“Te Mae n Roroa ae Raneanea,” Te Rao, Aokati 2023, 42–43.
Te Mae n Roroa ae Raneanea
E tangiria ni kan taua te mae arei teutana riki te tai.
E riki te karaki aei i Argentina.
E riaon te marae Carolina. Raoraona are Isabella e bon mena i tinaniku.
E katea baina Isabella. “Nakomai ao takakaro!”
E toua te marae Carolina nakon ana auti Isabella.
E karina baina inanon buuana Isabella. “I tangiria ni kaota te bwai teuana nakoim,” e taku. E a buuta te kabanea n tamaroa ni mae ae e tuai man nonoria Carolina! Katamaaroana ake a uarereke a raneanea man oota.
“Bon ana bwai tinau,” e taku Isabella. “E taku bwa I kona n takakaro ma ngaia n te bong aei. Ao bon taraia iaan te riringa.”
E kateia Isabella nakon te oota. Bubua ni wiirara a kaoka otan tenaan katamaroa. E bon rangi n tamaroa!
“Ngkai ti a takakaro n te ikaraaba!” E taku Isabella.
“Ngaia!” e taku Carolina. “I kona n ibuobuoki n kamanoa te mae.”
“Ko rabwa!” Isabella e angan Carolina te mae, ao Carolina e a karinna ni buuana.
Imwiina e a roko ana tai Carolina n okira mweengana. Ngke e kaboo, Isabella e aki kan titiraki ibukin te mae. Tao e a bae ni mwaninga. Ao Carolina e aki kan kauringa.
E bon buakaka ana namakin Carolina ngke e uota te mae nakon mweengana. Ma e tangiria ni kan taua te mae arei teutana riki te tai. E aki tabe ma te namaki are buakaka arei ao e a kamenaa naba te mae iaan uningana.
Te bong are imwiina bon te Kaonobong. E karaoi tabena Carolina ao e a nako tinaniku n takakaro. E bon mwaninga taekan te mae.
“Carolina!” E wewete tamana. “Ko kona n nakomai moa?”
E biri n rinanako Carolina. “Eng?”
E a katea te mae tamana inanon baina. “Mama e kunea te bwai aei iaan uningam. Antai ana bwai?”
“Ana bwai Isabella.” A taonako ranin matan Carolina. “I bon kawakinna ni kamanoa inanon buuau ngke ti takakaro ngkoananoa. Ma ngkanne imwiina I a motikia bwa N na uotia nakon au auti.”
Carolina e a tekateka ma tinana iaon te kaintekateka ae maraurau. “Ko rabwa ngkai ko tuangiira te koaua. Tera N am iango ae tina karaoia ngkai?”
E aki karongoa Carolina. E iangoa aron Iesu. E bon bae n tangiria bwa e na kaota te koaua ao n kaoka te mae.
“N na riai n kaokia nakon Isabella ao n kabwara au bure nakoina,” e taku Carolina. Bon ngke e atonga naba arei, e a bon nako naba te namakin are buakaka arei. E namakina te kukurei inanona.
E nako Carolina nakon ana auti Isabella.
“Mauri,” e taku Carolina. E angan Isabella te mae. “Kabwara au bure kai I taua te bwai aei. Ko kukurei n kabwara au bure?”
“Eng,” e taku Carolina. “Ko rabwa kai ko kaokia.” Imwiina e wiingare. “Ko tangiria n takakaro n te ikaraaba?”
“Eng! Ko wareware moa—Ngai N na karabaai!”
N te tairiki anne, e tataro Carolina. “Tamau are i Karawa, taiaoka kabwara au bure ngkai i taua te mae. Ao Ko rabwa ngkai ko buokai ni kaetia.”
E namakina te kukurei inanona Carolina. E kukurei ngkai e kona ni karaoa are e tangiria Iesu bwa e na karaoia.
Kamataata n te tamnei iroun Sue Teodoro