“Iien Kajjieon̄ ko” Jera, Nob. 2023, 30– 31.
Iien Kajjieon̄ ko
Jared eaar jeļā bwe Jisōs Kraist ekar pād ippān.
Bwebwenato in ekar bōk jikin lo France.
Jared eaar dribble e bo̧o̧ļ eo ļo̧k ilo koot eo. Rikkure ro raar ettōr ipeļaakin, eaar wōr ainikien juuj ko aer ilo būļoor eo.
“Ipeļļo̧k!” Gabriel eaar lam̧ōj.
Jared eaar joļo̧k bo̧o̧ļ eo n̄an Gabriel im eaar ettōr wōt. Innām Gabriel eaar joļo̧k bar bo̧o̧ļ eo. Jared eaar jolōn̄ļo̧k bo̧o̧ļ ilo riin̄ eo.
SWOOSH!
Ekar deļo̧n̄!
“Em̧m̧an am̧ kōm̧m̧an, Jared,” kouj eo eaar ba ālkin ikkure eo. “Kwojeļā, iien kajjieon̄ ko n̄an regional tiim eo rej ruo wiik jān kiiō.”
Jared ekar ettōn̄ dikdik. Jejjo̧ wōt rikkure rekar karwaineneik n̄an kajjieon̄ n̄an tiim jab eo.
“Iien kajjieon̄ ko renaaj ilo raan in Jabōt,” kouj eo eaar ba. “Kwoj ļōmņak kwomaron̄ ke itok n̄an iien in?”
M̧ōņōņō eo an Jared eaar m̧ōkaj an jako āinwōt an kar waļo̧k.
“Ilo Jabōt?” Jared eaar kajjitōk.
“Aaet. Elōn̄ ke jorrāān?”
Jared ekar ļōmņak kake. Ekar iien eo an in n̄an an ikkure ilo juon tiim em̧m̧an! Bōtaab Jabōt ko raar iien eo ekar etal n̄an jar im ļōmņak wōt kōn Rilo̧mo̧o̧r.
“Jabōt ko rej juon raan aorōk n̄an n̄a,,” Jared ekar ba. “Bōtaab inaaj kōnono ippān jinō im jema kake.”
Joteen eo, Jared eaar jijet ioon peet eo an ippān ro jinen im jemān. Eaar jolōn̄ļo̧k bo̧o̧ļ eo nejin ilo mejatoto ke ekar ļōmņak. “Ilukkuun kōņaan kajjieon̄ n̄an tiim eo,” eaar jiron̄ jinen im jemān. “Bōtaab ijjab kōņaan kōm̧m̧ane ilo raan in Jabōt. Ijeļā Anij ej aorōkļo̧k jān basketball.”
“Ta eo jemaron̄ kōm̧m̧ane n̄an jipan̄?” Jinō eaar kajjitōk.
Jared ekar kōro̧olole bo̧o̧l eo ilo pein. “Jemaron̄ ke kōm̧m̧ane juon jar ippān doon?”
Ekar likūt basketbaal eo im bukwelōlō ippān Jinen im Jemān. “Jemedwōj Ilan̄,” eaar ba, “Ij lukkuun, lukkuun kōņaan kajjieon̄ n̄an tiim in basketball in. Bōtaab iien kajjieon̄ ko rej ilo raan in Jabōt! Ijeļā Jabōt ej raan eo ij lewaj n̄an Kwe. Ta eo imaron̄ kōm̧m̧ane?”
Ālkin jar eo, Jared eaar en̄jake juon en̄jake ekaenōm̧m̧an.
“Ejet am̧ en̄jake?” Jinen eaar kajjitōk.
“Ijjab etal eļan̄n̄e iien kajjieon̄ ko rej ilo raan in Jabōt,” eaar ba. “Bōtaab ewōr aō en̄jake ke enaaj EM̧M̧AN.”
Ruo raan tokālik, jinen Jared ekar bōk juon email. Leta eo ekar ba iien kajjieon̄ ko renaaj kiiō ilo raan in Jadede!
Jared emaron̄ kar kajjieon̄ im kōkwojarjar raan in Jabōt! Eaar jeļā bwe Jemedwōj Ilan̄ ekar ron̄ jar eo an.
Ium̧win wiik ko tok ruo, Jared eaar kōmālmel basketball jon̄an wōt an kar maron̄. Ke raan eo eļap ej itok, Jared eaar kōmaat an maron̄. Ekar m̧ōkaj an kōm̧mani play ko, kadelon̄e elōn̄ wōt iaan shot ko an, im kabokbok n̄an ro m̧ōttan ilo tiim eo.
“Errein rikkure ro renaaj wōnm̧aanļo̧k wōt ilo iien kajjieon̄ ko n̄an tiim eo,” kouj eo eaar ba ālikin rauun eo kein kajuon. “Jouj ron̄jake etam̧.”
Menono eo an Jared ekar lukkuun bam̧. Kouj eo ekar kūr juon āt. Innām bar juon. Im bar juon. Jared ekar en̄jake kōjatdikdik eo an n̄an pād ilo tiim eo ekar makunļo̧k.
Ejjab to kouj eo ekar kam̧ōj laajrak eo. Ekar jan̄in de kūr etan Jared. Jared ejjamin em̧m̧akūtļo̧k n̄an rauun eo tok juon an iien kajjieon̄ ko.
Jared eaar jijet ioon jea aļaļ eo inam̧ōj in m̧ōn ikkure eo im kalimjōk juuj ko an. Eaar lukkuun kate. Bōtaab ekar āinwōt n̄e aolep jerbal ko an raar ejjeļo̧k tokjāer.
Ke jinen eaar ektake, Jared ekar kōjōboulul bōran. “Ijjab tōprak n̄an tiim eo.”
Jinen ekar kanooj keeņtok im atbakwoj e. “Ij būrom̧ōj ejab tōprak kar kōņaan eo ad,” liin ekar ba.
Jared ekar bōk kūtwōn. Innām, juon ļōmņak ekaenōm̧m̧an ekar itok n̄an e.
“Men ko rejjab aolep iien waļo̧k ekkar n̄an ekōjkan ad kōņaan, lein ekar ba. “Bōtaab Jisōs Kraist ej lukkuun jetjet an jeļā ekōjkan aō en̄jake. Ej pād ilo rejet eo aō.”
M̧am̧a ekar ettōn̄ dikdik. “Kwoj m̧ool! E ejeļā ekōjkan am̧ en̄jake.”
Jared ekar ettōn̄ dikdikļo̧k. Ekar būrom̧ōj wōt, bōtaab ekar em̧m̧anļo̧k an en̄jake jeļā bwe Rilo̧mo̧o̧r ekar meļeļe ekōjkan an kar en̄jake. Jared eaar jeļā bwe Jisōs enaaj iien otemjej iakwe im rejtak e.
Kōmeļeļe ko jān Britain Morris