“Kangaanga n te Bwaaki,” Te Rao, Aokati 2023, 46–47.
Kangaanga n te Bwaaki
E ikerake Hunter. “I aki taetaekin taeka akanne.”
E riki te karaki aei i Amerika.
E biri Hunter n rinuukan te bwaaki ma raoraona. E moangare ngke e namakina te ang irarikina. E namakinna bwa e baiti ao ni bebete!
Kyle e moan taua te oo. “I moanna!” e takarua.
E roko n te oo Hunter teutana te tai imwiina. “E aki riai! Ko moan nako.”
“Eng,” e taku Miguel. “Ti a kaboo birimwaaka nakon te aroka!”
E manga moana birina riki Hunter. N te tai aio, e moan taua te arokka. Ma Miguel e mena raoi i akuuna.
“I moanna!” E taku Miguel.
“Ko aki, e moanna Hunter,” e taku Piper.
“Eng,” e taku Kyle.
E boti baina Miguel. Imwiina e a taetae buaka naba.
A ngare ataei ake tabeman. E a manga moan atonga naba te taeka arei Miguel, ao a manga ngare riki.
E nanokawaki Hunter. E ataia bwa te taeka arei tiaki te taeka ae raoiroi atongana. Ma e aki tangiria bwa e na ngareakinaki. E aki atonga te bwai teuana.
Piper e manga atonga te taeka ae buakaka teuana. Ngkanne Kyle e a manga atonga teuana riki.
“Ngkai atonga teuana, Hunter,” e taku Kyle.
“Eng, e nako,” e taku Miguel. “Atonga te taetae buaka.”
E ikerake Hunter. “I aki taetaekin taeka akanne.”
“E na bon aki kaikoakiko atongan teuana te taeka,” e taku Kyle.
“I rawa,” e taku Hunter.
“Ko maaku?” E ngare Miguel.
E namakinna bwa e moanna n bue ubun Hunter. “N nang nako n takakaro n te tabo riki teuana.”
Nikiraia ataei a tabe ni ngarengare ao n taetae buaka. E tangiria ni kararoaa Hunter. E aaki kakukurei n te tabo n takakaro ngkai. “Ti a manga kaitibo imwiina,” e taetae n karaurau.
E karinii baina Hunter inanon buuana ao e karaurau n nakonako rirarikiia ataei ake tabeman. E aki namakinna bwa e baiti ke n bebetei ngkai. E namakinna bwa e tineaki.
E nooria tamana ma tinana n tekateka iaon te kaintekateka. E katuka ana boki tamana. “Ko raoiroi?”
E kakui angana Hunter. “A moanna n taetae buaka. Ao ngai I aki kan karaoia, ngaia I a nako naba.”
E wiingare tinana. “E ninikoria anne.”
“Ti rangi ni kakatonga iroum,” e taku tamana. “E kangaanga karaoan rinerine aika a eti ngkana aomata ake irarikira aaki.”
E kanakoa angina Hunter. E kukurei ngkai e karaoa te rinerine ae eti, ma e aki raoiroi ana namakin.
“Ko tangiria n okira te auti?” E titiraki Tinana.
E tabe n iangoia Hunter. “Tuai moa,” e taku. E taraia ataei tabeman ake a bobotaki n takakaro n te zip rain. “N na nako n takakaro ikekei.”
Ngke e nakonako Hunter, temanna mai irouia mwaane e katea baina nakoina. “Mauri, arau David.”
“Ngai Hunter. “I kona n kibakiba ma ngkoe?”
“Eng!”
E roko ana tai Hunter n te zip rain ao n namakina te ang rirarikina. Ngke e takakaro ma David ao ake tabeman, e namakina te baiti ao te bebete riki. E a tia n karaoa ae e eti, e ngae ngke e rangi ni kangaanga. E kukurei ngkai e a tia ni karaoa ana rinerine ae eti.
Kamataata n te tamnei iroun Shawna J. C. Tenney