“I Stat long wan Fil blong Besbol,” Fren, Julae 2023, 32.
Fren i go long Fren
I Stat long wan Fil blong Besbol
Tru long wan intaviu wetem Lucy Stevenson Ewell.
Ol pikja droing i kam long Brian Michael Weaver
Taem mi gat 13 yia, mi plei long wan besbol tim wetem sam fren. Mi no bin wan memba blong Jos Ia blong Jisas Kraes blong Ol Lata-dei Sent, be tu tim memba oli joenem Jos. Tufala i twin. Nem blong tufala hem i Rob mo Lane.
Wan dei long praktis tufala i invaetem mi blong go long famli haos naet wetem famli blong tufala. Mi no bin save wanem hem i famli haos naet, mekem se mi askem. Tufala i talem long mi se bae mifala i lanem abaot ol samting blong jos mo singsing ol singsing. Mi no bin glad tumas long hemia. Be oli promes se bae i gat aeskrim mo kek, mekem se mi disaed blong go.
Famli blong mi i go long haos blong olgeta blong famli haos naet. Mi filim se wan samting i defren tumas. Mi no save se hem i wanem, be i olsem se mi save. Hem i filim gud. Mama blong mi i filim tu.
Mi no bin save long taem ia se mama blong mi hem i wan memba blong Jos. Hem i bin baptaes olsem wan yangfala woman. Be hem i bin stop blong go long jos.
Afta long naet ia, mama blong mi i stat blong go long jos bakegen. Mi go wetem hem blong lanem moa. Sam manis afta, papa blong Rob mo Lane i baptaesem mi.
Mi mi glad tumas se Rob mo Lane i kea inaf abaot mi blong serem gospel. Tedei mi mi gat blesing blong gat wan famli we i no save finis. Mo i bin stat long wan fil blong besbol
Olsem Rob mo Lane, yu gat wan strong paoa blong mekem nara man i jenis. Yu save mekem wan samting i defren long famli blong yu. Yu save serem gospel wetem ol fren blong yu.