“Taoa blong Fet,” Fren, Julae 2023, 10–11.
Taoa blong Fet
Dashanel i wantem fet blong hem long Kraes i gro tolfala mo strong.
Stori ia i hapen long Jamaeka.
Dashanel i helpem bigfala brata blong hem blong tekem nat-bred aot long oven. !I smel gud tumas!
Afta, hem i harem wan noknok long doa. !“Ol misinari oli kam!” sista blong hem i singaot.
Dashanel i ron i go long doa. Hem i laekem tumas taem ol misinari oli kam. Oltaem Hem i oltaem gat wan gudfala filing taem olgeta oli visit. Samtaem oli karem ol pleiplei i kam blong hem mo ol brata mo sista blong hem .
“Tyrell i mekem nat-bred bakegen!” Dashanel i talem. Brata blong hem i laekem mekem kakae blong ol misinari.
“Mi no save wet moa blong traem sam,” Elda Colas i talem. Hem mo Elda Yusaki oli kam insaed mo sidaon long flo. Dashanel, brata mo sista blong hem, mo Mama, oli sidaon narasaed long fored blong olgeta.
?“Wanem nao bae yumi mekem blong lesen tedei?” Dashanel i askem.
Elda Yusaki i pulumaot wan stak blong ol kap. “Bae yumi bildim wan fet taoa. Wanwan long ol kap ia i ripresentem wan samting we yumi save mekem blong bildim fet blong yumi long Jisas Kraes.”
Elda Yusaki i statem blong stakem ol kap i go long wan taoa. Dashanel i luk se ol kap ia i gat ol toktok olsem “prea,” “skripja stadi,” mo “jos” oli raetem long olgeta.
“Hemia ol samting we yufala i askem long mifala blong mekem olsem wan famli,” hem i talem.
“Hemia nao,” Elda Colas i talem. “Taem yufala i mekem olgeta samting ia, yufala i stap bildimap fet blong yufala long Jisas Kraes.”
Dashanel mo ol brata mo sista blong hem oli gat janis blong bildimap taoa blong olgetawan wetem ol kap, taem olgeta oli stap lisin long lesen.
Afta we ol misinari oli go, Dashanel i tingting long wanem oli bin lanem. Hem i wantem fet blong hem long Kraes blong i gro tolfala mo strong, semmak long taoa ia we hem i bildim.
Manis i pas, Dashanel i bin lanem moa mo moa abaot gospel long ol misinari. Hem i statem blong stap go long jos wetem famli blong hem. Hem i pikjarem taoa blong fet blong hem we i stap gro tolfala mo tolfala.
Wan dei afta we ol misinari oli go, Dashanel i toktok long Mama. “Mi save kasem baptaes?” hem i askem.
?“Yu tru ia se yu rere?” Mama i askem.
“Yes,” Dashanel i talem. “Mi wantem folem Jisas.”
“OK,” Mama i talem. “Sapos yu wantem, yu save baptaes.”
Brata mo sista blong Dashanel oli jus blong baptaes tu. Mama i talem se hem i no filim se hem i rere blong baptaes yet.
Long dei blong baptaes blong olgeta, Dashanel mo ol brata mo sista blong hem oli werem ol waet klos. Wanwan long olgeta oli wet wetem fasin blong save wet long taem blong baptaes.
Taem we hem i taem blong Dashanel, Elda Yusaki i helpem hem i go insaed long wota. Afta we hem i talem prea blong baptaes mo draonem Dashanel i go insaed long wota. !Taem Dashanel i kamaot long wota, hem i no stop blong smael! Hem i filim hapi mo klin. Hem i neva wantem blong fogetem filing ia.
Dashanel i gohed blong mekem olgeta samting blong bildimap fet blong hem long Jisas Kraes. Hem i ridim ol skripja wetem famli blong hem. Hem i prea long Papa long Heven. Hem i mekem l kaen fasin long ol narafala man. Mo hem i tingbaot olsem wanem hem i filim taem hem i bin baptaes. Hem i wantem Mama blong hem i gat filing ia tu.
“Mama, from wanem yu no wantem baptaes?” Dashanel i askem wan dei.
Mama i stap kwaet blong wan minit. “Yu bin soem wan gudfala eksampol long mi. Naoia mi nidim blong soem wan eksampol long yu,” hem i talem. “Mi wantem blong baptaes tu.”
Long dei blong baptaes blong Mama, Dashanel i bin hapi tumas. Taem Mama i kamaot long wota, evriwan oli stap smael. Naoia ful famli blong Dashanel oli save bildim ol taoa blong fet blong olgeta tugeta.
Ol pikja droing oli kam long Alyssa Tallent