“Te Bwai n Tangira ae Onoti,” Te Rao, Aokati 2023, 18–19.
Te Bwai n Tangira ae Onoti
“Aio e bon bae n ae te Tamnei ae Raoiroi,” e iango Mehrimah.
E riki te karaki aei i Buranti.
“Mehrimah! Fatima! Ae a roko mitinare!” e wewete tinaia.
E kaina ana boki n karaki man Booki Aika a Tabu Mehrimah ao e biri nakon te katangaina. Mitinare a bon reireiniia aia utu taekan Iesu Kristo. Mehrimah ao ana utu bon iaon kawaia n bwabetitoaki. E aki kona tataninga!
E tekateka ma ana utu Mehrimah.
“N te bong aei ao ti na marooro iaon te Tamnei ae Raoiroi,” e taku Unimwaane Moea’i. “E buokiira n namakina te rau ao te mweengararoi mai iroun Tamara are i Karawa.”
“E kaungaira naba bwa ti na karaoi bwaai aika raoiroi,” e taekinna Unimwaane Campbell. “Ao E buokiira n ataa te koaua. Ko a bon bae n tia n namakina te Tamnei ae Raoiroi.”
Mehrimah e iangoa moan reiakinan Ana Boki Moomon. E a tia n namakina te rau ao te kukurei. Anne ae e ataia bwa e koaua. Bon anne te Tamnei ae Raoiroi?
“Imwiin bwabetitoakim, ko na anganaki te bwaintituaraoi ae te Tamnei ae Raoiroi,” e taku Unimwaane Moea’i. “Are nanona E na kona ni mena iroum n taainako n buokiko ao n kairiko.”
“N te wiiki aio, tarataraa raoi am iango ao am namakin,” e taku Unimwaane Campbell. “Tarai taai ngkana e taetae nakoim te Tamnei ae Raoiroi.”
N te tairiki anne n tain ara tataro n utu, Mehrimah e noora aron ana namakin inanona. E namakina te mweengaraoi ao te rau. Kanga ai aron ae e namakinna bwa iai ae inga nakoina. E bon bae n ae Te Tamnei ae Raoiroi, e iangoia.
N tain te taromauri n te Tabati, e kakauongo Mehrimah nakon te anene ae taekan Iesu Kristo. E namakina te kukurei. E anganna te namakin ni kan buokiia aomata. E bon bae n ae Te Tamnei ae Raoiroi naba, e iangoia.
Imwain matuuna, Mehrimah e wareware n ana boki n karaki man Booki Aika a Tabu. Tarina, Fatima, e bubutiia bwa ai manga ana tai. E taku Mehrimah ko aki.
E reitinako ni wareware Mehrimah. Ma e a buakaka ana namakin ngke e aki kan tibwauaa ana boki ma tarina.
“Kabwara au bure.” e tuanga Fatima. “Ko tangiria bwa tina uaia ni wareware?”
E tekateka Fatima irarikina. A ikaruoruo ni wareware. Mehrimah e namakina te rau ao te kukurei. E bon bae n ae Te Tamnei ae Raoiroi, e iangoia.
N tokina e a roko aia bong ni bwabetito. A nako Mehrimah ma ana utu nakon te umwantabu ao a oneiia nakon kunikai aika mainaina.
E bwabetitoaki moa Mehrimah. E mwaitorotoro te ran, ma e kukurei ngkai e karaoa te berita ae tabu ma Tamana are i Karawa. E niiroaia tinana n te taara. Ao ngkanne e a mataku ngke a bwabetitoaki tinana, tamana, ao Fatima.
E a manga oneia Mehrimah nakon oneana aika a mwau. Ngkai e a bon boo aia tai n kamatoaaki.
A katokai baia Mitinare iaon atuun Mehrimah. “Ti kamatoako bwa kaain Ana Ekaretia Iesu Kristo ibukiia Aika Itiaki ni Boong aika Kaitira,” e taku Unimwaane Campbell, “ao n atonga ae kangai nakoim, e a reke iroum Te Tamnei ae Raoiroi.” E namakina te rau Mehrimah ngke e kakauongo nakon nikiran te kakabwaia are e anganaki.
Imwiin kamatoaan Mehrimah, e inga tinana nakoina. “Tera am namakin?”
“E rangi n tamaroa,” e taku Mehrimah. “Imwiin are a kamenai baia iaon atuu, I namakina te bwai teuana, ao kanga namakinan te rau.” E moangare. “Kanga ai aron ae iai ae tuangai bwa N na maiuakina te maiu ae tamaroa, ni buokiia aomata, ao ni kawakin tuua.”
“Ko ataia bwa tera ae ko namakinna anne?” E titiraki Tinana.
“Eng, I ataia,” e taku Mehrimah, ma matana aika takiakia. “Bon te Tamnei ae Raoiroi!”
Kamataata n te tamnei iroun Alyssa Petersen