“Ko Bon Aki Tiku N Tii Ngkoe,” Te Rao, Aokati 2023, 22–23.
Ko Bon Aki Tiku N Tii Ngkoe
Tera ae e na riki ngkana e manga ikoaki riki Ethan ao akea ae E na buokia?
E riki te karaki aei i Amerika.
E karaua n bwamiia rangana Ethan iaon te tie. E a rokoroko i karawa. Te ang e anganna te namakin bwa kanga ai aron ae e kiba!
Ngkanne e a tang te beero. E katiinakoa te ang Ethan. E bon tuai tauraoi nanona bwa e na bwara te bureiki.
A tei n te rain ataei n rinnako. E karauraua tiena Ethan. E a ruo man te tie bwa e nang okira ana kiraati.
Ma ngke e toko waen Ethan iaon tano, e namakina te maraki ae korakora ni waena. E bwaka nako aontano. E kataia n teirake, ma rangana kanga ai aron ae e ura te ai inanona. E bon rangi ni maraki!
“Buokai!” E takarua Ethan. A bwaro ranin matana nako aon tabana. A biri ataei ma taan reirei ni buokia.
“Tera ae e riki?” e titiraki te tia reirei.
“E a mwaoto waeu!”
Aio bon tiaki te moan tai ae mwaoto Ethan. Tiaki naba te kauoua ke te kateniua! Bon iai aorakin riin Ethan, te aoraki are e karika riina bwa ana kakai mwaoto. Bwaai aika uarereke, n aron te ruo man te tabo ae rieta ke untabana ma temanna, e kona ni mwaoto iai riina.
“Ti na tarebooniia am karo bwa ana karekea te taokita,” e taku te tia reirei. “A na nakoraoi bwaai ni kabane.”
E rangi ni kukurei Ethan ngkai iai aika a kona ni buokia. E bon rangi ni maraki waena, ma e ataia bwa e na bon mano.
Tamau ao Tinau a nakon te reirei ao a uota Ethan nakon te taokita. E a karekea rabunan waena ae buruu ao e oki nakon mweengana ni motirawa.
Ibukin mwaoton waena, e tiraua ana tai Ethan are e a kabanea iaon ana kainiwene. E tiraua ana boki ae e na warekii. Tabetai a roko raoraona n takakaro ma ngaia. Ma e bon teimatoa ni botu.
Teuana te tairiki, e a uti Ethan ao e aki kona ni manga matu. E kataia ni kamotirawa rabwatana, ma e bon teimatoa n raraoma. Tera arou ngkana I mwaoto ao akea ae e mena ikekei, n aekakin tao n te nuukaniboong? E iango Ethan. E bukibuki manawana. E namakina te maaku.
“Tamau!” E takarua Ethan.
E biri tamana nakon ana ruu Ethan. “Tera ae riki?”
“I maaku,” e taku Ethan. “Tera arou ngkana I mwaoto ao akea ae e mena ikekei bwa e na buokai?”
E tekateka tamana irarikina iaon te kainiwene. “Anne bon te iango ae kakamaaku,” e taku. “E ngae ngkana ti kataia n taratara raoi ao n kamanoira, ana bon kona naba n riki bwaai aika buakaka. Ma e ngae n anne, Tamara are i Karawa e bon tarataraiko.”
“Nanona E meemena irarikiu n taainako?” E taku Ethan.
“Bon ngaia raoi anne.” Tamana e angan Ethan te inga ae marau.
E iangoa aron waekoan tamana n roko n buokia Ethan. E ataia bwa tamana e bon tangiria ao e kan buokia n taainako. Tao ngkanne ai bon aron naba Tamana are i Karawa.
N te bong are imwiina, e a wareka te kibu n te Rao maekatiin. E taku, “Kukurei, ao tai maaku, bwa Ngai te Uea I mena iroumi, ao n tei ibukimi.”*
E namakina te rau ao te mano ngke e wareka te kibu arei, kanga ai aron ngke e marooro ma Tamana. E ataia bwa bon te Tamnei ae Raoiroi are e anganna te mweengaraoi. Kanga ai aron are e rabwatia tamana riki.
N na bon bae n mwaoto riki, e iango Ethan, ma N na bon aki maaku. E ataia bwa e na bon aki kona n tiku n tii ngaia.
Kamataata n te tamnei iroun Simini Blocker