“Te Rinerine n te Tabati,” Te Rao, Turai 2024, 4–5.
Te Rinerine n te Tabati
“Tera te toa?” E titiraki Anita.
E riki te karaki i Iceland.
“Iaona riki!” E tuanga Anita Evolett are raoraona. A noora rietatan ae a kona ni kibakiba iai i aon ana trampoline Evolett.
Bon i mwiina, e a rang kibamwaaka Anita. Ngke a manga ruo waena, e a manga kakibarakea Evolett! A uaia ni kurati ataeinnaine i nano i aon te trampoline. A ngarengare.
“E rangi ni kaunga,” e taku Anita. “Ti kona n takakaro riki ningabong?”
E rabino i aon nuukana Evolett. “Eng! “I tangiria naba!”
“Ti kona n takakaro n ana auti tibu.” E maeka tibun Anita tabeua te auti raroana mai iroun Evolett.
I mwina e a uringnga Evolett are te bong are i mwiina bon te Tabati. E tangiria ni kan nakon te Moanrinan. E na rangi ni kaunga te takakaro ma Anita, ma e tangiria ni karaoa ana rinerine ae tamaroa.
“I a tibwa uringnga ae I aki kona,” e taku Evolett. “Kabwara te bure. N na nako n taromauri ma au utu ningabong.”
E teirake Anita ao e a manga kibakiba riki. “Bukin tera?”
E a manga kibakiba naba Evolett. “Eng, I kataia n iriira Iesu Kristo. Au utu a nanako n taromauri ni katoa Tabati n reiakina rongorongona ao n anaa te toa.”
“Tera te toa?” E titiraki Anita.
“Anne are ti kana mwakoron te kariki ae uarereke ao ti nima te mwangko n ran ae uarereke ni kauringa iai Iesu Kristo,” e taku Evolett. “I mwiina a maroroakina aroia aomata ni buokaki iroun Iesu. Ao i mwiin anne, iai te kiraati ae onoti ibukiia ataei.”
“E kaunga anne.” E taku Anita. “I kona n iri?”
“Eng!” E moangare Evolett.
E biri Anita nakon tibuna n tuanga ngkana e kona n nako n taromauri ma Evolett. Te ingabong are i mwiina, a moana Anita Evolett ma ana utu i aon kawaia.
Ngke a roko n te umwantabu, E kaneweaba Anita Evolett. E kaota aia ruu kain te Moanrinan, te tabo n takakaro, ao te umwantabu.
N te tai ae kimototo e a waaki te bootaki n toa. A uaia n tekateka Evolett ao Anita. E kataia n iangoa Iesu Kristo Evolett n tain te toa. I mwiina a ongora n te marooro.
N tokina e a boo te tai ibukin te Moanrinan! E kabwarabwara Anita nakoia raoraona tabeman Evolett.
“Aio raoraou ae Anita,” e taku Evolett.
“Ti rang kukurei ngkai kam roko n te bong aei. Ngai arau Titita Magnusson,”e taku te tia reirei n te Moanrinan.
Ngke a ongora Evolett ao Anita nakon te reirei i aon Iesu Kristo, e namakina te kukurei i nanona Evolett. E kukurei ngkai e taromauri ma Anita. “E rairaki ao e moangare nakon Anita. E moangare naba raoraona.
“Ko rabwa ngkai ko kaoai,” e taku Anita i aon kawaia nakon mweengaia.
E kukurei Evolett bwa e kona n iriira Iesu Kristo. Ao e kukurei ngkai Anita e tangiria naba ni kan ata Rongorongona.
E kaunga te kibakiba i aon te trampoline ao te kiba n te eea, ma te namakin ae aabue are e namakinna Evolett e a rang tamaroa riki.
Kamataataan te tamnei iroun Fiona Powers