“Jipan̄ Nin̄nin̄ eo Jatin,” Jera, Nob. 2023, 16–17.
Jipan̄ Nin̄nin̄ eo Jatin
Ejjeļo̧k juon en wōr an iien n̄an Lasha kiiō.
Bwebwenato in ekar bōk jikin ilo South Africa.
Lashia ewōr juon jatin nin̄nin̄ ļaddik. Ekar etan in Liam. Ekilmeej kooļan bōran im edik ne ko neen in pā ko pein. Ekar lukkuun em̧m̧an!
Bōtaab jet iien wōr juon nin̄nin̄ kāāl ilo baam̧le eo ekar pen! M̧am̧a im Baba raar poub aolep iien. Im Liam eļap an ejan̄jan̄.
“M̧am̧a, kwomaron̄ ke riit n̄an eō juon bwebwenato?” Lashia eaar kajjitōk.
“Ij aikuj katutuik Liam ilo tab eo,” M̧am̧a eaar ba “Bōlen kwon riiti juon bwebwenato ippān Ariana.”
Lashia eaar jijet laļļo̧k ioon laļ ippān leddik eo jatin. Raar elōki peij ko an juon bok. Bōtaab ekar jab āinwōt ilo an jako M̧am̧a.
“Baba, kwonaaj ke ikkure juon ikkure ippa?” Lashia eaar kajjitōk.
“Ij aikuj jipan̄ M̧am̧a kōn nin̄nin̄ m̧okta jān aō etal in jerbal,” Baba eaar ba.
Lashia eaar kōjememe. M̧am̧a im Baba ekar ejjeļo̧k aer iien n̄an liin kiiō! Raar aolep iien jipan̄ Liam.
Ejjab to Baba ekar ilo̧k in jerbal. M̧am̧a ear lelaļļo̧k Liam bwe en kiki. Eaar jijet ippān Lashia im Ariana ilo kauuj eo. Ekar m̧ōk kilen.
M̧am̧a eaar ba, “Ebwe ad poub kōn Liam.” “Kwonan̄in ke en̄jake ajimakeke jidik?”
Lashia eaar emajidjid. Liin ekar āinwōt ekōņaan jan̄.
M̧am̧a eaar atbakwoj Lashia im Ariana. “Liam ej aikuj eļap jipan̄ kiiō kōnke ej luukkuun dik wōt. E ejjab maron̄ kōm̧m̧an jabdewōt make iaan, āinwōt kwe kwomaron̄.”
“Ijeļā,” Lashia eaar ba.
“Bōtaab eļan̄n̄e kwoj kōņaan, kwomaron̄ jipan̄ eō lale Liam.” M̧am̧a ekar ettōn̄ dikdik.
“M̧ool ke?” Lashia eaar kajjitōk. Liin ekar em̧m̧an ļōmņak in ippān.
“Bar n̄a?” Ariana eaar kajjitōk.
“Bar kwe,” M̧am̧a eaar ba.
Ejjab to Liam eaar jino jan̄. Ke M̧am̧a eaar jānij kaļ eo an, Lashia eaar bōkļo̧k kwiir ko an.
“Kom̧m̧ool,” M̧am̧a eaar ba.
Raan eo tok juon, ke Liam eaar tutu, Lashai im Ariana raar kāālet juon nuknuk erreo n̄an e n̄an kōņake. Ekar wōr ie mennin mour jiddik ko rem̧m̧an! Raar bōkļo̧k nuknuk ko n̄an M̧am̧a bwe en kanuknuk Liam.
“Kom̧m̧ool,” M̧am̧a eaar ba.
Lashia im Ariana raar ļōmņak kōn wāween ko jet n̄an jipan̄. Raar kōm̧m̧ani kein kiki ko aer kajjojo jibbon̄ ilo jab kajjitōk n̄an kōm̧m̧ani. Jet iien rej bar kōm̧m̧ani kein kiki ko an M̧am̧a im Baba barāinwōt! Im ke ekar iien n̄an kōjota, raar jipan̄ Baba ilo jikin kōmat eo.
“Kom̧m̧ool,” M̧am̧a im Baba raar ba.
Ke Liam ekar jan̄, Lashia ekar kajjieon̄ jipan̄ kōkōm̧anm̧an an pād. Liin ekar jiburi im kōnono n̄an e ilo juon ainikein emera. Liam ejjan̄in de ba maron̄ ba kom̧m̧ool. Bōtaab juon raan ekar ļap an etōn̄ dikdik n̄an Lashia!
Lashia ekar bar ettōn̄ļo̧k. Ekar m̧ōņōņō bwe ekar jipan̄ nin̄nin̄ eo jatin im bar jinen im jemān!
Kōmeļeļe ko jān Shawna J. C. Tenney