“Klinap Long Garen,” Fren, Julae 2023, 4–5.
Klinap Long Garen
“Hu nao bae yumi save invaetem blong helpem yumi?”
Stori ia i bin tekem ples long Inglan.
Jona i kakae las pis blong kakae blong hem mo smael. Dina i oltaem fulap wetem glad taem ol misinari oli kam.
“Mifala i wantem blong serem wan mesej wetem yu abaot seves,” Sista Kearl i talem. “From wanem nao stap givim seves long narafala man hem i impoten?”
!“From i mekem Jisas i hapi!” Elisa, smol sista blong Jona i talem.
!“Yes, i tru! Hem i mekem Hem i hapi tumas. Mo taem yumi helpem ol narafala man, hem i mekem yumi hapi tu,” Sista Christensen i talem. “Yu yu save eniwan we i nidim help?”
Jona i tingting smol taem. “Mi no save tingbaot wan man, be garen blong mifala long skul i nidim help.”
“Gudfala tingting,” Mama i talem.
Skul blong Jona i gat wan garen we oli stap yusum blong mekem ol aktiviti blong aotsaed. Be garen ia i nogat wan i bin klinim blong longtaem. Ol bus long garen oli gro bigwan. I gat plante rabis gras tu.
!“Mifala i glad blong helpem yu wetem hemia!” Sista Kearl i talem. “Hu nao yumi save invaetem blong helpem yumi klinim?”
“Ol kasen blong mifala!” Jekob, brata blong Jona i talem.
“Mo Praemeri klas blong mifala,” Jona i talem.
Long nekis dei, Mama i toktok long wan long skul blong karem raet long hem. Oli jusum wan dei blong klinim garen. Afta Mama i helpem Jona mo ol brata mo sista blong hem blong kolem ol kasen blong olgeta, mo klas blong Praemeri.
Sam wik afta, Jona mo famli blong hem i mitim ol misinari long skul. Ol kasen blong olgeta mo ol Praemeri fren oli stap ia tu. !Hem i taem blong go long wok!
Jona i putum tu bigfala raba han-klab blong garen long tugeta han blong hem. “Luk, Mama. !Ol han blong mi oli bigwan we !”
Mama i laf. “Yu save yusum ol bigfala han ia blong katem i sot ol bus ia.”
Hem i givim long Jona sam sisis blong garen we i luk olsem ol bigfala sisis. Afta hem i helpem Jona blong katemaot ol ded branj.
“Hemia i gud tumas,” Jona i talem.
Taem Jona i stap katem bus i sot, Elisa i help blong digim graon raon long garen. Jekob i helpem Papa blong bildim wan niu haos blong pijin. Ol narawan oli pulumaot ol rabis gras mo pikimap ol stik. Olgeta oli putum olgeta insaed long ol bigfala blu plastik bag. Iven yangfala brata blong Jona, Esra, i help blong pikimap ol ston.
I no longtaem garen i klin. Jona i kaontem ol bag we oli bin fulumap. !“I gat 13 bag evriwan!” hem i talem. “Yumi klinim tumas toti.”
Sista Christensen i smael. “Naoia yumi nidim ol bigbigfala masel blong evriwan blong helpem karem olgeta ia i go long trak.”
Jona, Jekob, mo Elisa i karem wanwan bag. Jona i filim hapi taem hem i leftemap las wan i go long trak. Helpem ol misinari hem i wan gud taem. Hem i wantem kam wan misinari wan dei tu. Kasem taem ia, i gat plante wei we hem i save givim seves. !Hem i no save wet blong tingting long nekis projek blong hem!
Pikja droing i kam long Samara Hardy