Ota, Kai n rawetamnei, Mwakuri n ibuobuoki!
Tikuia ni mwengaia e aki totokoia man karaoan te mwakuri n ibuobuoki.
Antonella ao Mariana a kan naanako n taromauri ni katoa wiiki. Ma ngkai ao a aki konaa n nako n taromauri ibukin butinakon te aoraki ae te COVID-19. A karaoa aia reirei n aia Moanrinan i aonrain, ma e bon kaokoro naba.
Antonella ao Mariana a mitina te nanako n te Moanrinan. Teuana te ririki n nako, a mwaing aia utu mai Chile nako Kanata. Te buti n aoraki e karika kangaangan karekean raraoia aika a boou. A mitina reiakinan karaki man booki aika tabu ma raraoia. Ao a mitina karekean reirei n taetae n Spanish n aron are rereke i Chile.
N te bong teuana, imwiin aia taromauri ni mweengaia, Antonella ao Mariana a kakaea n te aonrain tabeua ibuobuoki ibukin kamatebwaian Nakomai, Iriirai.
“Tera ngke ti kona ni kunei witeo n te taetae n Spanish,” e taetae Antonella. E iango tabeua te tai. Imwiina e reke ana iango ae tamaroa. “Ti kona ni karaoa oin ara witeo ibukin Nakomai, Iriirai ni katoa wiiki.”
“Eng, ao ti na karaoia n te taetae n Spanish!” e taku Mariana. “Ao ti kona n tibwauaia imwiina ma ataei tabeman naba.”
A taku Tinara ao Tamara bwa a kona naba n ibuobuoki. A bane ni kukurei te utu ae bwanin!
Te moan te utu a wareware ni booki aika a tabu n reirei n te wiiki. A baireia ataeinaine bwa tera ae a na maroroakinna. Imwiina a moana karaoan aia witeo. Antonella ao Mariana a ikaruoruo n rawei bwanaia ngke a maroroakini karaki man Ana Boki Moomon. N banen aia witeo, temanna mai ibuakoia e tibwai bwaai ake a reiakinna n te reirei. Imwiina Tinaia ao Tamaia a buokia ni katokai witeo iaonrain.
N te moan waaki, a aki kona n ataia bwa tera raoi ae a riai n taekinna. Ma warekan booki aika tabu ao reiakinan riki taian reirei e buokiia.
N te Taabati teuana, a tekateka Antonella ao Mariana i moan te kaombiuta ibukin aia reirei n aia Moanrinan. Te reirei n te wiiki anne bon rongorongoia taanga ni buaka n Ana Boki Moomon. “Bukin tera te taanga ni buaka a nako n buaka?” e titiraki aia tia reirei.
E kamatea te bwai n taetae Mariana. “I ataia,” e taku. Ngaia ma Antonella a karaoa te witeo ibukin te karaki anne n te wiiki ae nako. “A berita tamaia bwa a na aki buaka, ma a bon nako n buaka natiia mwaane.”
E katoua atuuna Antonella. “Ao e tuangiia tinaia bwa ngkana iai aia onimaki, E na kamanoia te Atua.” E moangare nakon Mariana. E kakukurei kamatebwaian booki aika tabu ni ikotaki.
N te tairiki anne n tain te katairiki, e titiraki Tinaia, “E uara aia Moanrinan?”
“Raoiroi!” E taku Antonella. “Karaoan taian witeo e buokai n reiakina riki ae mwaiti ibukin booki aika tabu.”
“Ngai naba!” e taku Mariana. “I kona n kaekai titiraki aika a mwaiti man te Moanrinan. Ao ti atai riki karaki man booki.”
“I kukurei ngkai witeo akanne a buoki ngkami,” e taetae Tamaia. “Au kantaninga e buokia naba aika a mwaiti!”
“Eti anne,” e taku Tinaia. “Tibwaakin are ko reiakinna ao arom n namakina te euangkerio bon te kawai ae korakora ibukin te beku!”
E moangare Mariana. “I kukurei ngkai ti kona n beku n te kawai aei,” e taku. Imwiina e taraa Antonella. “Ti a moana manga bairean ara witeo ibukin te wiiki ae na roko!”
Korotamnei iroun Kristin Sorra