa ia aumaia i lalo i se taimi na muamua atu. Sa ia vaaia se ata o Iesu o onoono mai fafo o se pusa. Sa maua e Luke lena ata i le aso na papatiso ai o ia. O le tilotilo i ai i taimi uma na ia lagona ai le toafilemu.
Sa aumai i fafo e Luke le ata mai le pusa. Sa ia tuuina i luga o le laulau. Ona ia tootuli lea i lalo e tatalo. “Tama Faalelagi,” na fai atu ai Luke, “o nisi taimi e tele ai le pisapisaō iinei. Faamolemole fesoasoani mai ia ou maua sina filemu.”
Sa taoto Luke i luga o lona moega. Sa ia mafaufau e uiga ia Iesu. Sa ia aoao i le Peraimeri e mafai ona latalata atu Iesu ia te ia i taimi uma. Ma e mafai e le Agaga Paia ona aumaia le filemu i taimi uma.
E le toe mamao ae taunuu mai Tina ma Tama i le fale mai galuega. La te talanoa ia Tadd ma John. O le a uma le fetaua’i. Mo sina taimi. La te talanoa ia Lizzie. O le a ki i lalo e Lizzie lana musika. Mo sina taimi. Seia oo ina toe o Tina ma Tama.
Ae mo le taimi nei, sa taoto Luke i lona moega. Sa ia tilotilo atu i le ata o Iesu. “Faamolemole, Tama Faalelagi,” na musumusu atu ai Luke. “Faamolemole fesoasoani mai ia ou lagona le filemu e tusa lava po o le a le mea o loo tupu i le isi vaega o le fale.”
Mulimuli ane, sa tuitui mai le faitotoa o lona potumoe. “E mafai ona ou alu atu i totonu?” O le fesili lea a Tina. “O a mai oe?”
“Sa toe taua’imisa foi Tadd ma John,” o le tala lea a Luke. “Ma e leotele tele le musika a Lizzie.”
“Ua ou iloa. E faigata, a ea?” Na fai atu ai Tina. “O loo talanoa atu Tama i ou uso i le taimi nei. Ma o le a ou talanoa ia Lizzie nanei. Ae muamua, sa ou fia iloa po o a mai oe.”
“O lea ou te manuia. Ua ou fiafia ua ou maua lenei potu,” o le tala lea a Luke.
“E faapena foi a’u,” na fai mai ai Tina. “Ua ou vaai atu ua e tuuina se ata o Iesu i luga o le laulau.”
Sa ataata Luke. “Na ou faia. Ma o le a Ia fesoasoani ia te a’u ia faia lo’u potu o se nofoaga o le filemu.”
Ata na tusia e Bryan Beach