“Kofta blong Lanj,” Fren, Julae 2023, 12–13.
Kofta blong Lanj
“Wanem kaen samting ia yu stap kakae?”
Stori ia i tekem ples long YSA.
Roy i sidaon kolosap long tebol mo openem lanj bag blong hem. Famli blong hem oli jes muv nomo, mo hemia i fas dei blong hem long niu skul blong hem. Mama blong hem i mekem fevret kakae blong hem we hem i kakae blong ol man Aremia, kofta. !Hem i glad tumas blong kakae!
Roy i karemaot pepa we oli kavremap raon long kofta. Hem i olsem wan long, bunbun mit bol. Hem i laekem smel blong ol pima we oli kukum insaed long mit . Mo hol long medel blong mit ia, i luk olsem wan wesil. Hem i putum long maot blong hem mo blo. Afta hem i kakae smol pis. !I tes naes tumas!
“E,” wan boe narasaed tebol i talem. “Wanem kaen samting ia yu stap kakae?”
Fes blong Roy i red from hem i sem. !“Hem i lanj blong mi”
“Tru, be i no luk gud nomo.” Boe ia i laf.
Roy i no save wanem blong talem. Hem i no bin save se i nogat wan man long ples ia i kakae kofta. !Hem i no wantem olgeta oli tingting long hem se hem i defren! Mekem se hem i putum bak lanj blong hem mo ron i go aotsaed blong brek.
Afta skul, Roy i faenem Mama blong hem i stap openem ol bokis.
“Mi no wantem tekem kofta i go long skul bakegen ,” Roy i talem.
“?From wanem?” Mama i askem. “Hem i fevret blong yu ia.”
Roy i talem long hem wanem i bin hapen long skul. !“I mekem mi sem we!”
“Mi sori long wanem i bin hapen,” Mama i talem. “Plante man long ples ia i neva kakae kofta. ?Olsem wanem sapos yumi givim long ol nara pikinini wan janis blong traem sam?”
“?From wanem?” Roy i askem. “Olgeta bae oli no kakae ia.”
!“Tru, be bae yu no save kasem taem yu askem! Mi save se i had blong mekem ol niufala fren. Be yumi evriwan i ol pikinini blong God. Samtaem yumi nid blong save moa abaot wanwan long yumi.”
Roy i tingting long hem. Hem i no wantem oli laf long hem. Be hem i wantem givim ol pikinini long lanj wan gudfala janis blong andastanem. Mo kofta i tes naes tumas.
Hem i saksakem hed blong hem blong agri. “Okei. Yumi mekem plante.”
Nekis dei long lanj, Roy i pulum gud win. Hem i sidaon kolosap long boe we i bin laf long hem.
Roy i openem lanj bag blong hem. “Wan long yufala i wantem traem sam kakae blong ol man Aremia?”
Ol nara pikinini oli kam raonem Roy taem hem i stap karemaot pepa long kofta.
“Bae mi traem sam,” boe ia i talem.
“Mi tu,” wan gel i talem. Roy i pasem raon kofta blong evriwan i save traem. Afta olgeta evriwan oli testem smolsmol.
!“Hemia i naes tumas!” boe ia i talem. ?“Oli singaotem wanem?”
“Kofta,” Roy i talem.
“!Naes tumas!” Boe ia i smael. “Mi mi Jon. Yu wantem pleplei long brek?”
Roy i saksakem hed wetem maot blong hem i fulap blong agri. Mama blong hem i talem tru—olgeta evriwan oli ol pikinini blong God! Mo stap serem kakae, i bin helpem hem i blong gat plante fren.
Pikja droing i kam long Mak Robison