E Korakora te Karongoaa!
A bane ni karongoa bwaai ni kabane. E na kunea iia te rau Luke?
E bura un Luke. A bane ni karongoa bwaai ni kabane. Tarina aika, Tadd ao John, a manga kauntaeka naba. Man te katangaina, e kona n ongo aia tatakarua man mataroan aia ru. Ao mwanena ae, Lizzie, e a manga katangi mwaaka naba ana katangitang. Bum. Bum. Bum. E teimatoa ni kona n ongo tangin te mwanewe are e rangi n rinano.
E kataia Luke n tuangiia tarina bwa a na katokia. “Naako,” e tuanga Tadd. Luke e a manga tuanga Lizzie bwa e na kauarerekea tangin ana katangitang. E a katangimwaaka riki ana katangitang.
E tangiria Luke n nako tinaniku bwa e aonga ni kona n iango. Ma e bon bwaka te karau.
Ma, iai te tabo teuana ae rau ae e kona n nako iai Luke. Ngkoananoa ana karo a anganna te ruu ae bon ti ngaia iai—te ruu ae e aki tibwaia ma Tadd ao John. Bon te ruu ae e mena i aan te auti. E bon tau buburana ibukin te kainiwene ao te taibora. Ma man ana ruu Luke e kona ni kaina te mataroa ao ni kararoa man te karongoa.
E ruo rikaaki Luke nakon ana ruu ae boou. E tarai taian bwaoki ake e a kaman uoti rikaaki mai imwaina. E nora tamnein Iesu n terenako man te bwaoki. E karekea te tamnei anne Luke n te bong are e bwabetitoaki iai. Taratarakina e aki toki n anganna te namakin ae te rau.
E kaotinakoa te tamnei Luke man te bwaoki. E katikua iaon te taibora. Ao e a katorobubua n tataro. “Tamau are i Karawa,” e taku Luke, “n tabetai e a rangi ni kaberoro ikai. Taiaoka buokai ni karekea te rau.”
E wene Luke iaon ana kainiwene. E iangoa aron Iesu. E a tia n reiakinna n te Moanrinan bwa Iesu e aki toki ni kaan nakoina. Ao te Tamnei ae Raoiroi e kona ni uota te rau n taainako.
Teutana te tai ao a oki Mom ao Dad man aia mwakuri. A marooro ma Tadd ao John. E na toki te un. N te tai ae uarereke. A marooro ma Lizzie. Lizzie e kauarerekea tangin ana katangitang. N te tai ae uarereke. Ni karokoa ae Mom ao Dad a manga nako naba.
Ma ngkai, e wene Luke n ana kainiwene. E taraa tamnein Iesu. “Taiaoka, Tamau are i Karawa,” e wirikiriki Luke. “Taiaoka buokai n namakina te rau n aki tabe ma te bwai ae e riki n te auti.”
Imwiina, e roko te karebwerebwe ni mataroan ana ruu. “I kona n rin?” E titiraki tinana. “Ko uara ngkai?”
“A manga un naba Tadd ao John,” e taku Luke. “Ao Lizzie e katanga ana katangitang ni katangi mwaaka.”
“I ataia. E kangaanga, tiaki ngaia?” E taku tinana. “Dad are e marooro ma tarim ngkai. Ao N na marooro ma Lizzie n te tairiki aei. Ma te moan bwai, I kan ataia bwa ko uara.”
“I Raoiroi. I kukurei ngkai e reke te ruu aei irou,” e taku Luke.
“Ngai naba,” e taku Mom. “I noria bwa ko katokaa tamnein Iesu iaon te taibora.”
E moangare Luke. “Eng I karaoia. Ao E na buokai ni karika au ruu bwa te tabo ae iai te rau iai.”
Kamataata n te tamnei iroun Bryan Beach