“Juon Eo Emeļeļe,” Jera, Nob. 2023, 26–27.
Juon Eo Emeļeļe
Ro m̧ōttan Blair rejjab meļeļe ta eo ekar āinwōt bōk n̄an wōr nan̄inmej in Crohn.
Bwebwenato in ekar bōk jikin ilo USA.
“Ijjab maron̄ iwōj rainin,” Blair eaar ba Turin mejān eaar bwil jān an jook.
Ro m̧ōttan raar kalimjōk e. “Ak kwar ba kwonaaj!” Sammy ekar ba.
“Ijeļā.” Blair ekar kalimjōk neen. “Ejjab kanooj em̧m̧an aō mour. Joļo̧k aō bōd.”
“Bar men eo kwar ba iien eo ļo̧k,” Jessica eaar ba.
Blair ekar jab jeļā ta eo en ba. Ekar kōņaan etal n̄an m̧ōn Sammy. Ak lojien ekar kanooj metak rainin. Ekar aikuj ro̧o̧l n̄an m̧weo im kakkije.
Ewōr an Blair nan̄inmej in Crohn. Ej kōm̧m̧an menin an lo̧jien metak, im elukkuun metak. Eitōn aolep raan emetak lojien jekdoon n̄e jidik wōt. Bōtaab jet raan ekar nana ļo̧k jān jet. Rainin ej juon iaan raan ko. Liin ekar kōņaan kāālet ewi wōt raan ko ejjab ļapļo̧k an metak. Ekar āinwōt lo̧jien liin ekar ļap wōt an metak jabdewōt iien liin ekar kōņaan kōm̧m̧ane juon men ekam̧ōņōņō.
“Jen etal,” Sammy eaar ba n̄an Jessica.
Ke Blair eaar tōparļo̧k m̧weo, eaar bōk uno ko nim̧ōn, Innām liin ekar kajjieon̄ in kiki. Ak ekar lukkuun ļap an metak.
Jinen im jemān raar itok im lale. Baba eaar jijet ioon peet eo. “Ej et am̧ pād?”
“EM̧M̧AN. Uno ko raar jipan̄ jidik,” Blair eaar ba
“Ij būrom̧ōj kwojjab maron̄ etal n̄an m̧ōn Sammy,” M̧am̧a eaar ba
Blair ekar dān in kōmjaļaaļ ilo mejān. “Ejjab em̧m̧an! Ro m̧ōtta rejjab meļeļe elmen jekjek in. Blair ekar kadkad kōn juon pet n̄an dipin m̧weo. “Ij kōņaan wōt ājmourļo̧k.”
Jemān Blair ekar atbakoje. “Ijeļā. Kwoj ke kōņaan juon kōjeraam̧m̧an an priesthood?”
Blair ekar em̧ajidjid. Kōjeraam̧m̧an eo eaar jipan̄ e en̄jake eļapļo̧k aenōm̧m̧an.
Jemān eaar likūt pein ioon bōran Blair im kar kōjeraam̧m̧an e bwe en kakkije im en̄jake aenōm̧m̧an. Ekar juon kōjeraam̧m̧an em̧m̧an. Ekar jipan̄ liin keememej bwe Jemedwōj Ilan̄ ekar iakwe e. Bōtaab liin ekar en̄jake wōt būromōj kōn ro m̧ōttan.
Ālkin kōjeraam̧m̧an eo, Jinen im Jemān Blair rekar leļo̧k juon mejānmaik in kiki. Rekar etal bwe en maron̄ kiki.
Blair ekar babu ļo̧k im kiil mejān. Kōjeraam̧m̧an eo ekar jipan̄, ak liin ekar metak wōt.
Ekar bukwelōlō turin jikin kiki eo an n̄an jar. Ilo jinoin ekar āinwōt enan̄in jar ko an. Liin ekar jiron̄ Jemedwōj Ilan̄ ta eo ekar kam̧m̧oolol kake im kar kajjitōk n̄an en̄jake em̧m̧anļo̧k. Ak ilo tōre in eaar etal wōt.
“Jemedwōj Ilan̄, ij lukkuun en̄jake būrom̧ōj. Ij būromōj kōn aō jab pād ippān ro m̧ōtta,” liin ekar ba. “Ij en̄jake ajimakeke. Ejjeļo̧k juon emeļeļe ewi jon̄an aō metak aolep raan. Ij būrom̧ōj kōn kar jekjek eo m̧okta jān aō nan̄inmej.”
Ilo an aitokļo̧k wōt an Blair kar jar, ekar ļapļo̧k an en̄jake bwe Jemedwōj Ilan̄ ekar ron̄jake jar eo an. Liin ekar jab maron̄ ron̄ ak lo E, bōtaab ekar en̄jake An iakwe. Liin ekar jeļā E ekar kea kōn ta eo ekar ba. Blair ekar jab kōņaan bwe en jako en̄jake eo.
Blair eaar jar m̧ae iien eo ekar jiron̄ Jemedwōj Ilan̄ aolep men ekar en̄jake. Innām juon ļōmņak ekar jiktok ilo kōļmenļo̧kjen eo an. Ro m̧ōttan Blair rejjamin maron̄ jeļā ekōjkan en̄jake n̄an wōr nan̄inmej in Crohn, bōtaab Jemedwōj Ilan̄ im Jisōs Krar raar jeļā. Raar jeļā ewi jon̄an an metak im an ajimakeke. Raar aolep iien pād ijōn n̄an liin.
Blair ekar en̄jake āinwōt ekar bōk juon atbakwoj kileplep. Ālkin an kam̧ōj jar eo an, liin ekar etal n̄an pukōt ro jinen im jemen n̄an jiron̄ er ta ekar waļo̧k.
“Kwar ettōņak kamijak ke?” Jinen eaar kajjitōk.
Blair eaar ettōn̄. “Jaab. Ikar jar!”
Jinen ekar bwilōn̄. “Ekkeinļo̧k jidik kōmro kar ba kiki em̧m̧an. Kwar jar jān tōre eo ke?”
Ekar jon̄an aitokan in ke? Blair ekar em̧ajidjid. “Ekar āinwōt n̄e ikar bōk juon atbakwoj kileplep. Jemedwōj Ilan̄ im Jisōs Kraist rejeļā elmen aō en̄jake. Kōnke kōn Er, ijjab aikuj en̄jake ajimakeke!”
Kōmeļeļe ko jān Tammie Lyon