“Strong Tingting we i kam long Tabu Spirit,” Fren, Julae 2023, 29.
Man we i Raetem i Yu
Strong Tingting we i kam long Tabu Spirit
Pikja droing i kam long Toby Newsome
Taem mi smol, ol dokta oli talem long papa mo mama blong mi se mi gat sik ia blong fraet blong toktok long ol nara man. Hem i wan sik blong tingting we i mekem se i had blong toktok long ol nara man. Mi save toktok nomo long ol famli memba blong mi we oli kolosap long mi.
Mi filim wari oltaem, speseli sapos wan man i toktok long mi. Prea oltaem i mekem mi filim moa gud mo mekem mi stap kwaet. Mi luk wan kaonsel long skul blong help. Be mi filim olsem se mi no kam oraet nomo. Mi filim olsem se mi wantem givap, be mi gohed blong stap gat fet.
Eit yia betdei blong mi i stap kam kolosap. Papa mo Mama blong mi oli jalenjem mi blong ridim Buk blong Momon mo prea blong helpem mi disaed blong baptaes no nogat. Evri naet mi prea blong askem sapos mi mas kasem baptaes. Mi oltaem gat semmak ansa—wan wom, kwaet filing long hat blong mi. Mi save se Tabu Spirit i stap talem long mi se baptaes hem i wan raet joes.
Taem mi kasem presen ia blong Tabu Spirit afta long baptaes blong mi, mi harem ol toktok blong hop, lav, mo fasin blong stap leftemap tingting. Mi save se Tabu Spirit bae i kamfotem mi mo givim mi strong tingting.
Mi disaed blong traem toktok wetem bes fren blong mi, Charlie. Mi traem ful wik, be hem i had tumas. Be wan dei Charlie mo mi i stap mitufala nomo long skul garen. Mi talem wan kwaet prea long hed blong mi. Papa long heven, plis helpem mi blong talem wan toktok nomo.
Afta mi openem maot blong mi mo talem, “E, Charlie!” Hem i sapraes tumas. !Mi bin glad tumas!
Afta long dei ia, hem i isi moa blong komplitim ol gol blong mi. !I no longtaem mi stap toktok long kolosap evriwan! Mi glad tumas we Tabu Spirit i givim mi strong tingting blong toktok long Charlie.