“Gudfala Papa blong Magnolia,” Fren, Julae 2023, 40–41.
Gudfala Papa blong Magnolia
“Sam pikinini oli talem se yumi i no wan gudfala famli from Papa hem i no wan memba blong jos blong yumi.”
Stori ia i tekem ples long YSA.
“!Magnolia! !Lily!” Papa i singaot !“Taem blong ol skripja mo prea!”
Magnolia i foldaon long flo kolosap long dog blong olgeta, Raindrop. Lily i muv i go insaed long fevret blangket blong hem.
Famli skripja taem hem i gudfala taem. Samtaem olgeta oli aktem ol skripja stori tugeta. I helpem Magnolia blong pikjarem ol stori. !Mo tu, Raindrop oltaem i help taem i gat ol animol long ol stori!
Papa i openem ol skripja mo ridim wan ves. Afta hem i pasem bigfala, hevi Baebol long Magnolia. Olgeta wanwan oli gat janis blong rid.
“Yufala i mas kaen gud long olgeta.” Magnolia i ridim.*
Hem i mekem fes i nogud. Pipol oli no stap kaen tumas long hem long jos.
“Mama, Papa, mi save toktok long yutufala abaot wan samting?” hem i askem.
“O yes,” Mama i talem. “Wanem ia?”
“Long Praemeri yestedei, sam pikinini oli talem long mi se yumi no wan gudfala famli from Papa i no wan memba blong jos blong yumi.”
Papa blong Magnolia i memba long wan nara jos. Hem i go long sakramen miting wetem famli blong olgeta long ol Sandei. Hem i givim toktok abaot Tabu Spirit long baptaes blong Lily mo Magnolia. Evriwan i talem se hem i mekem wan gudfala wok. Hem i wan gudfala papa.
“Wanem we oli talem i mekem mi wantem blong krae.” Magnolia i krae smolsmol. “From wanem nao pipol oli gat strong fasin olsem?”
Mama mo Papa i lukluk tufala.
“Mi glad we yu talem long mitufala wanem we i bin hapen,” Papa i talem. “Mama mo Mi i lavem wanwan long yutufala tumas. Mo famli blong yumi i impoten tumas long mitufala.”
Mama i sakem hed blong hem blong agri. “Mo famli blong yumi i impoten tu long Papa long Heven. Hem i lavem evri pikinini blong Hem.”
Raindrop i muv i go kolosap long Magnolia. Hem i skrajem ol sora blong hem.
“Papa long Heven i save yumi, mo Hem i save se yumi lavlavem wanwan long yumi,” Papa i talem. “I nogat wan famli we i stret gud evriwan, be yumi save gohed blong stap traem bes blong yumi.”
“Be i soa yet taem pipol oli talem ol strong toktok olsem abaot famli blong yumi,” Magnolia i talem. “Jisas i tijim yumi blong stap kaen long evriwan. Stap talem ol strong toktok i no soem fasin blong stap folem Jisas.”
“Hemia nao,” Papa i talem. “Ating taem yu filim blong sakem wan strong toktok, yu save tingbaot olsem wanem yu bin filim taem ol narafala man i no bin kaen long yu. Afta yu save talem wan toktok we i gud.”
Magnolia i pulum gud win. “Okei.” Hem i glad se hem i save toktok long Mama mo Papa.
“Taem blong famli sanwij!” Papa i pulum Lily mo Magnolia i go long hem mo givim wan bigfala hag mo skwisim tufala taet. Mama i putum ol han blong hem raon long olgeta tri. Raindrop i ron raon long evriwan long wan sekol.
“Mi no save pulum win!” Lily i mekem fani. Magnolia i laf.
“Naoia talem blong mi bakegen—taem blong hu nao blong rid?” Papa i askem. Hem i lego ol gel mo pikimap ol skripja blong hem.
“Taem blong mi nao!” Lily i talem. “Mo hem i taem blong Papa blong prea.”
Taem oli rid finis, evriwan i nildaon long prea. Magnolia i filim pis insaed long hem taem hem i stap lisin long Papa i talem prea. Hem i save se Papa long Heven i lavem famli blong hem.
Ol pikja droing oli kam long Constanza Basaluzzo