“Karakinan te Waaki n Kakukurei n te Utu,” Te Rao, Aokati 2023, 30–31.
Karakinan te Waaki n Kakukurei n te Utu
“Ko kona n tuangai riki karakinan te utu?” E titiraki Lorrain.
E riki te karaki aei i Vanuatu.
E wiingare Lorrain ngke e anenei kabanean taekan te kuna. E a bon tibwa bwara aia tai n anene n te Moanrinan. Ngkai e a bon boo aia tai n nakon aia kiraati.
Ma, e a teirake Titita Taleo. “I tangiria ni kan kaongoi ngkami taekan te waaki ni kakukurei n te Moanrinan ae e a uakaan,” e taku. “Ti tangiri ngkami n tatabemani ngkami nako bwa kam na reiakina rongorongoia kaain ami utu. Tuangiia ami karo karakinaia ami utu. Ngkanne n tain te waaki ni kakukurei, kam kona n tibwauai bwaai ake kam a tia n reiakin.”
Ngke e roko ni mweengana Lorrain imwiin te taromauri, e rangi n ingainga. E reke irouna te beeba ae rangi ni bubura ao e a uotia nakon te taibora. E a bon rangi ni kan reiakina rongorongoia ana utu!
E a korea tamnein te kai ni kateiriki Lorrain iaon te beeba. E buokia tinana ao tamana n tiberingii aara ni kabane. Ngkanne e a kanimii tamneia kaain ana utu iaon te beeba arei.
“Aran tibutorum te unaine bon Lorrain naba,” e taku tinana. “Ti bon araniko imwiina.”
“Auee,” e taku Lorrain.
“Tibum ae Lorrain bon te aine ae rangi n tatangira.” E wiingare tinana. “Ngke a bane kanaan aia ai aomata n te kaawa, tibum ae Lorrain e tibwauai ana aia ma ngaiia.”
Reiakinan taekaia ana utu e bon kaunga! “Ko kona n tuangai riki karakinan te utu?” E titiraki Lorrain.
“E kona n karakina nakoim moan rokona n te tembora tamam,” e taku tinana. “Ai tibwa onoua ana ririki n te tai anne. Ngaia ma ana karo a kataua te mwananga ae abwaabwaki nakon te tembora i Nu Tiran.”
E tatangiria ni kan ongongora rongorongon te tembora Lorrain. “Karakinna nakoiu, Tamau!” e taku.
“Te moan bwai ti bon toka n te waanikiba nako Nu Tiran. Ti a manga buti n te bwati. Bon te mwananga ae abwabwaki.” E kaota tamnein te tembora taman Lorrain nakoina. “N tokina ngai ma au karo ti a rin inanona. Ti a kabaeaki bwa te utu. Anne nanona bwa ti a ikotaki n aki toki!”
Anne e angan Lorrain te kukurei inanona. E kukurei ngkai e kona n ongora karakinaia ana utu.
N tokina e roko ingabongin te waaki ni kakukurei n te Moanrinan. Lorrain e bon buoka tinana ao Titita Taleo n katauraoi bwaai ni kabane n te umwantabu.
Ao a ongo te rongorongo ae moan te kakukurei. E nang kateaki te tembora iaon abaia!
E bon rangi ni kukurei Lorrain. Ngkana e a roro raoi n te rin n te tembora, e aki kainanoia bwa e na mwananga n ae raroa!
N te tairiki anne, a bane n roko raoraon Lorrain n te waaki ni kakukurei n te Moanrinan. Ataei a bane n tibwauai bwaai ake a tia n reiakin n aia utu. Ngke e a roko n ana tai Lorrain, e a kaota ana beeba are e mena iai ana kateiriki.
“I bon rangi ni kukurei n reiakinan taekan au utu,” e taku. “I reiakinna ae I ingoanaki imwiin tibutoruu te unaine. I reiakina naba te moan tai are a rin kaain au utu n te tembora. Te tembora e na buoka ara utu n riki bwa te utu ae akea tokina.” E a manga roko naba te namakin ni kukurei arei. “I rangi ni kukurei kai e nang reke ara tembora i Vanuatu ikai.”
E tekateka Lorrain ma te moangare iaon moamoana. E karabwarabwa ngkai e kona n rikirake n riki n aron Iesu. Ao e karabwarabwa ibukin te tembora! E aki kona n tataninga te bong are e na rin iai n te bong teuana.
Kamataata n te tamnei iroun Emily Davis