“Te Bwatoro n Ran are E Uruaki,” Te Rao, Aokati 2023, iteraniba–iteraniba.
Te Bwatoro n Ran are E Uruaki
E bwatakataka Kadie. E na kanga n ibuobuoki Sophia?
E riki te karaki aei i Sierra Leone.
E kakauongo raoi Sophia nakon ana tia reirei ngke e kabwarabwara te numera iaon te burakibooti.
“Ao, tera reken ruaiwa kamaitia aua?” e titiraki te tia reirei.
E katea baina Sophia. “Tenibwi ma onoua!” e taku.
E wiingare ana tia reirei. “E eti anne, Sophia!”
Imwiin te kiraati, e a boo aia tai n okira mweengaia. E rianna Sophia ma raoraona. A bane n butii aia bwatoro n ran ao ni mooi ni kabanean aia ran. E kabuebue te bong aei!
Ma Sophia e noora te bwai ae kamiimi. Raoraona are Kadie e aki mooi n te ran. E bon tii rianna n aki beroro.
“Kadie, e ngaa am bwatoro n ran?” E titiraki Sophia. A bon bane ni bwatakataka n taainako te koraki ni bwaran te reirei.
“E uruaki irou ngkoananoa, ao I aaki kona n karekea ae boou,” e taku Kadie. “Ngaia are ngkai I aaki kona n uota au ran nakon te reirei.”
Sophia e baraaki n taraa ana rabwa n ran. E tangiria bwa e na kona n ibuobuoki! Ma e a bane ana ran.
N te bong anne, Sophia e iangoa Kadie ao ana bwatoro n ran are e uruaki. E rangi ni kangaanga aron reken te ran ae e itiaki n te tabo are a maeka iai. Angiia ataei tii teuana aia bwatoro n ran ae a bon kabonganaa naba ni kabanea te ririki. A kaonna man te kaonteina n ran ae bubura ae itiaki man mweengaia. Ko kona n aoraki man nimakin ran ake tabeua. Ngkana akea ana bwatoro n ran, e aki kona n reke te ran are e na uotia man mweengana bwa e na nimma n te reirei.
N te ingabong are imwiina, e karaua ni iangoia bwa e na kanga n buoka Kadie. Ana utu Sophia bon iai tabeua aia bwatoro aika raabwa aika a onrake n te ran. E anaa teuana Sophia nakon ana baeki n reirei, n ikotaki ma are bon ana bwatoro n ran. E bon katinebua ana baeki teutana, ma e aki tabe iai.
Ngke e roko n te reirei, e kunea Kadie.
“Kadie, e a tia n reke am bwatoro n ran ae boou?” E titiraki Sophia.
E ioioa atuuna Kadie ma matana nako naano.
“E raoiroi,” e taku Sophia. “Iai teuana ae I uotia ibukim!”
E angan Kadie te rabwa n ran. E wiingare Kadie.
“Ko rabwa, Sophia!” E koona mwaaka raoraona te inga ae korakora Kadie.
N tain te kiraati, e mooi man ana rabwa n ran Kadie ma ataei ake tabeman. E kukurei Sophia n nooria bwa raoraona e aki bwatakataka.
Ni katoa bong n te wiiki anne, Sophia e uota te rabwa n ran ae tatara ibukin raoraona. Ngkanne n te ingabong teuana, tinan Sophia e tabeka ana baeki.
“Hmm,” e taku tinana. “Kanga I namakinna bwa e raka tinebun am baeki.” E kauka te baeki ao e buuta te rabwa n ran are tatara.
“Ko bon nanonna bwa kona uota te rabwa n ran ae tatara aio ibukin te reirei, Sophia?” E titiraki Tinana.
E katoutoua atuuna Sophia. “E uruaki ana rabwa n ran Kadie, ao e aaki kona n karekea ae boou. Ngaia are akea nimana te ran n te reirei.”
“Ai maanra ngkoe n uouota te ran ae tatara nakoina?” E titiraki Tinana.
“Bon tibwa te wiiki aei,” e taku Sophia. “I aki tangiria bwa e na bwatakataka Kadie.”
E wiingare tinana. “E rangi tamaroa kai ko konaa n akoa raoraom ao n iangoia. Anne te bwai ae e na bon bae ni karaoia Iesu. I rangi ni kukurei n noria bwa ko katotonga Iesu.” E rabwata Sophia. “Ao I taku bwa iai riki te anga ae ti kona n ibuobuoki iai.”
Tinana e angan Sophia te bwatoro n ran. “Angan raoraom aio bwa e aonga n ae kabonganaa n taainako. N te aro anne ko aaki uouota te rabwa n ran ni katoa bong.”
“Ko koaua raoi?” E titiraki Sophia.
E katoutoua atuuna Tinana. “Eng. Tii tuangnga bwa e na kawakinna raoi.”
E anaa te bwatoro n ran Sophia nakon te reirei. Te moan bwai ae karaoia e angan Kadie te bwatoro.
“Auee,” e taku Kadie. “Ko rabwa, Sophia!” Kadie e rabwatia.
Sophia e namakina te kukurei inanona. E ataia e a tia n buoka raoraona, n aron ae e na bon karaoia naba Iesu.
Kamataata n te tamnei iroun Melissa Kashiwagi