“Jenaaj Jim̧or Kōm̧m̧ane Menin,” Jera, Nob. 2023, 40–41.
Jenaaj Jim̧or Kōm̧m̧ane Menin
Annie ekar mijak in jino pād ilo Doulul eo an Jiron̄ ro.
Bwebwenato in ekar bōk jikin ilo USA.
Annie eaar iri ed in nuknuk eo an. Liin ekar kajjieon̄ ron̄jake rikōnono ro. Bōtaab ekar wōr juon an en̄jake in ikūm̧kūm̧ inepata.
Rainin ej raan eo Annie enaaj jino etal n̄an Doulul eo an Jiron̄ ro. Liin ekar etal n̄an kūlaaj eo m̧ōjin wōt kweilo̧k in kwojkwoj eo. Aolep raar ba n̄an Annie ke enaaj limo, bōtaab ijoke, ekar mijak.
Liin ekar reilo̧k n̄an Tami, leddik eo jein. Tami ekar pād ilo Doulul eo an Jiron̄ ro ium̧win jilu iiō ko, im liin ekar iakwe. Aolep iien liin ekar jiron̄ Annie ewi jon̄an an kar em̧m̧an. Tami ekar ba, “Kwonaaj ioon elōn̄ ro m̧ōttam̧.” “Eoktak jān Būraimere. Enan̄in āinwōt kwoj juon rūtto.”
Bōtaab Annie eaar jab āinwōt leddik eo jein. Em̧m̧an ippān Tami jeļā kajeen armej ro rekāāl, im ekar pidodo n̄an e n̄an kōm̧m̧an m̧ōttān. Annie ekar ejjeļo̧k an naan im ekōn wōt riit ak jin̄a ijello̧kin kōnono n̄an ro jet.
Annie ekar barāinwōt wōr an taeo, im ekar āliklik kōn reitokin. Ekar kōjerbal kūriim̧, eo ekar jipan̄. Bōtaab ebbok ko rōbūrōrōr ilo kilin mejān rejjab maron̄ jako.
Ālkin kweilo̧k in kwojkwoj eo, Annie ekar iper e neen ilo hallway eo. “Ijjab maron̄ etal n̄an Doulul eo an Jiron̄ ro,” ekar ba n̄an M̧am̧a im Tami,
Jinen ekar erreitok kōn kea. “Ikar ļōmņak kwar m̧ōņōņō kōn etal n̄an Doulul eo an Jiron̄ ro. Ta eo ekar waļo̧k?”
“Ijjab jeļā kajjien leddik ro rōrūtto.” Annie ekar jibwe turin mejān. “Im remaron̄ bōlen ettōn̄ n̄e rej lo eō.”
M̧am̧a ekar atbakwōje Annie. “Keememej bwe Tami enaaj bar pād ijeņ.”
Annie eaar ba, “Ijjab āinwōt Tami.” Liin ekar reilo̧k n̄an leddik eo jein. “Em̧m̧an am̧ kōnono n̄an armej.”
“Ijeļā epen n̄an etal n̄an juon kūlaaj ekāāl,” Tami eaar ba. “Bōtaab jenaaj jim̧or kōm̧m̧ane menin. Ikar barāinwōt en̄jake mijak ke ikar jino Doulul eo an Jiron̄ ro.”
Annie eaar kabūrōrō n̄an Tami. Tami ekar āinwōt lukkuun peran aolep iien! Jon̄an liin ekar kajjieon̄ n̄an school musical eo an im kar bōk eddo in tōl. Annie ejjab kōm̧m̧an men rot kein. Liin ekar kajjieon̄ bwe ren jab kile.
“Bōtaab kwojjan̄n kar mijak” Annie eaar ba.
Tami ekar ettōn̄ dikdik. “Aaet ij kijor mijak! Iaar mijak ke iaar kajjieon̄ n̄an kōjan̄jan̄ eo. Kwojjeļā ta eo iaar kōm̧m̧ane?”
Annie eaar kōjōboululi bōran.
“Iaar jar im iaar kajeon jon̄an wōt aō maron̄. Im iaar barāinwōt jipan̄ ajri ro jet. Āinwōt ekar āinwōt bwe elōn̄ iaer raar mijak ejjeļo̧k āinwōt n̄a. Jipan̄ ro jet peran ekar jipan̄ eō n̄an peran.”
Annie eaar ļōmņak kake. Liin emaron̄ ke kōm̧m̧an ta eo Tami ekar kōm̧m̧an im jipan̄ leddik ro ilo kūlaaj eo an jab mijak?
“Kwoj ke ļōmņak kwomaron̄ etal n̄an Doulul eo an Jiron̄ ro rainin?” M̧am̧a eaar kajjitōk.
Annie eaar bōk kūtuwōn. Innām ekar em̧ajidjid. Liin emaron̄ kōm̧m̧ane.
Annie im Tami rekar etetalļo̧k n̄an kūlaaj eo an Doulul eo an Jiron̄ ro. Annie ekar reilo̧k n̄an leddik ro jet. Jet iaer raar ikum̧kum̧ āinwōt e. Julie ekar kōro̧o̧l koļan bōran kōn addi in pein ilo an Erica kan̄ addi in pein.
Annie ekar ļōmņak kōn ekōjkan an maron̄ kar jipan̄ er. Ekar etal im jijet iturin Julie. “Kobar ikūm̧kūm̧ ke?” Annie eaar unoojdikdik. “Enaaj EM̧M̧AN.”
Julie ekar ettōn̄dikdik, im Annie eaar bar ettōn̄dikdikļo̧k. Kiiō edikļo̧k an Annie mijak. Bōlen Doulul eo an Jiron̄ ro emaron̄ lukkuun naaj em̧m̧an.
Kōmeļeļe ko jān Toby Newsome