O Le Ala na Lototeleai Siedeh
Sa fefe tele Siedeh e talanoa i tamaiti o lana vasega.
Sa manava loloa Siedeh ma savali atu i totonu o lona potuaoga fou. O lona aso muamua lea i le vasega fa.
I le tausaga ua te’a, sa i ai Siedah i le vasega lua. Sa lelei tele o ia lea na faataga ai e lana aoga e misi le vasega tolu. Sa fiafia Siedeh e fai ni numera faigata atu ma faitau nisi tusi i le vasega fa. Ae sa le fiafia o ia o le a ia tuua ana uo tuai.
A o ia tilotilo solo i le potu, sa lagona e Siedeh le laitiiti. Sa foliga matutua ma uumī atu tamaiti uma o lana vasega nai lo ia. Ae faapefea pe afai e le fetaui mo ia?
Sa ia filifilia se kesi ma nofo i lalo. Sa nofo se teineitiiti umī i ona autafa. “Talofa,” sa fai atu ai Siedeh.
“O le a lau mea o fai iinei?” na fesili atu ai le teineitiiti. “Sa ou manatu sa tatau ona e i ai i le vasega tolu.”
“Sa siitia a’u e le aoga i se vasega,” o le tala lea a Siedeh ma le popole.
Sa faia e le teineitiiti se foliga ita. “Ia, ou te le popole pe e te atamai. Ua na o oe lava o se pepe.”
Na le lelei lagona o Siedeh. Mo le taimi atoa na totoe o le vaiaso, sa fefe tele o ia e talanoa i soo se tasi o lana vasega. O taimi uma lava na te faalogoina ai se tasi o ata pe musumusu, sa ia faanonō. Atonu sa latou faia ni tala le lelei e uiga ia te ia.
O le taimi lava na ia manatu ai ua faateteleina le leaga o mea uma, sa toe maua ai e Siedeh lana suega o le numera. Sa manao o ia e tagi ina ua ia tilotilo atu i ana togi. O le numera o le mataupu e sili ona ia fiafia i ai. Na te le’i mauaina muamua lava se togi maualalo i se suega.
Ina ua taunuu o ia i le fale, sa le mafai e Siedeh ona taofiofi ona loimata. “E leai ni a’u uo,” na ia fai atu ai i ona matua. “E le o a’u o se tagata o le vasega fa. “E le lava lo’u atamai.”
“Ou te faamalie atu ua faigata tele,” o le tala lea a le tina o Siedeh. Ae e te atamai tele. Ma o loo e aoao pea.”
Sa solo e Siedeh ona mata. “Maimau pe ana mafai ona ou alu i le vasega tolu nai lo lea vasega”
Sa filemu Tamā mo sina taimi. “E te manao i se faamanuiaga faaleperisitua?” na ia fesili atu ai.
Sa luelue le ulu o Siedeh. Atonu o se faamanuiaga mai ia Tama o le a fesoasoani ia te ia e maua ai se lagona lelei.
Sa nofo Siedeh i luga o se nofoa, ma sa tuu e Tama ona lima i luga o lona ulu.
“Ou te faamanuia ia te oe ina ia e le fefe,” o le tala lea a Tama. “Ma ou te faamanuia ia te oe ia e alofa i tamaiti o lau vasega fou. A o latou faamasani ia oe, o le a latou alolofa foi ia te oe.”
Sa sosolo atu se lagona toafimalie ia Siedeh. Sa ia lagonaina o upu a lona tama o le mea lea na finagalo le Tama Faalelagi ia te ia e faalogo i ai.
Ina ua uma le faamanuiaga, sa fesoasoani Mama ia Siedeh e galue i lana meaaoga o le numera. E le’i umi ae lagona e Siedeh se lagona lelei atu.
O le aso na sosoo ai i le aoga, sa manatua ai e Siedeh lona faamanuiaga ma taumafai ai ia lototele. Sa ataata o ia i tamaiti o lana vasega. Ina ua ia faaalia le alofa, sa itiiti lona lagonaina o le fefe ia i latou! O nisi o i latou sa matuai lelei lava. Sa galue malosi o ia e aoao, ma e le’i umi ae faaleleia foi ona togi.
E oo atu i le faaiuga o le tausaga aoga, ua tele uo a Siedeh. Sa ia fiafia na fesoasoani le Tama Faalelagi ia te ia ia lototele. Ma sa fiafia o ia sa mafai ona ia maua i taimi uma le faamanuiaga o le mana o le perisitua e fesoasoani ia te ia.
Ata na tusia e Susan Keeter