E kanga Siedeh n Ninikoria
E rootia te maaku Siedeh ni kakaraki ma kaain ana kiraati.
E kakorakora ni ikerake Siedeh ao e a mwananga nakon ana kiraatirum ae boou. Ai bon tibwa moan ana bong n te koraki aua.
Te ririki ae nako, e mena Siedah n te koraki uoua. E rangi n tamaroa a na kekeiaki ngaia are a na reirei e a kakiba man te koraki teniua. E rangi ni kukurei Siedeh ni karaoa te numera ae kangaanga ao ni wareki booki aika ibukiia koraki aua. Ma e aki kukurei ngkai e nang kitaniia raoraona ake ngkoa.
Ngke e tabe n taratara nanon te ruu ni katoobibi, e namakina te maama Siedeh. A bane n taraa ni ikawai ao n abwabwaki nakoina raona n reirei ake a boou. Tera arona ngkana e aki namakina te mwengaraoi?
E rinea te taibora ao n tekateka. Te ataeinaine ae abwabwaki e tekateka irarikina. “Mauri,” e taetae Siedah.
“Tera ae ko karaoia ikai?” e titirakinna te ataeinaine arei. “I taku bwa ko bon riai ni mena n te kiraati teniua.”
“I kakerakeaki teuana te roro man te reirei,” E taetae ma te nako n nano Siedeh.
E ubu ni kaununna te ataeinaine arei. “Ma, I aki tabe bwa wanawanara ngkoe. Ko bon uarereke naba.”
E rangi n namakina te aki rau i nanona Siedeh. E rangi ni maroaa n taetae ma raona n reirei, n nikiran te wiiki anne. E na bae n ubu n nanokaawaki, ni katoaa te tai are e ongo ngarengaren ke ana wirikiriki temanna. Tao a bae n taekina ae e aki raoiroi ibukina.
Ngke e iangoia bwa bwaai aki kona n rangi ni buakaka, e karekea mwiin ana bwii Siedeh n te nuumera. E tangiria n tang ngke e taraa ana bwii. Te nuumera bon mamaten nanona n te reirei. E tuai man reke ana bwii ae uarereke n ana ukeuke mai imwaaina.
Ngke e roko ni mweengana, e aki konaa n tautaua ranin matana Siedeh. “Akea raoraou,” e tuangiia ana karo. “I aki riai ni mena n te kiraati aua. “I aki rangi ni wanawana.”
“I nanokawaki ngkai e matoatoa,” e taetae tinan Siedeh. “Ma ko bon wanawana. Ao ko bon tabe n reirei.”
E kaoa matana Siedeh. “Tera ngke I konaa n oki rikaaki nakon koraki teniua nakon ae I mena n koraki aua.”
E kainabwaabu tamana n te tai ae uarereke. “Ko kainnanoa te kakabwaia n te nakoanibonga?” E titiraki tamana.
E katoua atuuna Siedeh. Tao te kakabwaia mairoun Tamana e na buokiia n kabebetea.
E tekateka Siedeh n te kaintekateka, ao e a katoka baina iaon atuna Tamana.
“I kakabwaiako bwa ko na aki manga maaku,” e taku Tamana. “Ao I kakabwaiako bwa ko na tangiriaa raom n reirei aika a boou. Ngkana a kinako riki, a na bon tangiriko naba.”
E roko iroun Siedeh te namakin ae rau. E namakinna bwa taeka mairoun tamana bon taeka ae kantaningaia Tamana i Karawa bwa e na ongo.
Imwiin te kakabwaia, E buokaki iroun Tinana n ana kangaanga n ana nuumera. N te tai ae aki maan E namakinna riki ae raoiroi riki.
Te bong are imwiina n te reirei, E uringa kakabwaiaana Siedeh ao n kataia n ninikoria. E wingare nakoia raona n reirei. Ngkana e kaota te tangira, e namakina ae keerikaaki makuna irouia raona n reirei! Tabeman mai ibuakoia a bon rangi n tamaroa. E mwakuri korakora n reiakina te reirei ao n te tai ae aki maan a tamaroa ana bwii naba.
Imwain motirawan te reirei n te ririki, e a mwaiti raoraon Siedeh. E kukurei bwa Tamana are i Karawa e a tia ni buokia bwa e na ninikoria. Ao man kakaitau riki bwa e konaa ni karekea n tainaako te kakabwaia n te nakoanibonga ni buokaki iai.
Kamataataan te tamnei iroun Susan Keeter